Dapurlegar fréttir af fiskimiðum Vestur Afríku

Dagblaðið The Independent stundar nú rannsóknarblaðamennsku á ískyggilegu vandamáli sem mörg Vestur-Afríkuríki glíma við en um er að ræða nýtingu aflaverðmæta til bræðslu og dýraeldis í stað manneldis. Aurora velgerðasjóður starfar nú að viðamiklu sjávarútvegsverkefni í Sierra Leone sem miðar einmitt að því að berjast gegn neikvæðum áhrifum erlendra ríkja í fiskvinnslu Vestur-Afríkuríkja með því að byggja upp þekkingu á veiðum og vinnslu – en þið getið lesið um það verkefni hér.

Matvælaöryggi í Vestur-Afríku er stefnt í voða með því að nýta fisk sem nauðsynlegur er til manneldis til dýraeldis með því aðbræða hann í fiskimjöl og flytja til Vesturlanda. Neytendur á Vesturlöndum hafa oft litla hugmynd um að fiskimjöl er vinsælt dýrafóður, meðal annars fyrir svín, kjúklinga og lax þar sem það er einn besti próteingjafinn fyrir dýrin líka.

Þessi vandi hefur verið viðvarandi um árabil en versnar stöðugt. Í frétt The Independent kemur fram að lífrænn massi í sjónum við Senegal hafi hrunið úr milljón tonnum í fjögurhundruðþúsund tonn. Og að víða sé afli aðeins fjórðungur af því sem hann var fyrir áratug.

Með því að byggja upp þekkingu á veiðum og vinnslu, eins og Aurora velgerðasjóður gerir í Sierra Leone, er hægt að viðhalda eða auka próteinneyslu þjóðarinnar, stuðla að því að heimamenn geti sótt sjóinn í samkeppni við erlend skip og auka velmegun sem dregur úr fýsileika þess að bræða fiskinn í mjöl.

Matvælaöryggi er ennfremur einn mikilvægasti þátturinn til að koma á stöðugleika í heimshlutanum, öllum til góða.


Fyrsta skref í opnun fiskvinnslustöðvarinnar í Tombo

Fyrsta skrefið í að opna fiskvinnslustöðina í Tombo, Sierra Leone var tekið þann 25 september 2015 þegar farið var að selja ís til viðskiptavina. Viðskiptavinirnir eru fyrst og fremst þeir sem tengjast fiskveiðum en einnig aðrir t.d. konur sem eru með litla sölubása og selja drykki.

Þetta er fyrsti kúnninn í Tombo. Hún heitir Isata Sawa og keypti tvo poka af ís til þess að geta kælt drykkina sem hún selur.


Tímamótasamningar undirritaðir í Sierra Leóne

Aurora velgerðarsjóður hefur tekið við rekstri fjögurra löndunar- og fiskvinnslustöðva í Síerra Leóne ásamt félaginu Neptune Holding og stjórnvöldum í landinu. Samningar þess efnis voru undirritaðir í Freetwon í Síerra Leóne í dag, á 8 ára afmæli Auroru velgerðarsjóðs. Samningarnir gilda til næstu tíu ára og er fjárframlag til verkefnisins 1 milljón bandaríkjadollara til að byrja með. Það var Birta Ólafsdóttir, stjórnarmaður í stjórn Auroru, sem undirritaði samningana fyrir hönd Auroru.
Stöðvarnar fjórar voru byggðar árið 2012 í samstarfi African Development Fund (ADF) og stjórnvalda í Síerra Leóne til að efla sjávarútveg í landinu. Þrátt fyrir góð fyrirheit hafa þær  staðið ónotaðar síðan þá, einkum sökum skorts á þekkingu á slíkum rekstri í landinu. Með samningunum komast þær hins vegur í fulla notkun.

Samningarnir sem undirritaðir voru eru svokallaðir Public-private Partnership samningar (PPP) og gilda þeir til næstu tíu ára. Samningarnir eru í reynd samstarf einkaframtaks, velgerðarstarfs og stjórnvalda um þróunarstarf, fjárfestingu og nýsköpun í sjávarútvegi í Síerra Leóne. Þetta eru fyrstu PPP samningarnir sem stjórnvöld í Síerra Leóne gera. Gert er ráð fyrir að heimamenn sjálfir taki við rekstri löndunarstöðvanna að samningstíma loknum.
Á vettvangi stöðvanna verður lögð áhersla á að efla þekkingu fiskimanna á veiðiaðferðum, vinnslu á sjávarfangi og dreifingu þess á markað. Leitað verður leiða til að hagnýta fiskiauðlindir landsins á sem sjálfbærastan hátt og auka virði aflans um leið. Á sama tíma standa væntingar til þess að auka framboð á fiski fyrir íbúa Síerra Leóne sem er ein fátækasta þjóð heims. Fiskur er í dag undirstaða prótín neyslu þjóðarinnar, en árleg veiði landsmanna í dag er um 100 tonn. Ráðgert er að um 400 manns muni starfa við stöðvarnar fjórar.
Aurora velgerðarsjóður telur um mjög mikilvægt verkefni sé að ræða. Höfuðmarkmið þess verður að auka þekkingu landsmanna á sjávarútvegi og gera þá betur í stakk búna til að nýta auðlindar sínar á sem bestan og skynsamastan hátt. Öflugt og sjálfbært atvinnulíf er hverri þjóð mikilvægt og standa vonir Aurouru til þess að verkefnið muni styrkja undirstöður hagkerfis Síerra Leóne til framtíðar. Verkefnið er módelverkefni en væntingar eru um að það gæti orðið fyrirmynd annarra verkefna til eflingar atvinnulífs í Síerra Leóne.

Ólafur Ólafsson stjórnarformaður Aurora velgerðarsjóðs:
„Við teljum að verkefnið sé bæði áhugavert og afar mikilvægt. Okkar framtíðarsýn er sú að í Síerra Leóne byggist upp gott og öflugt atvinnulíf sem heimamenn geti stólað á og rekið sjálfir til framtíðar. Fjölmörg tækifæri bjóðast í sjávarútvegi í landinu og er uppbygging löndunar- og fiskvinnslustöðvanna með þessum samningum að okkar mati rétt skref í þá átt.“