Aurora styður við Magbenteh Boarding School á ný

Aurora hefur nýlega ákveðið að styðja aftur við matarprógram Magbenteh Community Boarding School.

Fyrir skólaárið 2017-2018 var sett á stoðir matarprógram fyrir 186 nemendur og 10 starfsmenn, þar sem þau fengu tvær næringarríkar máltíðir á dag, 5 daga vikunnar. Aurora, á meðal annarra, studdi þetta prógram.

Áður en matarprógramminu var komið á voru nemendurnir mikið að veikjast og áttu erfitt með að einbeita sér í skólanum. Flestir höfðu engan pening milli handanna til að geta keypt sér mat yfir daginn, né voru með nesti.

Að geta veitt starfsfólkinu og nemendunum tvær máltíðir á dag skipti verulega sköpum, og sáust miklar breytingar á krökkunum bæði andlega og líkamlega. Þau voru hressari og gátu einbeitt sér mun betur. Prógrammið hjálpaði þeim líka að læra meira um mikilvægi heilsu og hreinlætis. Allir nemendur þurfa að þvo sér um hendur áður en þeir borða og þrífa svo skálina og skeiðina þegar þau eru búin. Allir fengu sína eigin skál og skeið sem veitti þeim einnig meira sjálfstæði.

Vegna allra þeirra jákvæðu áhrifa sem prógrammið hafði á nemendurna ákvað Aurora að styðja aftur við skólann, annað árið í röð, þar sem skólinn hefur ekki enn náð að tryggja fjármagn til lengdar.


Jákvæð áhrif af skólamáltíðarverkefni

Við höfum fengið loka skýrslu af áhrifum skólamáltíðar verkefni sem Aurora studdi fyrr á árinu í Magbenteh Community Boarding School – niðurstöðurnar eru vissulega gleðilegar.

Aurora Final Report

 


Skólamáltíðaverkefni í Bombali fer vel af stað

Nýlega skrifaði Aurora undir samning við Swiss – Sierra Leone Development Foundation um að styrkja samtökin um skólamáltíðir fyrir nemendur í heimavistarskólanum í Magbenteh, út þetta skólaár. Skólinn var stofnaður árið 2016 og gífurleg þörf var á að bjóða upp á máltíðir fyrir börnin, þar sem mörg þeirra mæta daglega til skóla án þess að hafa fengið að borða.

Verkefnið, sem starfrækt hefur verið um nokkurra vikna skeið, hefur farið mjög vel af stað og sjáanleg breyting til batnaðar hefur orðið á einbeitingu og námsárangri barnanna. Áhersla hefur verið lög á að máltíðirnar innihaldi nægilegt magn vítamína og steinefna, fitu og prótíns til að fullnægja næringarþörf nemendanna, en vannæring er landlægur vandi meðal barna í Sierra Leone. Í tengslum við skólamáltíðirnar læra börnin um borðhald og hreinlæti í tengslum við máltíðir og sjá sjálf um að vaska upp eigin áhöld og borðbúnað.

Heimavistarskólinn í Magbenteh er staðsettur í Bombali héraði í Sierra Leone og nemendur hans eru börn úr fátækustu þorpum svæðisins, sem mörg hver urðu munaðarlaus í kjölfar ebólufaraldarins sem geysaði á svæðinu á árunum 2014–2016.

Skólamáltíðirnir hafa nú þegar bætt líðan barnanna og gæði skólastarfsins og mikil bjartsýni ríkir um framhaldið hjá aðstandendum skólans.


Aurora fjármagnar skólamáltíðir í Bombali district

Í febrúar skrifaði Aurora undir samning við Swiss – Sierra Leone Development Foundation um að styrkja samtökin til þess að nemendur í heimavistarskólanum í Magbenteh geti fengið skólamáltíðir út þetta skólaár.

Skólinn var stofnaður árið 2016 og fljótt kom í ljós að gífurleg þörf var á að bjóða upp á smáltíðir fyrir börnin. Mörg þeirra mæta daglega til skóla án þess að hafa fengið að borða. Það setur mark á skólastarfið þar sem slíkt dregur bæði úr námsgetu og einbeitingu.

Lögð verður áhersla á að máltíðirnar innihaldi nægilegt magn vítamína og steinefna, fitu og prótíns til að fullnægja næringarþörf nemendanna.

Vannæring er landlægur vandi meðal barna í Sierra Leone, en langvarandi næringarskortur var greindur hjá 30% barna yngri en 5 ára í landinu, í rannsókn sem gerð var árið 2014 af Matvælastofnun Sameinuðu þjóðanna.

Skólinn er staðsettur í Bombali héraði í Sierra Leone og eru nemendur skólans börn úr fátækustu þorpum svæðisins. Mörg þeirra urðu munaðarlaus í kjölfar ebólufaraldarins sem geysaði á svæðinu á árunum 2014–2016.