22.11.21

Jólamarkaður með Sweet Salone vörum í Reykjavík og Freetown

Fyrstu helgina í nóvember var haldinn Sweet Salone markaður í Mengi í Reykjavík. Allar Sweet Salone vörurnar eru handgerðar af handverksfólki í Sierra Leone og eru meðal annars unnar í samstarfi við færa íslenska hönnuði en gámur með nýjum vörum hafði nýlega komið til landsins. Myndaðist góð stemning þrátt fyrir nýhertar sóttvarnaraðgerðir og var útkoman framar vonum. Nokkuð af vörum seldust upp þar sem þær eru oft gerðar í takmörkuðu upplagi en hver og einn munur er einnig einstakur og því engir tveir eins.

   

 

Um nýliðna helgi var síðan haldinn árlegur jólamarkaður í húsnæði Aurora í Freetown þar sem meðal annars voru á boðstólum keramikvörur, nýkomnar úr ofninum frá Lettie Stuart keramiksetrinu auk ýmissa hönnunarvara. Kunnu gestir vel að meta hnossið og nýttu mörg hver tækifærið til að kaupa jólagjafir fyrir vini og vandamenn, líkt og í Reykjavík. Við þökkum öllum þeim sem sáu sér fært að koma kærlega fyrir og hlökkum til að sjá sem flesta aftur, og fleiri til, við næsta tækifæri!