Hlutverk Auroru velgerðasjóðs er að styðja við menningu og þróun samfélaga og er verkefnum ætlað að örva samfélög á sjálfbæran máta. Síðustu tvö ár höfum við einblínt á start-up og frumkvöðlasenuna, sér í lagi í gegnum Aurora Impact en um er að ræða vaxandi geira í Sierra Leone og fleiri ný verkefni eru að líta dagsins ljós. Í samræmi við markmið og stefnu okkar er menntun ungs fólks mikilvæg sjóðnum og ákváðum við því að skrifa undir samstarfssamning vegna fjármögnunar verkefnis Skool Grind SL í tengslum við frumkvöðlakennslu í gagnfræðiskólum (e. secondary schools) í Sierra Leone.

Stofnandi Skool Grind SL og ábyrgðarmanneskja verkefnisins, Sunah Agnes Keili kom auga á þörf fyrir frumkvöðlastarf -og kennslu fyrir ungt fólk og barst okkur beiðni hennar um samstarf og fjárhagslega aðkomu að verkefninu Entrepreneurship Education Clubs í september 2021. Aurora ákvað að ganga til samstarfs við Skool Grind um að koma á fót og reka frumkvöðlaklúbba og styðja við verkefnið fyrsta árið. Markmið verkefnisins er að kynna börn í sjö gagnfræðiskólum í Freetown fyrir frumkvöðlastarfi; hugmyndafræðinni, hugarfari frumkvöðla, þekkingarsviði og færni þeirra. Verkefninu er ætlað að standa yfir í níu mánuði á ársgrundvelli og hófst það undir lok október 2021.

Sex vikna þjálfunarlotur taka við í skólunum eftir að klúbbunum hefur verið komið á laggirnar þar sem nemendur fá innsýn í frumkvöðlastarf og praktíska reynslu í gegnum óhefðbundið nám og námskrá sem miðar að því að þjálfa hæfni eins og bókhald og fjármálalæsi, hugmyndasköpun og hvernig byggja á upp viðskiptaáætlun. Nemendur læra þá ennfremur að markaðsetja hugmyndir sínar með til að mynda samfélagsmiðlum og öðlast þekkingu á aðferðum til samvinnu og leiðum til frekari rannsókna.