Aurora velgerðasjóður styrkir Neistann og Kraft um rétt rúmar 6 milljónir króna

Laugardaginn 2. júlí var Neistanum, styrktarfélagi hjartveikra barna, og Krafti, stuðningsfélagi ungs fólks sem greinst hefur með krabbamein, afhentar rúmar 7 milljónir króna sem safnast höfðu á vegum Hrossarækt.is með sölu happdrættismiða. Aurora velgerðasjóður tók þátt í þessu frábæra framtaki með því að leggja söfnuninni lið og lagði fram 5 milljónir króna í upphafi söfnunarinnar. Þar að auki hét Aurora því að leggja fram krónu á móti hverri krónu sem myndi safnast með sölu happdrættismiðanna. Seldir voru happdrættismiðar fyrir 1.016.000 kr. og lagði Aurora velgerðasjóður því 6.016.000 kr. í söfnunina í heild en söfnunarféð varð samtals 7.032.000 kr. sem rennur til helminga til Neistans og Krafts.
Styrkurinn var afhentur á Landsmóti hestamanna að Hólum í Hjaltadal. Stuðningur Aurora er veittur í minningu mikils hestamanns Einars Öder, sem lést á síðasta ári, og voru það Dagmar dóttir Einars, og Svanhvít, eiginkona hans sem afhentu styrkinn fyrir hönd Auroru.
Á myndinni eru frá vinstri: Snorri Kristjánsson og Magnús Benediktsson frá Hrossarækt, mæðgurnar Svanhvít Kristjánsdóttir og Dagmar Öder, Sandra Valsdóttir frá Neistanum, Berglind Jónsdóttir og Ragnheiður Davíðsdóttir frá Krafti og Hulda G. Geirsdóttir frá Hrossarækt.


Nýr lánasamningur gerður við örlánafyrirtæki í Freetown

Skrifað var undir nýjan lánasamning milli Auroru velgerðasjóðs og Grassroot Gender Empowerment Movement (GGEM) í Freetown þann 2. júní 2016. Markmið lánveitingarinnar er að styðja við bakið á einstaklingum og smærri fyrirækjum og um leið auka veg hagþróunar í Sierra Leone.

Samkvæmt samningnum fær GGEM 100.000 dollara lán til tveggja ára. Peningana munu þau endurlána til einstaklinga og smærri fyrirtækja í Sierra Leone. Áhersla verður lögð á að styðja við samfélögin í Goderich, Tombo og Shenge þar sem Aurora velgerðasjóður rekur fisklöndunarstöðvar í gegnum fyrirtækið Neptune (www.neptune.sl).Þetta er annar samningur sem Aurora gerir við GGEM, sá fyrri var undirritaður í nóvember 2014 og var einnig til tveggja ára. Þúsundir einstaklinga og fyrirtækja hafa notið góðs af þeim samningum og hægt er að sjá dæmi t.d. hér.


Aurora velgerðasjóður tekur þátt í söfnun Hrossaræktar.is fyrir Neistann og Kraft

Aurora velgerðasjóður lagði 5 milljónir króna tilí söfnunar Hrossaræktar.is til styrktar Neistanum, styrktarfélags hjartveikra barna, og Krafts, stuðningsfélags ungs fólks sem greinst hefur með krabbamein. Styrkurinn var afhentur laugardaginn 9. apríl í miðri Stóðhestaveislu sem fram fór í Samskipahöllinni. Söfnuninni var hrint af stað þetta laugardagskvöld og mun hún standa út júní. Heildarupphæðin verður síðan afhent á landsmóti hestamanna í júlí.
Framlag Auroru í þessa söfnun er í minningu Einars Oder Magnússonar, hestamanns, sem lést á síðasta ári. Þar að auki mun Aurora velgerðasjóður leggja fram krónu á móti hverri krónu sem safnast á næstu vikum, allt að 4 milljónum króna.


Aurora heldur tölvunámskeið og gefur 85 tölvur til ungmenna í Sierra Leone

Aurora velgerðarsjóður í samstarfi með SAMSKIP og Idt labs héldu frítt tölvunámskeið fyrir 85 ungmenni í Freetown, höfuðborg Sierra Leone. Unga fólkið sótti vikulangt námskeið um notkun internetsins og helstu forrita á borð við Excel og Word. Að námskeiðinu loknu voru allir leystir út með viðurkenningaskjal og tölvu til eigin nota. Mikið þakklæti og ánægja var með þetta verkefni og voru margir að komast í kynni við tölvu í fyrsta sinn.

Þetta verkefni var tilraunaverkefni hjá Auroru velgerðasjóð, tilraunaverkefni sem gekk vonum framar. Það er því von okkar að við getum fengið önnur fyrirtæki í lið með okkur og endurtekið þetta verkefni, því þörfin er mikil.
Sjá nánar um verkefnið hér.


Aurora skrifar undir samning um að byggja hreinlætisaðstöðu í fiskisamfélaginu í Goderich, Sierra Leone

Aurora velgerðasjóður hefur skrifað undir samning við sveitarstjórnina í Goderich, Sierra Leone um að byggja 8 salerni og 2 sturtuaðstöður á sameiginlegu svæði í Goderich, en íbúar þessa svæðis hafa ekki aðgang að neinu slíku.
Þar að auki mun sveitastjórnin, með fjárhagslegri aðstoð frá Auroru, bæta frárennsli og skolpaðstöðu á svæðinu. Þetta er fiskisamfélag og samanstendur af um 500 manns, sem öll munu njóta ávinnings af þessu verkefni. Við hjá Aurora velgerðasjóði erum afar stolt af þessu samstarfsverkefni á milli Auroru og fiskisamfélagsins í Goderich. En ein af þeim löndunarstöðvum sem Aurora rekur í dag í Sierra Leone í gegnum fyrirtækið Neptune er staðsett í Goderich.


Annáll Auroru velgerðasjóðs 2015

Árið 2015 var gott ár í starfi Auroru velgerðasjóðs, en þetta var áttunda starfsár sjóðsins.
Styrkt voru 7 mismunandi verkefni fyrir samtals tæplega 59 milljónir króna.

Í heild hefur sjóðurinn styrkt verkefni fyrir um samtals 742 milljónir króna frá stofnun árið 2007 fram til ársins 2015.

Árið í hnotskurn:
Í upphafi árs lagði Aurora velgerðasjóður til 3,4 m.kr. til byggingar nýs skóla í Loitokitok, sem er á Masai Mara svæðinu í Kenía, í gegnum ABC barnahjálp. Nýja skólabyggingin var tekin í notkun í september.

Dótturfélög Auroru velgerðasjóðs létu taka til sín á árinu, þótt verulega hefur dregið úr formlegu starfi Kraums. Hönnunarsjóður Aurora fékk 25 m.kr. á árinu og Kraumur 5 m. kr.
Í  mars stóðu Kraumur ásamt Hönnunarsjóð Auroru fyrir glæsilegu götu-tónlistarpartíi á Hönnunarmars. Hljómsveitir og tónlistarmenn, hönnuðir og arkitektar mættust í pop-up borg framtíðarinnar í porti Listasafns Reykjavíkur laugardagskvöldið 14.mars í Götu-partý Kraums og Hönnunarsjóðs Auroru.

Hönnunarsjóður Auroru stóð einnig fyrir sýningu og viðburðadagskrá í Hafnarhúsinu á Hönnunarmars þar sem verkefnið HÆG BREYTILEG ÁTT var kynnt. Í framhaldinu gaf Hönnunarsjóðurinn út kynningarrit um verkefnið. Sýningunni og viðburðunum voru gerð góð skil í fjölmiðlum og m.a. var gerð fimm þátta útvarpssería um verkefnið hjá RUV.

Í júlí styrkti Hönnunarsjóður Auroru útgáfu bókverks um Högnu  Sigurðardóttur arketikts sem Guja Dögg Hauksdóttir arkitekt hefur unnið að.
Aurora velgerðasjóður gerði tvo lánasamninga við örlánafyrirtæki (e. micro credit) í Sierra Leone á seinni hluta árs árið 2014. Fyrirtækin endurlána bæði einstaklingum og litlum og meðalstórum fyrirtækjum og hefur þessi lánastarfsemi gengið vel og höfum við deilt nokkrum sögum hér á heimasíðu Auroru. Í maí var greidd út síðasta greiðsla til örlánafyrirtækjanna að upphæð 13 m.kr. sem öll hefur verið endurlánuð áfram og er þakklætið mikið hjá heimamönnum, ekki síst þar sem margir aðrir erlendir aðilar drógu verulega úr öllum stuðningi vegna ebólu faraldsins sem geysaði í Sierra Leone á árunum 2014 og 2015.

Í upphafi árs 2015 skrifaði Aurora velgerðasjóður undir samning við stjórnvöld í Sierra Leone um að taka við rekstri fjögurra löndunar- og fiskvinnslustöðva ásamt öðru félagi. Stofnað var nýtt fyrirtæki í Sierra Leone Neptune sem mun sjá um reksturinn. Hefur Aurora lagt fram rúmlega 8 m.kr. til þessa verkefnis á árinu, en þessi samningur er til 10 ára. Þetta er tímamótasamningur fyrir Aurora velgerðasjóð þar sem bein aðkoma sjóðsins verður mikil að þessu verkefni. Neptune tók formlega við fiskvinnslu- og löndunarstöðvunum á seinni hluta ársins.

Vinafélag Vinjar fékk þriðju úthlutunina af þremur, 1 m.kr., undir lok árs fyrir það mikilvæga starf sem fer fram á vegum Rauða Krossins á Hverfisgötunni
Í desember var síðan Kraumslistinn valinn og í kjölfarið voru 6 tónlistarmönnum og hljómsveitum veitt Kraumsverðlaunin við hátíðlega athöfn í Vonarstræti.


Kraumsverðlaunin afhent í áttunda sinn

Það var mikil gleði í Vonarstrætinu þann 17. desember þegar Kraumur tilkynnti hvaða 6 íslensku tónlistarmenn og hljómsveitir hljóta Kraumsverðlaunin í ár!

Listamennirnir sem þóttu skara fram úr í gæðum og frumleika þetta árið eru Dj flugvél og geimskip fyrir sína þriðju breiðskífu Nótt á hafsbotni, Mr. Silla fyrir samnefnda breiðskífu, Asdfhg fyrir fraumraun sína Steingervingur, Misþyrming fyrir sína fyrstu plötu Söngvar elds og óreiðu, Teitur Magnússon fyrir sína fyrstu sólóplötu 27 og Tonik Ensemble, sem til þessa hefur gefið út smáskífur og endurhljóðblandanir af verkum annarra, fyrir sína fyrstu breiðskífu; Snapshots.

Alls hafa hátt í fimmtíu breiðskífur hlotið verðlaunin á undanförnum átta árum, en með þeim er verið að verðlauna þá listamenn sem þykja skara fram úr í gæðum, metnaði og frumleika að mati dómnefndar.

Með verðlaununum er ætlað að kynna og styðja við plötuútgáfu íslenskra listamanna og hljómsveita með því að verðlauna og vekja sérstaka athygli á því sem er nýtt og spennandi og þeim verkum sem þykja skara fram úr í gæðum, metnaði og frumleika. Allar íslenskar plötur sem hafa komið út á árinu eiga möguleika á að komast á Kraumslistann og hreppa Kraumsverðlaunin. Bæði plötur sem eru gefnar út á geisladisk og/eða vínyl, sem og útgáfur á netinu.

Kraumsverðlaunin eru valin af sextán manna dómnefnd sem skipuð er fólki sem hefur margvíslega reynslu af því að fjalla um, spila og vinna með íslenska tónlist. Formaður dómnefndar er Árni Matth­ías­son.

Ráðið fór yfir hátt í annað hundrað hljómplatna sem komið hafa út á árinu og í kjölfarið valdi 21 íslenska plötu á Kraumslistann sem tilkynntur var þann 1. desember sl. á degi íslenskrar tónlistar.


Nýtt viðskiptasamband myndað með veitingu á smáláni

Aruna Sesay rekur sitt eigið fyrirtæki Macro Investment, sem selur fylgihluti fyrir tölvur og ýmis ritföng. Aruna fékk smálán (e. micro credit) uppá 40m. SLL (u.þ.b. 1m kr.) frá Aurora velgerðasjóði, í gegnum smálánafyrirtækið A Call To Business Trading Limited,  annað tveggja smálánafyrirtækja sem Aurora velgerðasjóður er í samstarfi við í Sierra Leone. Með láninu gat hann fjármagnað og afgreitt stóra pöntun sem honum hafði borist og náð að mynda viðskiptasamband við nýtt fyrirtæki. Lánið var veitt með því að taka veð í birgðum og söluhagnaði, fyrirkomulag sem Aruna var mjög þakklátur fyrir. En almennt eru lán veitt út á veð í fasteignum eða öðrum eignum, eignum sem Aruna á ekki til.
Með honum á myndinni er Tony Kallon starfsmaður A Call To Business Trading Limited.


Fyrsta skref í opnun fiskvinnslustöðvarinnar í Tombo

Fyrsta skrefið í að opna fiskvinnslustöðina í Tombo, Sierra Leone var tekið þann 25 september 2015 þegar farið var að selja ís til viðskiptavina. Viðskiptavinirnir eru fyrst og fremst þeir sem tengjast fiskveiðum en einnig aðrir t.d. konur sem eru með litla sölubása og selja drykki.

Þetta er fyrsti kúnninn í Tombo. Hún heitir Isata Sawa og keypti tvo poka af ís til þess að geta kælt drykkina sem hún selur.


Mary Roberts þakklát fyrir að hafa fengið tækifæri til að efla rekstur sinn með smáláni

Mary Roberts er ein þeirra sjálfstætt starfandi kvenna í Sierra Leone sem hafa fengið svokallað smálán (e. Microcredit) frá Aurora velgerðasjóði í gegnum GGEM (Grassroot Gender Empowerment Movement). Mary fékk 3 milljónir Leone (rúmlega 80.000 kr.) að láni í janúar 2015. Hún selur hefðbundinn afrískan klæðnað í búð sinni í Freetown og notaði hún lánið til þess að auka við birgðir verslunarinnar. Hún hefur nú þegar borgað til baka fyrstu fimm afborganir sínar og er þakklát fyrir að hafa fengið tækifæri til þess að geta eflt rekstur sinn á þennan hátt.


Auður Einarsdóttir hefur látið af störfum sem framkvæmdastjóri Aurora velgerðasjóðs

Auður hefur gengt starfi framkvæmdastjóra Aurora velgerðasjóðs undanfarin fimm ár.  Hún hefur nú flust búferlum til Hollands ásamt fjölskyldu sinni og lét af störfum í byrjun ágúst.
Aurora hefur sinnt þróunarstarfi víðsvegar um heim undanfarin ár en hefur nú ákveðið að leggja enn meiri kraft í það starf og minnka áherslu á verkefni sín á Íslandi.  Fyrr á árinu var Regína Bjarnadóttir þróunarhagfræðingur ráðin til þess að stýra þróunarverkefnum Aurora og mun hún nú einnig taka við starfi framkæmdastjóra Aurora velgerðasjóðs.
Stjórn Aurora þakkar Auði fyrir afar farsælt, gott og skemmtilegt samstarf á liðnum árum og óskar henni velfarnaðar í Hollandi.


Regína Bjarnadóttir þróunarhagfræðingur ráðin framkvæmdastjóri þróunarmála hjá Aurora velgerðarsjóði.

Regína hefur gegnt starfi forstöðumanns greiningardeildar Arion banka frá því í nóvember 2013. Áður starfaði Regína sem hagfræðingur á hagfræðisviði Seðlabankans frá árinu 2007. Hún var verkefnastjóri hjá Þróunarstofnun Sameinuðu þjóðanna (UNDP) í Guyana frá 2005 til 2007. Þá starfaði Regína við greiningar á hrávörumörkuðum og ráðgjöf hjá CRU Analysis og CRU Strategies í London frá 2001 til 2005.
Aurora hefur ákveðið að leggja enn meiri kraft í þróunarstarf og er Regína ráðin til að stýra því starfi. Hún mun hafa aðsetur á Íslandi og fylgja verkefnum eftir með því að heimsækja svæði þar sem sjóðurinn starfar í nánu samstarfi við heimafólk.
Regína er með BS-próf í hagfræði frá Háskóla Íslands og meistaragráðu í þróunarhagfræði frá School of Oriental and African Studies, London.


Þakkarbréf frá forsetafrú Sierra Leone

Frú Sia Nyama Koroma forsetafrú Sierra Leone sendi Ólafi Ólafssyni stjórnarformanni einstaklega fallegt þakkarbréf.  Í bréfinu þakkar hún þann mikla stuðning sem Ólafur og Aurora velgerðasjóður hafa sýnt löndum hennar nú á erfiðum tímum í baráttu við Ebólu en sjóðurinn styrkti þá baráttu rausnarlega með framlagi bæði í formi matargjafa og sjúkragagna.  Forsetafrúin þakkar Ólafi og Auroru fyrir einstakan stuðning og hollustu í gegnum árin en sjóðurinn hefur unnið að mörgum mikilvægum verkefnum í Sierra Leone.

Mörg spennandi verkefni eru í vinnslu í Sierra Leone en tímamótasamningur var undirritaður á dögunum um rekstur fjögurra löndunar- og fiskvinnslustöðva.  Eins voru gerðir samningar við tvö örlánafyrirtæki í Freetown en nánar er fjallað um verkefnin hér á heimasíðunni.

 


Fjallað um stuðning Auroru við Sierra Leone í fjölmiðlum ytra

Fjölmiðlar í Sierra Leone hafa fjallað um stuðning Auroru við verkefni tengd Ebólu sem unnin eru í samvinnu við forsetafrú landsins.   Hluti af þessum styrk fór í að gefa mat til þeirra sem minnst mega sín og voru veglegar matargjafir afhentar meðal annars til munaðarleysingjaheimila og heimilislausra í Freetown.

Má segja að matargjafirnar hafi komið í góðar þarfir hjá þessum hópum þar sem átak í að útrýma Ebólu stóð yfir þar sem fólk var hvatt til að „sitja heima“ í þrjá daga.

Greinina í heild má lesa á eftirfarandi vefslóð: http://awoko.org/2015/04/01/sierra-leone-news-first-lady-aurora-foundation-feed-less-privileged/


Kraumur og Hönnunarsjóður Auroru buðu í Götu-partý á Hönnunarmars

Hljómsveitir og tónlistarmenn, hönnuðir og arkitektar mættust í pop-up borg framtíðarinnar í porti Listasafns Reykjavíkur laugardagskvöldið 14.mars í Götu-partý Kraums og Hönnunarsjóðs Auroru.
Þeir tónlistarmenn sem komu fram voru: Retro Stefson, Sin Fang, Samaris, Snorri Helgason, Bjartey & Gígja úr Ylju, Valdimar Guðmundsson & Örn Eldjárn.  Viðburðahönnuðir kvöldsins voru Theresa Himmer og Brynhildur Pálsdóttir.

Í Porti Hafnarhússins var verkefnið Hæg breytileg átt með sýningu sem varpar ljósi á íbúðir og hverfi framtíðarinnar.  Þetta kvöld umbreyttist sýningin í lifandi framtíðarborg þar sem á einni götunni var blásið til partýs með eðal „street food“ sölubásum og börum.

Lengi hefur staðið til að dóttursjóðir Auroru gerðu verkefni saman og var einstaklega ánægjulegt að sjá hvað samvinnan milli tónlistarfólksins og hönnuðanna gekk vel sem endurspeglaðist í ógleymanlegu kvöldi.


Tímamótasamningar undirritaðir í Sierra Leóne

Aurora velgerðarsjóður hefur tekið við rekstri fjögurra löndunar- og fiskvinnslustöðva í Síerra Leóne ásamt félaginu Neptune Holding og stjórnvöldum í landinu. Samningar þess efnis voru undirritaðir í Freetwon í Síerra Leóne í dag, á 8 ára afmæli Auroru velgerðarsjóðs. Samningarnir gilda til næstu tíu ára og er fjárframlag til verkefnisins 1 milljón bandaríkjadollara til að byrja með. Það var Birta Ólafsdóttir, stjórnarmaður í stjórn Auroru, sem undirritaði samningana fyrir hönd Auroru.
Stöðvarnar fjórar voru byggðar árið 2012 í samstarfi African Development Fund (ADF) og stjórnvalda í Síerra Leóne til að efla sjávarútveg í landinu. Þrátt fyrir góð fyrirheit hafa þær  staðið ónotaðar síðan þá, einkum sökum skorts á þekkingu á slíkum rekstri í landinu. Með samningunum komast þær hins vegur í fulla notkun.

Samningarnir sem undirritaðir voru eru svokallaðir Public-private Partnership samningar (PPP) og gilda þeir til næstu tíu ára. Samningarnir eru í reynd samstarf einkaframtaks, velgerðarstarfs og stjórnvalda um þróunarstarf, fjárfestingu og nýsköpun í sjávarútvegi í Síerra Leóne. Þetta eru fyrstu PPP samningarnir sem stjórnvöld í Síerra Leóne gera. Gert er ráð fyrir að heimamenn sjálfir taki við rekstri löndunarstöðvanna að samningstíma loknum.
Á vettvangi stöðvanna verður lögð áhersla á að efla þekkingu fiskimanna á veiðiaðferðum, vinnslu á sjávarfangi og dreifingu þess á markað. Leitað verður leiða til að hagnýta fiskiauðlindir landsins á sem sjálfbærastan hátt og auka virði aflans um leið. Á sama tíma standa væntingar til þess að auka framboð á fiski fyrir íbúa Síerra Leóne sem er ein fátækasta þjóð heims. Fiskur er í dag undirstaða prótín neyslu þjóðarinnar, en árleg veiði landsmanna í dag er um 100 tonn. Ráðgert er að um 400 manns muni starfa við stöðvarnar fjórar.
Aurora velgerðarsjóður telur um mjög mikilvægt verkefni sé að ræða. Höfuðmarkmið þess verður að auka þekkingu landsmanna á sjávarútvegi og gera þá betur í stakk búna til að nýta auðlindar sínar á sem bestan og skynsamastan hátt. Öflugt og sjálfbært atvinnulíf er hverri þjóð mikilvægt og standa vonir Aurouru til þess að verkefnið muni styrkja undirstöður hagkerfis Síerra Leóne til framtíðar. Verkefnið er módelverkefni en væntingar eru um að það gæti orðið fyrirmynd annarra verkefna til eflingar atvinnulífs í Síerra Leóne.

Ólafur Ólafsson stjórnarformaður Aurora velgerðarsjóðs:
„Við teljum að verkefnið sé bæði áhugavert og afar mikilvægt. Okkar framtíðarsýn er sú að í Síerra Leóne byggist upp gott og öflugt atvinnulíf sem heimamenn geti stólað á og rekið sjálfir til framtíðar. Fjölmörg tækifæri bjóðast í sjávarútvegi í landinu og er uppbygging löndunar- og fiskvinnslustöðvanna með þessum samningum að okkar mati rétt skref í þá átt.“


Mikill fjöldi sótti um stöðu framkvæmdastjóra þróunarmála

Aurora velgerðasjóður auglýsti á dögunum eftir aðila í stöðu framkvæmdastjóra velgerðamála þar sem sjóðurinn ætlar að ráðast í nokkur metnaðarfull verkefni á næstunni í Sierra Leone.  Það er skemmst frá því að segja að um 150 manns sóttu um starfið á Íslandi og 50 manns sóttu um í Sviss.  Það er því ærið verkefni að fara yfir umsóknir og má búast við því að viðtöl fari fram í febrúar og að búið verði að ráða í starfið í apríl.  Stjórn Auroru er þakklát öllum þeim fjölda sem sýndu starfinu áhuga og er ljóst að það er mikið af  fólki sem vill vinna með sjóðnum í að bæta heiminn.


Stjórnarformaður Auroru skrifar um Sierra Leone í Morgunblaðið

Laugardaginn 13. desember birtist þessi grein í Morgunblaðinu.


Framkvæmdastjóri þróunarverkefna

Aurora velgerðarsjóður hyggst ráðast í nokkur metnaðarfull verkefni í Sierra Leone á komandi misserum. Til að stýra þróunarverkefnum Aurora er leitað að framkvæmdastjóra sem sér um daglega stjórnun þessa verkefnis.

Staðan heyrir beint undir stjórnarformann sjóðsins. Stjórn sjóðsins er skipuð fjórum einstaklingum, öllum búsettum erlendis. Framkvæmdastjórinn hefur aðsetur í Lausanne í Sviss en dvelur að jafnaði um 6 mánuði á hverju ári í Sierra Leone.

Kjörið tækifæri fyrir einstakling sem hefur náð góðum árangri í starfi og langar að takast á við nýjar áskoranir á sviði þróunarmála á erlendri grund.
Umsóknarfrestur er til og með 12. janúar 2015. Nánari upplýsingar um starfið veita Þórður S. Óskarsson (thordur@intellecta.is) og Ari Eyberg (ari@intellecta.is) hjá Intellecta í síma 511 1225. Umsókn óskast fyllt út á www.intellecta.is. Umsókn um starfið þarf að fylgja ítarleg starfsferilskrá og kynningarbréf. Farið verður með allar fyrirspurnir og umsóknir sem trúnaðarmál.


Kraumslistinn 2014

Sex lista­menn og hljóm­sveit­ir hlutu í dag Kraum­sverðlaun­in 2014 en tilkynnt var um vinningshafana við hátíðlega athöfn í Vonarstrætinu. Verðlauna­haf­arn­ir eru Óbó, sem hljóta verðlaun­in fyr­ir plöt­una Inn­hverfi, Pink Street Boys fyr­ir Trash From The Boys, Hekla Magnús­dótt­ir fyr­irHekla, Börn fyr­ir Börn, Kippi Kan­ín­us fyr­irTem­pera­ments, og Anna Þor­valds­dótt­ir fyr­ir Aer­ial.
„Þetta var sérstaklega sterkt ár í útgáfu og athygli vekur að um þriðjungur platna ársins voru aðeins gefnar út rafrænt,“ sagði Árni Matthíasson, formaður öldungaráðs Kraums.
Kraumur mun styðja við verðlaunaplöturnar og reyna að auka möguleika listamannanna bak við þær til að koma verkum sínum á framfæri erlendis með því að kaupa ákveðinn fjölda af plötunum af tónlistarfólkinu eða útgefendum þeirra og dreifa þeim til ýmissa starfsmanna tónlistarbransans erlendis.
Þá tók Hekla Magnúsdóttir, ein vinningshafa lagið við tilefnið en hún er ein af fáum þeremínleikurum á Íslandi.
Kraum­sverðlaun­in voru fyrst veitt 2008. Eng­in listamaður eða hljóm­sveit hef­ur hlotið verðlaun­in oft­ar en einu sinni, en verðlauna­haf­ar eru vald­ir af hinum 20 platna Kraum­slista sem birt­ur er í byrj­un des­em­ber. Mark­miðið með verðlaun­un­um og list­an­um er að kynna og styðja við plötu­út­gáfu ís­lenskra hljóm­sveita og lista­manna. Þau eru ekki bund­in ákveðinni tón­list­ar­stefnu og þeim fylgja eng­ir und­ir­flokk­ar.

Kraum­slist­inn í ár:

  • AdHd – AdHd 5
  • Anna Þor­valds­dótt­ir – Aer­ial
  • Ben Frost – Aur­ora
  • Börn – Börn
  • Grísalappalísa – Rök­rétt fram­hald
  • Hekla Magnús­dótt­ir – Hekla
  • Kippi Kan­in­us – Tem­pera­ments
  • Low Roar – O
  • M-Band – Haust
  • Oyama – Cool­boy
  • Óbó – Inn­hverfi
  • Ólöf Arn­alds – Palme
  • Pink Street Boys – Trash From the Boys
  • Russi­an Gir­ls – Old Stories
  • Sindri Eldon – Bitter & Resent­f­ul
  • Singa­pore Sling – The Tower of Foronicity
  • Skakkamana­ge – Sounds of Merry Mak­ing
  • Skúli Sverr­is, Ant­hony Burr & Yungchen Lhamo – They Hold it For Certain
  • Úlfur Kolka – Borg­ara­leg óhlýðni
  • Þórir Georg – Ræf­ill

Aðstand­andi Kraum­slist­ans er Kraum­ur tón­list­ar­sjóður, sem er sjálf­stætt starf­andi sjóður á veg­um Aur­oru vel­gerðarsjóðs. Kraum­ur hef­ur það að meg­in­hlut­verki að efla ís­lenskt tón­list­ar­líf, fyrst og fremst með stuðningi við unga lista­menn.
Kraum­slist­inn er val­inn af tíu manna öld­ungaráði verðlaun­anna, en það skipa:
Árni Matth­ías­son (formaður dóm­nefnd­ar), Bene­dikt Reyn­is­son, Elísa­bet Indra Ragn­ars­dótt­ir, María Lilja Þrast­ar­dótt­ir, Ólaf­ur Hall­dór Ólafs­son, Ragn­heiður Ei­ríks­dótt­ir, Trausti Júlí­us­son, Val­dís Thor og Þór­unn Edda Magnús­dótt­ir.


12.úthlutun Hönnunarsjóðs Auroru

Að þessu sinni bárust sjóðnum 50 umsóknir úr öllum greinum hönnunar og sem fyrr eru verkefnin sem úthutað er til af fjölbreyttum toga. “Við leitumst við að velja verkefni sem með einhverjum hætti eru uppbyggileg fyrir samfélagið og byggja á góðri hönnun og hugviti og eru unnin af alúð.” segir Guðrún Margrét Ólafsdóttir, framkvæmdar- stjóri Hönnunarsjóðs Auroru.
Í þessari haustúthlutun sjóðsins hljóta alls 7 verkefni styrki og þar af eru þrjú verkefni á sviði fatahönnunar. Eitt er verkefni um uppbyggingu nýs vörumerkis sem sækir innblástur í myndverk hönnuðarins og áhrifamáttar jurta. Annað er fatamerki sem hefur náð fótfestu á íslenskum markaði og framundan eru tilraunir til sóknar á erlendan markað og það þriðja er markaðsátak í Bandaríkjunum á vel þekktu íslensku vörumerki. Einnig er úthlutað til verkefnis þar sem markmiðið er að auka vellíðan ungra barna og verkefnis um hönnun og markaðssetningu nýrra leturgerða. Úthlutað er til rannsóknarverkefnis nýútskrifaðs arkitekts og síðast en ekki síst er úthlutað til nýjasta samstarfsverkefnis hönnunarfélaganna um útgáfu nýs hönnunartímarits.

HILDUR YEOMAN (2.000.000)
Hildur Yeoman fatahönnuður fær styrk til víðtækrar vöruþróunar og uppbyggingar eigin vörumerkis. Þar hefur hún ásamt samstarfsfólki sínu unnið á nýstárlegan hátt með flóru Íslands, bæði á huglægan og fagurfræðilegan hátt. Kristbjörg Kristmundsdóttir grasakona er einn af samstarfsaðilum Hildar í verkefninu. Kristbjörg blandar orkugefandi seiði, sem Hildur myndgerir útfærslu af. Myndefnið er blanda af ljósmyndum af jurtum og teikningum Hildar.
Með myndefninu stendur til að skapa fjölbreyttar vörur með aðal áherslu á fatnað.
Takmark þeirra er að ná fram góðri orku og heilandi öflum jurtanna í efnið. Samhliða vöruþróun, er verkefnið skrásett af Hildi og Daníel Björnssyni myndlistamanni og eiginmanni Hildar.
Stefnt er að því að vinnuferlið og uppskriftir af seiðum Kristbjargar verði gefið út á bók.
Sjá nánar á www.hilduryeoman.com

OR TYPE (1.500.000)
Or Type leturútgáfa fær styrk til vöruþróunar og markaðssetningar á Or Type, sem er fyrsta og eina sérhæfða leturútgáfa Íslands.
Leturútgáfan var formlega opnuð með sýningu á HönnunarMars 2013, en það eru þeir Guðmundur Ingi Úlfarsson og Mads Freund Brunse sem standa á bakvið útgáfuna. Saman starfa þeir einnig undir nafninu GUNMAD og hafa unnið til fjölda FÍT verðlauna og viðurkenninga. Or Type selur letur í gegnum netið. Or Type hefur á sínu fyrsta eina og hálfa starfsári vakið athygli innan grafísku hönnunarsenunar og selt letur til yfir 20 landa um allan heim.
Sjá nánar á www.ortype.is

RÓRÓ (1.500.000)
RóRó fær styrk til hönnunar umbúða og kynningarefnis og þátttöku í vörusýningum erlendis.
Brúðan Lúlla er þeim eiginleikum gædd að hún hefur bæði hjartsláttar og öndunarhljóð.
Rannsóknir sýna að brúðan hefur góð og merkjanleg áhrif á svefn barna og stuðlar að auknu jafnvægi í öndun og hjartslætti ungbarna. Brúðan er sérstaklega þróuð með tilliti til aðstæðna og þarfa fyrirbura.
Það er fyrirtækið RóRó sem stendur á bakvið verkefnið.
RóRó er sprotafyrirtæki sem stofnað var í lok árs 2011 af Eyrúnu Eggertsdóttur. Upphaf verkefnisins má rekja til vinnu Eyrúnar í Hugmyndahúsi háskólanna, frumkvöðlaseturs sem starfrækt var hér í Reykjavík um nokkurt skeið eftir hrun og hlaut verkefnið Gulleggið, verðlaun í frumkvöðlakeppni Klak Innovit árið 2011. Markmið fyrirtækisins RóRó er að þróa vörur sem bæta vellíðan ungra barna og er brúðan Lúlla fyrsta afurð fyrirtækisins. Hún er nú, eftir nokkurra ára þróun, tilbúin og bíður markaðssetningar. Að vöruþróun brúðunnar stendur öflugt þverfaglegt teymi. Eyrún sjálf er menntuð í sálfræði og hefur auk þess lokið grunnámi í hönnun en aðal hönnuður fyrirtækisins er grafíski hönnuðurinn Birna Bryndís Þorkelsdóttir.
RóRó hefur fengið gott brautargengi við þróun brúðunnar og notið stuðnings úr opinberum sjóðum. Auk þess sem fjárfestingasjóðurinn Eyrir Invest og Margrét Árnadóttir hafa fjárfest í verkefninu. Stuðningur Hönnunarsjóðs Auroru er ætlaður til frekari þróunnar umbúða og kynningarefnis auk þátttöku í vörusýningum erlendis.
Sjá nánar www.roro.is

JÖR BY GUÐMUNDUR JÖRUNDSSON (1.500.000)
JÖR fær styrk til hönnunar haustlínu fyrirtækisins fyrir árið 2015 og til kynningar og markaðssetningar vörumerkisins erlendis. Fyrirtækið Jör er stofnað árið 2012 af þeim Guðmundi Jörundssyni aðalhönnuði fyrirtækisins og Gunnari Erni Petersen lögfræðingi og framkvæmdastjóra. JÖR er hátísku fatamerki þar sem markmiðið er að hanna og markaðssetja tvær framsæknar fatalínur á hverju ári fyrir bæði karla og konur. Fyrirtækið Jör byggir á öflugu teymi hönnuða og handverksfólks sem vinna saman í hönnunarstúdiói í húsnæði fyrirtækisins við Laugaveg þar sem nánast allar frumgerðir eru unnar og fyrirtækið starfrækir eigin verslun.
Jör fékk styrk úr Hönnunarsjóði Auroru í haustúthlutun í fyrra til vöruþróunar og uppbyggingar vörumerkisins á innlendum markaði.
Verkefnið sem er framundan hjá Jör og Hönnunasjóðurinn veitir stuðning til að þessu sinni, er hönnun haustlínu fyrirtækisins fyrir veturinn 2015 og undirbúningur markaðssetningar á erlendan markað.
Sjá nánar www.jorstore.com

KATLA MARÍUDÓTTIR (500.000)
Katla Maríudóttir er nýútskrifaður arkitekt með mastergráðu frá Stokkhólmi og áður BA gráðu frá Listaháskóla Íslands. Katla fær styrk til að aðlaga og raungera áhugavert mastersverkefni sitt sem hún kallar Jarðnæði. Í mastersverkefninu leitast Katla við að skilja áhrif hinnar síbreytilegu náttúru Íslands á íbúana og byggingararfleiðina. Verkefnið sem Katla fær styrk til er forrannsókn vegna fyrirhugaðra áforma Akraneskaupstaðar um gerð heitrar upplifunarlaugar á Langasandi við Akranes. Í þeirri rannsókn mun Katla styðjast við sömu aðferðafræði við öflun og miðlun upplýsinga og hún gerir í mastersverkefni sínu.
Katla gerir ráð fyrir að efni rannsóknarinnar muni einnig nýtast við frekari stefnumótun í ferðamálum fyrir Akraneskaupstað. Verkefnið mun Katla vinna í samstarfi við Basalt arkitekta sem munu sjá um hönnun bygginga.
Sjá nánar www.katlamariudottir.com

KRON BY KRONKRON (1.000.000)
Kron by kronkron er eitt af leiðandi merkjum íslenskrar fatahönnunar. Fyrirtækið er stofnað árið 2008 af hjónunum Hugrúnu Árnadóttur og Magna Þorsteinssyni, sem jafnframt eru eigendur og hönnuðir merkisins. Vörumerkið KRON BY KRONKRON samanstendur af heilstæðri línu kvennfatnaðar og fylgihluta auk sérstæðrar skólínu. Vörumerkið hefur notið mikilla vinsælda á Íslandi og er hér selt í verslunum fyrirtækisins í Reykjavík. Auk þess sem vörumerkið á auknum vinsældum að fagna erlendis og er selt í völdum verslunum, bæði í Evrópu og Asíu.
Hönnunarsjóður Auroru hefur þrisvar áður úthlutað til Kron By Kronkron, í mismunandi þætti við uppbyggingu vörumerkisins. Kron Kron var í hópi styrkþega í fyrstu úthlutun sjóðsins árið 2009 og var stykurinn þá veittur til fyrstu kynningar á skólínu fyrirtækisins erlendis. Fyrirtækið var stofnað á umbrotatímum í íslensku samfélagi. Það hefur verið aðdáunavert að fylgjast með hvernig þessi samhentu hjón hafa náð að koma fyrirtæki sínu á þann stað sem það er í dag, þrátt fyrir oft takmörkuð fjáráð og óvænt áföll. Nýlega fékk fyrirtækið boð um að kynna Kron By Kronkron á stórum hátíðum tónlistar- og kvikmyndaiðnaðarins í Los Angeles.Stuðningur sjóðsins að þessu sinni er til þátttöku fyrirtækisins í umræddum viðburðum og til eftirfylgni mögulegra viðskiptatækifæra.
Sjá nánar www.kronbykronkron.com

TÍMARIT UM HÖNNUN OG ARKITEKTUR (800.000)
Nýstofnað hönnunartímarit er samstarfsverkefni hönnunarfélaganna sem eiga og reka Hönnunarmiðstöð Íslands. Tímaritinu er ætlað að miðla og veita innsýn í það áhugaverðasta sem er að gerast á öllum sviðum hönnunar á hverjum tíma. Ritstjóri hefur verið ráðinn grafíski hönnuðurinn Arnar Fells en aðrir í ritsjórn eru Elísabet V. Ingvarsdóttir, María Kristín Jónsdóttir og Sigriður Maack. Auk þess hefur verkefnið fagráð skipað fulltrúum allra þeirra níu hönnunarfélaga sem standa að verkefninu. Hönnunarsjóður Auroru styður verkefnið með fjárframlagi að upphæð áttahundruðþúsund til útgáfu tveggja fyrstu eintaka blaðsins. Það er von aðstandenda blaðsins að eftir það, megi vænta að verkefnið geti orðið sjálfbært.
Sjá nánar www.honnunarmidstod.is


Forsetafrú Sierra Leone veitir sjúkragögnum móttöku

Aurora hefur nú formlega afhent þau tvö tonn af sjúkragögnum; lyfjum og tækjum til meðhöndlunar á Ebólu sjúklingum í Sierra Leone eftir beiðni frá forsetafrú landsins Frú Sia Nyama Koroma.

FL2

Á myndinni eru Ólafur og forsetafrúin

Við afhendinguna síðastliðinn mánudag 17.nóvember sagði stjórnarformaður sjóðsins Ólafur Ólafsson að Aurora velgerðasjóður gerði sér grein fyrir því að Ebóla væri stórkostlegt vandamál í Sierra Leone og að þjóðin þyrfti hverja þá aðstoð sem möguleg væri til að ná tökum á ástandinu.  Í ljósi þessa hafi sjóðurinn ákveðið að gefa sjúkragögnin til að taka þátt í baráttunni gegn Ebólu.
Hann talaði jafnframt um mikilvægi þess að halda áfram lífinu þrátt fyrir þessar miklu hörmungar og að gera það sem þarf að gera því að það er líf eftir Ebólu sem þarf að takast á við.

Forsetafrúin var mjög ánægð þegar hún tók á móti sjúkragögnunum sérlega þar sem sjóðurinn hafi komið þeim til aðstoðar þegar aðrir erlendir aðilar hafa hrökklast í burtu.  Hún þakkaði Auroru af öllu hjarta fyrir þeirra framlag og ítrekaði mikilvægi sjúkragagnanna í baráttunni gegn Ebólu.

FL3

Á myndinni eru Ólafur og Paul með hluta af sjúkragögnunum


Fundur með forseta Sierra Leone

Fulltrúar Auroru velgerðasjóðs áttu fund með forseta Sierra Leone Dr.Ernest Bai Koroma í State House í boði forsetafrúarinnar.  Markmið fundarins var að kynna fjárfestingaáætlun sjóðsins fyrir fiskiðnaðinn í landinu og framlag sjóðsins til góðgerðamála í Sierra Leone.
Fulltrúi forsetafrúarinnar kynnti fulltrúa sjóðsins fyrir forsetanum og sagði jafnframt að sjóðurinn hafi unnið í landinu frá 2005 og hafi á þeim tíma byggt 67 skóla, þjálfað 270 kennara og formað fjölmarga mæðraklúbba í Kono héraði.    Hann tjáði forsetanum jafnframt að sjóðurinn hyggðist fjárfesta í Sierra Leone í gegnum viðskiptahlið sjóðsins með því að taka að sér rekstur löndunarstöðva í landinu.
Stjórnarformaður sjóðsins Ólafur Ólafsson tjáði forsetanum það að sjóðurinn, í gegnum sjávarútvegsfyrirtæki sitt hefði tekið þátt í uppboðsferli fyrir löndunarstöðvar og hefði fengið þrjár af fjórum löndunarstöðvum sem boðið var í.  Þó ætti enn eftir að ganga frá samningum en það væri langt komið.  Hann bætti við að þessar þrjár löndunarstöðvar myndu ráða um 300 starfsmenn og yrði meirihluti þeirra fólk af staðnum.  Hann sagði jafnframt að sjómennirnir og starfsmenn löndunarstöðvanna fengju þjálfun í meðhöndlun fisks við veiðar og framleiðslu.  Jafnframt fengju þeir aðgang að betri verkfærum til að bæta veiðigetu og gæði.
Forsetinn Dr.Koroma bauð þá velkomna og þakkaði þeim fyrir að heimsækja landið hans á þessum erfiðu tímum.  Hann var glaður að heyra að sjóðurinn hefði unnið í landinu frá 2005 og tekið þannig þátt í uppbyggingunni og bætt þannig líf fjölmargra íbúa með stuðningi við menntun og nú einnig með spennandi fjárfestingaáætlunum.
Forsetinn sagði jafnframt að hann væri mjög hrifinn af nálgun sjóðsins á viðfangsefnum sem og  heildarsýn.  Hann sagði að sjóðurinn væri sá fyrsti til að blanda saman góðgerðum og viðskiptum sem mun geta leitt af sér sjálfbærni þe að viðskiptahlíðin muni styðja góðgerðahliðina sem á sama tíma mun hafa jákvæð áhrif á tekjur og viðskiptaþróun fólksins á staðnum.    Hann þakkaði fyrir það að Sierra Leone væri blessað með gjöfulum fiskimiðum og væru margir að vinna við þau en því miður ekki að uppskera mikið sem og að áhrif þessa á samfélagið væri ekki eins mikil og þau gætu orðið.  Hann endaði fundinn á því að óska sjóðnum alls hins besta í þeim verkefnum sem hann tekst á við og lofaði fullum stuðningi við þau.


Aurora gerir lánasamning við tvö örlánafyrirtæki í Freetown

Aurora velgerðarsjóður hefur gengið frá lánasamningum við tvö örlánafyrirtæki (microfinance) í Sierra Leone, Grassroot Gender Empowerment Movement (GGEM) og A Call to Business. Samningar þess efnis voru undirritaðir hinn 17. nóvember sl. í Freetown.

Ólafur Ólafsson stjórnarformaður Aurou velgerðarsjóðs sagði að þessu tilefni að markmið lánveitingarinnar sé að styðja við bakið á smærri fyrirtækjum og um leið auka veg hagþróunar í Sierra Leone. Samkvæmt samningunum fá fyrirtækin tvö hvort um sig 200.000 dollara lán með níu prósent vöxtum. Peningana munu þau endurlána til lítilla og meðalstórra fyrirtækja í Sierra Leone. Ólafur vonaðist til þess að lánafyrirgreiðslan leiði til bættra lífskjara í landinu.
David Kamara framkvæmdastjóri A Call to Business kvaðst eftir undirskriftina vera þakklátur fyrir aðkomu Auroru velgerðarsjóðs með þessum hætti, á sama tíma og flestir fjárfestar væru að hverfa frá landinu vegna Ebólu faraldursins. Hann sagði fyrirtæki sitt ánægt með frumkvæðið, enda hafi það verið í leit að aðila sem hefði áhuga á fjárfestingu í litlum og meðalstórum fyrirtækjum í Sierra Leone með sjálfbærni þeirra að leiðarljósi. Næg tækifæri byðust í landinu og væru míkrólán rétta leiðin í þessu samhengi að hans mati. Kamara hét því að A Call to Business myndi tryggja að fjármununum yrði ráðstafað með skynsamlegum hætti til góðra verkefna.

Michael Kamara framkvæmdastjóri GGEM segir örlán vera afar mikilvæg í efnahagsþróun allra landa. Þau geta stuðlað að aukinni framleiðni og um leið bætt lífskjör. Hann sagði að GGEM myndu lána peningana áfram til fyrirtækja með það fyrir sjónum að lánafyrirgreiðslan hámarki jákvæði áhrif á lífsskilyrði íbúa og hagkerfis Sierra Leone.
Framkvæmd lánasamninganna mun lúta ársfjórðungslegri eftirfylgni sem ráðgjafarfyrirtækið AYANI í Sierra Leone annast fyrir hönd Auroru velgjörðarsjóðs. AYANI mun fylgjast með því að framlögin verði nýtt á sem skynsamlegasta hátt.

Lítil og meðalstór fyrirtæki í Sierra Leone hafa átt undir högg að sækja undanfarin misseri vegna áhrifa Ebólu sjúkdómsins. Aðgengi þeirra að fjármálaþjónustu hefur þrengst verulega, sérstaklega að lánafyrirgreiðslu. Þau fyrirtæki sem hafa átt kost á lánum hafa boðist þau á óaðgengilegum kjörum. Aurora vill því með framtaki sínu bæta aðgengi þessara mikilvægu fyrirtækja að lánsfjármagni til uppbyggingar.


Aurora styrkir neyðaraðstoð vegna Ebólu í Sierra Leone

Stjórn Auroru hefur ákveðið að legga allt að 20 miljónir króna til neyðaraðstoðar í Sierra Leone vegna Ebólu faraldursins.  Peningurinn fer m.a. til kaupa á sjúkragögnum auk aðstoðar við að koma gögnunum á áfangastað, dreifa honum til viðkomandi sjúkrastofnana og fleira.  Hefur Aurora tekið höndum saman með breska flugfélaginu Hangar 8, sem sendi flugvél til Sierra Leone síðastliðinn fimmtudag, hlaðna ýmsum búnaði og lyfjum sem nauðsynleg eru til að meðhöndla sjúka.  Stjórnarformaður sjóðsins Ólafur Ólafsson fór sjálfur með flugvélinni til Sierra Leone og afhenti sjúkragögnin.  Á meðfylgjandi mynd má sjá Ólaf Ólafsson, Felix Juterzenka og Steve Schöni í drekkhlaðinni flugvélinni rétt fyrir flugtak.

Á annað þúsund manns hafa nú látist af völdum ebólunnar í Sierra Leone og allt að þúsund börn hafa misst annað eða báða foreldra sína.  Börnin búa við ömurlega aðstæður og eru mjög einangruð vegna hræðslu umhverfisins við smit.  Afleidd áhrif á innviði samfélagsins eru ekki síður alvarleg en faraldurinn hefur haft lamandi áhrif á menntun, heilsugæslu og atvinnulíf í landinu.

Aðeins 13 ár eru síðan að borgarastyrjöldnni lauk í Sierra Leone (1991-2002), þar sem talið er að yfir 50.000 manns hafi látið lífið. Stríðið var mjög mannskætt og eyðileggingin algjör en mest allir innviðir landsins eyðilögðust ásamt því að milljónir manna flúðu heimkynni sín og settust að sem flóttamenn í nágrannaríkjunum.  Að loknu stríði var Sierra Leone efst á lista yfir fátækustu lönd heims.  Á þessum árum sem liðin eru hefur samfélagið hægt og rólega verið að vinna sig út úr mjög brothættu ástandi fátæktar og sárrar neyðar.   Menn óttast að Ebólufaraldurinn nú geti haft skelfilegar afleiðingar fyrir framtíðar hagvöxt og hagsæld í landinu og ógni þeim stöðuleika sem náðst hefur.  Í ljósi þessa ákvað Aurora að leggja sitt af mörkum til neyðaraðstsoðar í Sierra Leone, en aðeins með samhæfðu átaki margra er hægt að stoppa útbreiðslu þessa skelfilega faraldurs.


Styrkur til UNICEF

Í dag var undirritaður nýr styrktarsamningur við UNICEF á Íslandi þar sem Aurora velgerðasjóður heldur áfram stuðningi við menntun og vernd barna í einu fátækasta ríki heims Sierra Leone í Afríku.
Á myndinni eru þau Stefán Ingi Stefánsson framkvæmdastjóri UNICEF á Íslandi og Auður Einarsdóttir framkvæmdastjóri Auroru velgerðasjóðs.

Styrkurinn mun stuðla að myndun 100 mæðraklúbba sem hafa reynst öflug leið til að koma fátækustu börnunum í Sierra Leone í skóla, halda gildi menntunar á lofti og stuðla að valdeflingu kvenna.

Síðastliðin ár hefur Aurora veitt umfangsmikinn stuðning við menntaverkefni Unicef í Sierra Leone sem einnig er unnið er í samstarfi við menntamálayfirvöld þar í landi.  Nú þegar hafa um 300 mæðraklúbbar verið stofnaðir í Kono héraði, en það hérað fór einna verst út úr stríðinu sem geysaði í landinu fyrir um 10 árum síðan.  Meðalfjöldi mæðra í klúbbunum eru um 40 en nemendafjöldinn sem klúbbarnir sinna eru um 230 sem þýðir að margfeldisáhrifin eru gríðarleg þar sem mæðraklúbbarnir hafa nú þegar náð til um 70.000 barna.   Með stofnun 100 mæðraklúbba til viðbótar má reikna með að innan tveggja ára verði talan komin í kringum 100.000 börn.

Verksvið mæðraklúbbana má skilgreina á eftirfarandi hátt:

Menntun:

Barnavernd:

Valdefling:

Efnahagsþróun:


„Hæg breytileg átt“ málþing í Iðnó

Líflegar umræður sköpuðust í opinni samræðu um áskoranir og tækifæri í íbúðaþróun sem verkefnið HÆG BREYTILEG ÁTT efndi til í Iðnó og Gasstöðinni við Hlemm laugardaginn 24. maí.

Í umræðunum mátti heyra fjölbreyttar hugleiðingar og sem dæmi lagði Eygló Harðardóttir félags- og húsnæðismálaráðherra áherslu á mikilvægi þess að skoða strax í upphafi verð íbúðarhúsnæðis og rekstrarform.
Jón Gnarr benti á að svokölluð græn verkefni væru ekki lengur gæluverkefni heldur lífsnauðsynleg. Hann taldi Skeifuna ágætt dæmi um hverfi sem hefði möguleika á að breytast í íbúðarhverfi og vitnaði í Einstein: “ Ef hugmynd er ekki absúrd í upphafi þá er hún einskins virði.“


Vorúthlutun Hönnunarsjóðs Auroru

Annað verkefni sem tengist arkitektúr er styrkur til útgáfu bókverks um arkitektinn Gunnlaug Halldórsson sem oft er nefndur sem fyrsti módernisti íslenskrar sjónlistasögu og auk þess – styrkur til hönnunar á námsgögum fyrir tungumálanám, styrkur til markaðssetningar á áhugaverðri nýjung sem eru módel úr fiskibeinum og styrkur til markaðssóknar hjá ungu hönnunarfyrirtæki sem hannar og selur barnafatnað og hefur skapað sér áhugaverða sérstöðu. Nýútskrifaður mastersnemi í textílhönnun fær styrk til starfsnáms hjá hönnunarfyrirtæki í Þýskalandi. Hönnunarsjóður Auroru heldur auk þessa áfram stuðningi við Hönnunarmiðstöð Íslands vegna uppbyggingar HönnunarMars hátíðarinnar og skrásetningu þess viðburðar.

HÆG BREYTILEG ÁTT (5.000.000) er verkefni á sviði byggða- og íbúðaþróunar þar sem lögð er áhersla á að fá fram hugmyndir sem varpa ljósi á vistvænni, samfélagsmeðvitaðri, hagkvæmari og framsæknari íbúðarkosti í íslensku þéttbýli í krafti hugmyndavettvangs, þar sem samvinna er í fyrirrúmi. Ráðin hafa verið fjögur þverfagleg teymi hönnuða, arkitekta, tæknimenntaðra einstaklinga og hugvísinda- og raunvísindafólks til að takast á við þetta mikilvæga verkefni. Samstarfsaðilar Hönnunarsjóðs Auroru í þessu verkefni eru Reykjavíkurborg, Samtök iðnaðarins, Félagsbústaðir, Búseti, Félagssofnun stúdenta, Upphaf fasteignafélag, Listaháskóli Íslands og Hönnunarmiðstöð Íslands. www.haegbreytilegatt.is

BÓKVERK UM GUNNLAUG HALLDÓRSSON ARKITEKT(1.200.000)
Styrkur veittur til lokafrágangs og undirbúnings útgáfu yfirlitsritsverks um ævi og verk Gunnlaugs Halldórssonar arkitekts. Útgefandi er Hið íslenska bókmenntafélag.
Höfundur, ritstjóri og ábyrgðarmaður er Pétur H. Ármannsson arkitekt. Stefnt er að útgáfu verksins nú í haust en í ár eru 105 ár liðin frá fæðingu Guðjóns. www.hib.is

ÍGLÓ&INDÍ (2.000.000)
Hönnunar og markaðsfyrirtækið Ígló&Indí fær styrk til þátttöku í vörusýningu og til að ráða sérfæðing vegna markaðsetningar vörumerkisins í Bretlandi. Vara fyrirtækisins er barnafatnaður sem hefur skapað sér sérstöðu með skemmtilegri notkun teikninga á fatnaðinn og við gerð heildar konsepts vörumerkisins.
Aðstandendur Ígló&Indí eru þær Helga Ólafsdóttir stofnandi fyrirtækisins, fatahönnuður og listrænn stjórnandi og Tinna Ólafsdóttir viðskiptafræðingur og framkvæmdastjóri fyrirtækisins. Höfundur myndskreytinga er Karítas Pálsdóttir grafískur hönnuður. www.igloandindi.com

AÐALBJÖRG ÞÓRÐARDÓTTIR og DÓSAVERKSMIÐJAN (500.000)
Aðalbjörg Þórðardóttir er grafískur hönnuður. Hún fær styrk til hönnunar á námsefni við kennslu íslensku fyrir útlendinga með sérstakri áherslu á gerð borðspils sem auk þess að nýtast við tungumálakennslu er ætlað að skemmta og fræða um menningu þjóða. Samstarfsaðili Aðalbjargar í verkefninu er tungumálaskólinn The Tin Can Factory eða Dósaverksmiðjan sem starfræktur er í Reykjavík. www.thetincanfactory.eu

HUGDETTA (2.000.000)
Fyrirtækið Hugdetta fær styrk til markaðsrannsókna og markaðssetningar vöru sinnar „Skepnusköpun“ sem eru fiskbeinamódel. Aðalhönnuður vörunnar er Róshildur Jónsdóttir vöruhönnuður sem jafnframt er annar eigandi fyrirtækisins Hugdettu en fyrirtækið á Róshildur með manni sínum Snæbirni Stefánssyni vöruhönnuði. Fiskbein sem áður voru urðuð eru nú orðin að áhugaverðri afurð tilbúinni til fjöldaframleiðslu á Íslandi og framundan er ítarleg markaðsrannsókn á möguleikum vörunnar á alþjóða markaði. www.hugdetta.com

UNA BALDVINSDÓTTIR (500.000)
Una Baldvinsdóttir sem hefur nýlokið mastersnámi í textílhönnun fær styrk til stafsnáms hjá þýska hönnunarfyrirtækinu BLESS sem er framsækið hönnunarfyrirtæki og hannar bæði fatnað og margs konar húsbúnað.

HÖNNUNARMIÐSTÖÐ ÍSLANDS (1.000.000)
Hönnunarmiðstöð Íslands fær styrk til uppbyggingar HönnunarMars hátíðarinnar, meðal annars til heimildaöflunar og skrásetningar efnis fyrir gerð kynningarmyndar um hátíðina. www.honnunarmidstod.is


Kraumur úthlutar 7.3 milljónum

Í dag var tilkynnt hvaða verkefni Kraumur tónlistarsjóður styrkir í fyrri úthlutun sinni 2014. Stuðningur Kraums tónlistarsjóðs við íslenskt tónlistarlíf heldur áfram af miklum krafti á þessu sjöunda starfsári sjóðsins en það var árið 2008 sem hann tók til starfa. Opið var fyrir umsóknir í febrúar og 131 umsókn barst sjóðnum sem er sjálfstætt starfandi afl í íslensku tónlistarlandslagi. Flestar umsóknirnar tengdust lifandi flutning á tónlist, tónleikaferðum, hátíðum og kynningu á nýju efni umsækjanda. Næst á eftir komu umsóknir sem höfðu með útgáfu og upptökur á nýjum hljóðritum að gera.
Það eru 13 fjölbreytt verkefni sem hljóta stuðning sem öll eiga það sameiginlegt að vera metnaðarfull og margbreytileg. Þetta eru verkefni sem endurspegla þann mikla kraft og sköpunargleði sem einkennir íslenska tónlist og tónlistarfólk.
Það er engum blöðum um það að fletta að íslensk tónlist er frumleg, framsækin og eftirsóknarverð. Tónlist frá Íslandi vekur athygli og gætir áhrifa hennar víða en til að svo megi vera áfram þarf að styrkja og styðja við bakið á þeim sem leggja allt í sölurnar og eru að koma sér og verkum sínum á framfæri af mikilli þrautseigju. Kraumur tónlistarsjóður leggur áherslu á að styðja af krafti og myndugleika við framgang tónlistarfólks hvort sem það er hér heima eða erlendis og vill með starfi sínu hlúa vel að grasrótinni og efla tónlistarlíf á sem fjölbreyttastan hátt með beinum styrkjum og faglegri ráðgjöf.
Sjóðnum bárust 131 umsókn og því var alltaf ljóst að Kraumur gæti aðeins stutt við hluta þeirra verkefna sem sótt var um stuðning fyrir enda er það stefna sjóðsins að styrkja fá verkefni en gera það á afgerandi hátt.
Hæsta styrk Kraums í ár hlýtur hljómsveitin Mono Town en hún hefur verið að gera garðinn frægan síðustu misserin. Sveitin hefur m.a. hitað upp fyrir hina goðsagnakenndu sveit The Pixies á tónleikaferð þeirra um Norðurlöndin og svo náði Mono Town einstökum árangri með útgáfu sinnar fyrstu breiðskífu, In The Eye of the Storm, í samvinnu við tónlistarveituna Deezer. Mono Town mun nýta sér styrkinn til að kynna plötuna með öflugum hætti en einnig til að standa straum af kostnaði vegna fyrirhugaðra tónleikaferða.
Þungarokksveitirnar Sólstafir og Kontinuum fá styrk vegna tónleikaferða þeirra um Evrópu en báðar sveitirnar gefa út nýjar breiðskífur á árinu, starfa með erlendum útgefendum og eiga sér dygga aðdáendur víðsvegar um heiminn. Kontinuum fær það hlutverk að hita upp fyrir Sólstafi á hluta ferðarinnar en Sólstafir sigla nokkra túra í ár undir sínum eigin fána sem aðalband (e. Headliner).
Nordic Affect hlýtur stuðning til að taka þátt í þremur virtum tónlistarhátíðum í Evrópu næsta haust en á svipuðum tíma kemur út nýr diskur þar sem sveitin leikur tónlist eftir íslensk kvennatónskáld. Markmið ferðarinnar er að kynna hópinn og nýjan disk fyrir erlendum hlustendum samtímatónlistar og ná að skapa sér nafn.
Möller Records er íslensk raftónlistarútgáfa sem fær styrk frá Kraumi til að ferðast vítt og breitt um landið í sumar og kynna margbreytilega og hugvíkkandi raftónlist fyrir landsmönnum. Með í för verða Futuregrapher, en Árni Grétar er jafnframt verkefnastjóri, Skurken, EinarIndra, bistro boy og fleiri vinir og velunnarar Möller. Eitt er víst að þetta verður rafmönguð tónleikainnrás sem kemur fólki í réttan gír.
Kraumur og Eistnaflug taka höndum saman og standa fyrir PR-námskeiði og fjölmiðlakynningu en þessi magnaða rokkshátíð fer fram í 10. sinn dagana 9. til 13. júlí á Neskaupstað.
Meðal annarra styrkþega eru Agent Fresco og Ragnheiður Gröndal sem stefna á Evrópu, Grísalappalísa og DJ Flugvél og Geimskip sem ætla að tæta og trylla á Íslandi, Cell7 sem fer með hljómsveit um landið, Rökkurró, Ólafur Björn Ólafsson og Gyða Valtýsdóttir sem kynna nýjar útgáfur sínar.
Sjötta árið í röð á Kraumur í samstafi við ísfirsku tónlistarhátíðina Aldrei fór ég suður. Á hátíðinni standa AFÉS og Kraumur fyrir poppfræðslurokkgreiningarfundi. Líkt og áður er reynt að kryfja ýmis mál sem tengjast tónlistargeiranum og síbreytilegu umhverfi hans en ávallt er reynt að hafa umræðuna skemmtilega. Allir eru velkomnir og er aðgangur ókeypis en umræðurnar eru ávallt fjölbreyttar og oftar en ekki árangursríkar.
ÚTHLUTUN 2014
ÖNNUR VERKEFNI KRAUMS 2014- Kraumslistinn í desember og Hljóðverssmiðjur Kraums í vor sem fela í sér fræðslu og handleiðslu í samstarfi við Músíktilraunir og þær hljómsveitir sem skipa fyrstu þrjú sætin í ár. Stefnan er að úthluta á ný seinna á árinu en tilkynnt verður um nýtt umsóknarferli með vorinu.
Frá stofnun Kraums hefur Aurora velgerðarsjóður lagt sjóðnum til 140 milljónir. Stjórn Auroru velgerðasjóðs hefur síðan 2007 úthlutað til verkefna á sviði mannúðar, mennta og menningar hérlendis og í Afríkuríkjunum Síerra Leóne og Mósambík svo fátt eitt sé nefnt.
______
Megintilgangur Kraums er að stuðla að og styrkja íslenskt tónlistarlíf, fyrst og fremst með stuðningi við unga tónlistarmenn. Yfirlýst stefna sjóðsins er að styrkja tiltölulega fá verkefni/listamenn, en gera það þannig að stuðningurinn sé afgerandi. Verkefnaval Kraums tekur mið að því að styrkir til listamanna og verkefna eru í flesta staði hærri og veglegri og þar af leiðandi færri yfir heildina.
Kraumur tónlistarsjóður, sem var stofnaður í byrjun árs 2008 af Aurora velgerðarsjóði, hefur það meginhlutverk að efla íslenskt tónlistarlíf – fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Markmið Kraums er að styrkja stöðu tónlistarmanna á Íslandi með beinum styrkjum, aðstoð og samstarfi af ýmsu tagi. Kraumur vill styðja við og ýta undir nýsköpun og metnað á tónlistarsviðinu.
Frá því Kraumur hóf starfsemi sína hafa yfir eitthundrað listamenn, hljómsveitir og tónlistartengd verkefni hlotið stuðning frá sjóðnum, þar á meðal eru adhd, amiina, Anna Þorvaldsdóttir, Bang Gang, Bloodgroup, Celestine, Daníel Bjarnason, Dikta, Elfa Rún Kristinsdóttir, Extreme Chill Festival, Hjaltalín, Kammerkór Suðurlands, Lay Low, Melkorka Ólafsdóttir, Moses Hightower, Mr. Silla, Mugison, Nordic Affect, Of Monsters and Men, Ólöf Arnalds, Retro Stefson, Skálmöld, Skúli Sverrisson og Óskar Guðjónsson, Sóley, Sólstafir, Sónar Reykjavík, Seabear, Snorri Helgason, Stelpur Rokka!, Trúbatrix hópurinn og Víkingur Heiðar Ólafsson. Kraumur hefur einnig haldið úti samstarfsverkefnum með Músíktilraunum Tónabæjar, Listahátíð í Reykjavík, Aldrei fór ég suður, Eistnaflug, ÚTÓN/IMX og fleiri aðilum.


Lokaskýrslur frá Unicef eftir lok fimm ára verkefnis í Sierra Leone

Stærsta og veigamesta verkefni sem Aurora hefur farið í er fimm ára menntaverkefni í Afríkuríkinu Sierra Leone unnið í samvinnu við Unicef á Íslandi og Unicef í Sierra Leone.  Verkefnið gekk út á það að byggja upp barnvænt menntakerfi og skólahúsnæði einkum með þarfir stúlkubarna í huga.  Aurora ráðstafaði rúmlega 200 milljónum króna til verkefnisins.
Lokaskýrslurnar má nálgast inná verkefni / Sierra Leone hér á heimasíðunni.
Fulltrúar Auroru og Unicef fóru í ferð til Sierra Leone og má sjá myndir úr þeirri ferð á myndasíðunni.

Ef litið er yfir verkefnið þá hafa rúmlega 60 skólar verið byggðir í fimm héruðum en byrjað var í fátækustu héruðunum  Skólarnir voru allir búnir skólahúsgögnum ásamt kynjaskiptum salernum sem er einn af lykilþáttum þess að tryggja öryggi stúlkna í skólunum.  Vatnsdælum var komið fyrir í hverjum skóla en það er gert til að tryggja nemendum aðgengi að hreinu vatni.  Yfir 100 kennarar hafa hlotið þjálfun í kennsluaðferðum og réttindum barna en því miður er ofbeldi gagnvart börnum í skólum algengt.    Eins hefur mikilvægi menntunar verið rætt innan samfélaganna og í framhaldi af því verið stofnaðar skólanefndir og mæðraklúbbar.  (Myndin hér að ofan er tekin úr skólastofu í Kono héraði)

Mæðraklúbbar hafa reynst öflug og óvenjuleg leið til að koma fátækustu börnunum í Síerra Leóne í skóla, halda gildi menntunar á lofti, haft jákvæð áhrif á vernd barna gegn ofbeldi, styðja við nemendur úr berskjölduðum fjölskyldum.  Auk alls þessa stuðla mæðraklúbbarnir að valdeflingu kvenna en þær fá þjálfun í að skipuleggja félagsstarfsemi, halda fundargerðir og skipulagt bókhald.  Mæðraklúbbarnir styðja síðan við almenna þróun samfélagsins bæði efnahagslega og félagslega en þeir eru hugsanlega góð leið til að auka virðingu kvenna gagnvart karlmönnum ásamt því að konurnar finna hversu sterkar þær eru ef þær standa saman.  (Á myndinni hér að ofan má sjá fulltrúa Auroru ásamt mæðraklúbbi í Kono héraði)

Alls hefur 296 mæðraklúbbum nú þegar verið komið á fót í Kono-héraði og er meðalfjöldi kvenna í hverjum mæðraklúbb í kringum 40 konur en meðalnemendafjöldi í skólunum sem mæðraklúbbarnir sjá um er um 235 börn. Margfeldisáhrifin af starfi mæðraklúbbana eru því mikil og má reikna það út að mæðraklúbbar í Síerra Leóne hafa þegar náð utan um 70.000 börn. (Á mynd er mæðraklúbbur á fundi með fulltrúum Aurora og Unicef)

Það er því alveg ljóst að verkefnið hefur skilað börnum í Sierra Leóne aðgengi að menntun sem þau annars hefðu ekki átt kost á og er merkjanleg 9% aukning í skólasókn og 11% fleiri kennarar sem hlotið hafa þjálfun í Kono héraði á tímabilinu.

Fulltrúar Auroru velgerðasjóðs ásamt fulltrúum Unicef á Íslandi fóru í ferð til Sierra Leone á vormánuðum 2013 til að sjá með eigin augum hversu mikið hefur áunnist með verkefninu.   Myndir úr þeirri ferð má sjá inná myndasíðunni en albúmið heitir Sierra Leone 2013


Kraumslistinn kynntur í sjötta sinn!

Á Kraumslistanum í ár er að finna sjö framúrskarandi plötur frá metnaðarfullu tónlistarfólki. Tónlistarárið 2013 var fjölbreytt og spennandi og allar þær útgáfur sem fengu tilnefningu á Úrvalslista Kraums bera þess merki að unnið hefur verið að þeim af alúð og mikið verið í þær lagt. Hér er að finna vönduð verk eftir hugmyndaríkt, áræðið og umfram allt framúrskarandi listamenn.
Það var ekki auðvelt verkefni að gera upp á milli allra þeirra góðu platna sem skipuðu Úrvalslistann og komu út á árinu enda enginn vafi á því að tónlistarárið 2013 var gott og mikill kraftur í íslensku tónlistarfólki. Plöturnar sjö sem skáru framúr og skipa Kraumslistann eiga það sameiginlegt að vera frumlegar, spennandi og fjölbreyttar en Kraumur mun leggja sitt af mörkum á komandi ári við að kynna þessi verk fyrir erlendum fjölmiðlum og fólki sem starfar innan tónlistargeirans.
Árni Matthíasson, formaður dómnefndar, tilkynnti niðurstöðu um val verðlaunaplatna sem eru í ár sjö talsins. Afhending verðlaunanna fór fram í húsnæði Kraums tónlistarsjóðs að Vonarstræti 4b að viðstöddum hópi gesta.
Kraumslistinn 2013 – Verðlaunaplötur (listinn er birtur í stafrófsröð)
Cell7 – Cellf

Dj. flugvél og geimskip – Glamúr í geimnum
Grísalappalísa – Ali
Gunnar Andreas Kristinsson – Patterns
Just Another Snake Cult – Cupid Makes A Fool of Me
Mammút – Komdu til mín svarta systir
Sin Fang – Flowers
______
Kraumslistinn haldinn í sjötta skiptið
Kraumslistanum er ætlað að styðja við plötuútgáfu íslenskra hljómsveita og listamanna – með því að styðja og vekja sérstaka athygli á því sem er nýtt og spennandi – og þeim verkum sem skara fram úr í gæðum, metnaði og frumleika. Kraumslistinn er ekki bundinn neinni ákveðinni tónlistarstefnu og honum fylgja engir undirflokkar. Það er von aðstandenda Kraumslistans að valið veki athygli á flottri og fjölbreyttri íslenskri plötuútgáfu, þegar jólagjafaflóðið er við það að skella á, og listamenn reiða sig hvað mest á plötusölu.
Verðlaun
Kraumur leggur upp með að styðja alla þá titla sem valdir eru á Kraumslistann og vekja á þeim jafna athygli frekar en að einblína á eina einstaka verðlaunaplötu.  Sjóðurinn mun styðja við Kraumslistaplöturnar og jafnframt auka við möguleika listamannanna á bakvið þær til að koma verkum sínum á framfæri erlendis með því að kaupa ákveðinn fjölda af plötunum og dreifa þeim til ýmissa starfsmanna tónlistarbransans erlendis (tónlistarhátíðir, plötuútgáfur, umboðsskrifstofur, fjölmiðla o.s.frv.).
Tuttugu manns áttu sæti í dómnefnd Kraumslistans 2013:
Andrea Jónsdóttir, Anna Andersen, Arnar Eggert Thoroddsen, Árni Matthíasson, Benedikt Reynisson, Bob Cluness, Egill Harðarson, Elísabet Indra Ragnarsdóttir, Guðni Tómasson, Haukur Viðar Alfreðsson, Helena Þrastardóttir, Helga Vala Helgadóttir, Helga Þórey Jónsdóttir, Höskuldur Daði Magnússon, María Lilja Þrastardóttir, Ólafur Halldór Ólafsson (Óli Dóri), Ragnheiður Eiríksdóttir, Trausti Júlíusson, Valdís Thor og Þórunn Edda Magnúsdóttir.
Markmið Kraumslistans
Kraumslistinn var settur á fót í þeim tilgangi að kynna og styðja við plötuútgáfu íslenskra hljómsveita og listamanna – Markmið Kraumslistans:


Ellefta úthlutun Hönnunarsjóðs Auroru

Að þessu sinni bárust sjóðnum 70 umsóknir af öllum sviðum hönnunar.  Sérstök áhersla er lögð á arkitektúr að þessu sinni, þar sem verkefnið HÆG BREYTILEG ÁTT sem Hönnunarsjóður Auroru hefur verið með í undirbúningi og kynnt var á viðburði á HönnunarMars í vor fær sérstakan stuðning.
HÆG BREYTILEG ÁTT er verkefni á sviði byggða- og íbúðaþróunar þar sem lögð verður áhersla á að fá fram hugmyndir sem varpa ljósi á vistvænni, samfélagsmeðvitaðri, ódýrari og framsæknari íbúðarkosti í íslensku þéttbýli í krafti hugmyndavettvangs, þar sem samvinna verður í fyrirrúmi. Auglýst verður eftir þátttakendum á næstu dögum og mynduð verða þverfagleg teymi hönnuða, arkitekta, tæknimenntaðra einstaklinga, hugvísinda- og raunvísindafólks til að takast á við þetta mikilvæga verkefni. Samstarfaðilar Hönnunarsjóðs Auroru í þessu verkefni eru Reykjavíkurborg, Samtök iðnaðarins og Hönnunarmiðstöð.

Auk úthlutunar til verkefnisins HÆG BREYTILEG ÁTT er úthlutað til fimm annarra verkefna. Þau eru bókverk á sviði arkitektúrs, verkefnis um þrívíða sköpun og tækni, verkefni á sviði fatahönnunar og tveir nýútskifaðir hönnuðir fá styrk til starfsnáms erlendis:

REYKJAVÍK EINS OG HÚN HEFÐI GETAÐ ORÐIÐ, bókverk (1 milljón) Guðni Valberg arkitekt og Anna Dröfn Ágústsdóttir sagnfræðingur, fá framhaldsstyrk í rannsóknar- og hönnunarverkefni vegna undirbúnings að gerð bókar um sögu hönnunar og staðarvals margra helstu bygginga í Reykjavíkurborg.

Verkefnið Í ÞÍNAR HENDUR – þrívíð sköpun og tækni (1.4 milljón) Verkefnið “Í ÞÍNAR HENDUR – þrívið sköpun og tækni” er lifandi þverfagleg vinnustofa listamanna, hönnuðu, tölvunarfræðinga og verkfræðinga þar sem könnuð verður sú bylting í framleiðsluferlinu sem þrívíð prenttækni kann að leiða til. Það er fyrirtækið StudioBility og Listhátíð í Reykjavík sem eru frumkvöðlar og ábyrgðaraðilar þessa verkefnis en aðrir samstarfsaðilar auk Hönnunarsjóðs Auroru eru Listaháskóli Íslands og Háskólinn í Reykjavík.

Jör by Guðmundur Jörundsson (2 milljónir) Fyrirtækið Jör by Guðmundur Jörundsson fær styrk til vöruþróunar og prótótýpugerðar vegna haust og vetrarlínu fyrirtækisins 2014.

Klara Arnaldsdóttir (500 þúsund) Klara Arnaldsdóttir lauk BA í grafískri hönnun frá Listaháskóla Íslands vorið 2012. Klara fær styrk til til starfsnáms hjá fyrirtækinu karlssonwilker í New York þar sem hún verður undir handleiðslu grafisku hönnuðanna Hjalta Karlssonar og Jan Wilker. http://klaraarnalds.prosite.com

Guðrún Harðardóttir (500 þúsund) Guðrún Harðardóttir lauk BA í vöruhönnun frá Listaháskóla Íslands vorið 2012. Guðrún fær styrk til starfsnáms hjá Statens Værksteder for Kunst í Kaupmannahöfn.


Umsóknarfrestur til 1.desember

Aurora velgerðasjóður er með opið fyrir umsóknir til 1.desember en úthlutað verður í byrjun árs 2014.   Tekið er á móti umsóknum í prentformi á heimilisfang sjóðsins Vonarstræti 4b og í tölvupósti á netfangið ae@aurorafund.is.  Allar nánari upplýsingar veitir framkvæmdastjóri sjóðsins Auður Einarsdóttir.


Vorúthlutun Hönnunarsjóðs Auroru

Níu verkefni fengu úthlutað 9,6 milljónum króna í 10. úthlutun Hönnunarsjóðs Auroru.  Verkefnin sem hlutu styrk eru af margvíslegum og ólíkum toga. Má þar nefna þróun þarabaða þar sem umsækjendur stefna að því að setja upp tilraunaverkefni í Gróttu á Seltjarnarnesi í sumar, handritsgerð og hönnun bókverks fyrir spjaldtölvur sem byggir á ævintýrinu um Búkollu, vöruþróun á matarstelli á leirkeraverkstæði í Reykjavík og gerð kennslumyndbands um möguleika í þróun prjónsins.

Að þessu sinni bárust sjóðnum rúmlega 60 umsóknir af öllum sviðum hönnunar. Umsóknirnar báru þess merki að mikil gróska og framþróun er að eiga sér stað í verkefnum hönnuða á Íslandi.

Hjá sjóðnum er lögð áhersla á að styðja verkefni þar sem umsækjendur hafa skýra sýn og markmið. Í auknum mæli er farið að meta umsóknir út frá sjálfbærni og samfélagslegum gildum.

Á bak við fyrirtækið SLÍJM SF standa þær Kristín Gunnarsdóttir fata- og textílhönnuður sem einnig hefur lagt stund á nám í heimspeki og Edda Kristín Sigurjónsdóttir sem er hönnuður og lagði í námi sínu áherslu á samspil mannlegrar hegðunar og umhverfis. Þær fá styrk til að undirbúa og framkvæma mannfélagslegt rannsóknarverkefni sem byggir á tilraunum með samtalsvettvang og ólíkum leiðum í menningarlegri þróun samfélags. Þær munu í þeim tilgangi setja á fót Slíjm- þaraböð sem opin verða almenningi í Gróttu í sumar og einnig standa fyrir Slíjm-salonkvöldum innblásnum af Salonmenningu fyrri tíma.
facebook.com/Slijm ‎

Siggi Eggerts (1.5 milljón)
Siggi Eggerts hönnuður og listamaður, fær styrk til vinnu við gerð gagnvirks bókverks byggða á ævintýrinu um Búkollu.
siggieggertsson.com

Postulína (1 milljón)
Guðbjörg Káradóttir keramikhönnuður og Ólöf Jakobína Ernudóttir innanhússarkitekt, fá styrk til hönnunar, þróunar og undirbúnings framleiðslu á matarstelli sem til stendur að framleiða á leirkeraverkstæði þeirra í Reykjavík.
gudbjorgkaradottir.com
olofjakobinadesign.blogspot.com

STEINUNN SIGURD ehf (1.5 milljón)
Steinunn Sigurðardóttir fatahönnuður, fær styrk til áframhaldandi þróunar á prjóna-vinnustofu og gerð myndbands um möguleika í þróun prjóns. Vinnustofan eykur skilning fólks á menningarlegu og listrænu gildi prjóns.
steinunn.com

Halldóra Arnardóttir (1.2 milljón)
Halldóra Arnardóttir er doktor í listfræði með sérþekkingu á hönnun og byggingarlist og meðeigandi teiknistofunnar SARQ arkitektar á Spáni. Halldóra fær styrk til rannsóknar- og hönnunarverkefnis vegna undirbúnings og gerð bókar um verk og hugmyndir Kristínar Guðmundsdóttur, fyrsta hýbýlafræðings landsins.
sarq.org

Barnafatalínan AS WE GROW (1 milljón)
Margrét Hlöðversdóttir lögfræðingur og fata- og textílhönnuðirnir Guðrún Ragna Sigurjónsdóttir og María Th. Ólafsdóttir, fá styrk til markaðssetningar erlendis á barnafatalínunni As We Grow.
aswegrow.is

FÍLA (400 þúsund)
Félag íslenskra landslagsarkitekta, fær styrk til uppbyggingar og þróunar gagnagrunns en félagið hefur hleypt af stokkunum heimasíðunni xland.is með samantekt um markverða umhverfishönnun sem landslagsarkitektar hafa unnið á höfuðborgarsvæðinu.
xland.is

Sunna Örlygsdóttir (500 þúsund)
Sunna Örlygsdóttir fatahönnuður, fær styrk til starfsnáms hjá fyrirtækinu MariaLux í Amsterdam þar sem hún verður undir handleiðslu hönnuðarins Lilian Driessen.
orlygsdottir.com

Hönnunarmiðstöð (1 milljón)
Hönnunarmiðstöð Íslands fær styrk til skrásetningar og gerð kynningarefnis um HönnunarMars hátíðina meðal annars til heimildavinnu, myndatöku og skrásetningu fyrir gerð kynningarmyndar um hátíðina.
honnunarmidstod.is ‎

Stefnt er að því að næsta úthlutun úr sjóðnum verði í október og er umsóknarfrestur til 15. september 2013.

Hönnunarsjóður Auroru vinnur að undirbúningi nýs verkefnis sem stefnt er að hleypa af stokkunum á næstu misserum. Verkefnið, sem er á sviði byggða og íbúðaþróunar, var kynnt í Hannesarholti á HönnunarMars 2013 undir heitinu HÆG BREYTILEG ÁTT.


Sjötta úthlutun Aurora velgerðasjóðs

Að þessu sinni er um fyrri úthlutun sjóðsins að ræða en úthlutað verður aftur seinna á árinu og þá einungis til þróunarverkefna.  48.3 milljónum er úthlutað til fimm verkefna á sviði mannúðar, mennta og menningar hérlendis og í Afríkuríkinu Kenya í samstarfi við ABC hjálparstarf.

Ný verkefni:
Áframhaldandi verkefni:
ABC hjálparstarf í Kenya:
ABC barnahjálp er íslenskt hjálparstarf sem var stofnað árið 1988 og starfar nú í 8 löndum í Asíu og Afríku.  Starfið snýst um að veita fátækum börnum varanlega hjálp í formi menntunar, framfærslu og heilsugæslu.   ABC barnahjálp í Kenya var stofnað í Nairóbí árið 2006 og starfa í dag um 69 starfsmenn þar en Þórunn Lusiru og Samuel Lusiru Gona eru forstöðumenn starfsins. Um 400 nemendur sækja skólann sem ABC rekur en um 200 börn búa á heimavistinni hjá þeim.  Aurora velgerðasjóður mun styrkja starfið um 1.8 milljónir króna sem fara í kaup á nauðsynjum fyrir heimavistina.

Vinafélag Vinjar, athvarfs geðfatlaðra við Hverfisgötu
Árið 2009 styrkti Aurora velgerðasjóður Rauða kross Íslands um 20 milljónir króna til þriggja verkefna og þar af eitt verkefnið Vin, athvarf Rauða Kross Íslands fyrir fólk með geðraskanir.   Vinafélag Vinjar var stofnað árið 2011 til að tryggja framtíð Vinjar þar sem Rauði Krossinn huggðist loka vegna fjárskorts.  Árið 2012 var gerður samningur milli Reykjavíkurborgar, Velferðarráðuneytisins, Rauða Krossins og Vinafélags Vinjar til að tryggja starfsemi Vinjar til þriggja ára,   Vinafélagið skuldbatt sig til að leggja fram hluta af rekstrarfénu og mun Aurora velgerðasjóður þannig endurnýja stuðning sinn við Vin með því að leggja Vinafélaginu til  1.milljón króna á ári til þriggja ára.

Töfraflautan fyrir börn
Útgáfa barnabókarinnar um Töfraflautuna e.Mozart með hljóðdiski verður fyrsta barnaóperan sem gefin verður út á íslensku í hljóði ásamt myndskreyttri barnabók.  Þessi fræga ævintýraópera höfðar ákaflega vel til barna og hefur því mikið verið notuð erlendis til að kynna óperur fyrir börnum.  Á Íslandi hefur fræðsla barna um óperur því miður verið mjög takmörkuð.  Hugmyndin er að nýta útgáfuna við tónmenntakennslu sem og setja hana upp í samstarfi við Töfrahurðina í Salnum og mögulega í Menningarhúsinu Hofi í framhaldinu.  Að útgáfunni standa Edda Austmann, Pamela De Sensi og Halla Þórlau Óskarsdóttir.  Aurora velgerðasjóður styrkir útgáfu Töfraflautunnar e.Mozart fyrir börn um 500 þúsund.


Kraumur úthlutar 10 milljónum

Kraumur tónlistarsjóður úthlutar í dag 10.4 milljónum til listamanna og verkefna sem eiga sér stað hér heima og að heiman árið 2013. Rúmlega tíu milljónum króna er varið til 16 verkefna á sviði innrásar og útrásar íslenskrar tónlistar en einnig er stuðlað að námskeiðum og fræðslu. Hæsta styrkinn í ár hlýtur Anna Þorvaldsdóttir tónskáld, eða tvær milljónir króna. Nánar um úthlutnina má sjá á vef Kraums tónlistarsjóðs.


Hæg breytileg átt er nýtt verkefni Hönnunarsjóðs Auroru

Hönnunarsjóður Auroru kynnti á HönnunarMars nýtt verkefni á sviði byggða- og íbúðaþróunar.   Hugmyndin er að efna til hugmyndavettvangs, þar sem einblínt verður á að vinna þverfaglega og gefa ungum hönnuðum, arkitektum, tæknimenntuðum einstaklingum og hugvísinda- og raunvísindafólki tækifæri til að mynda þverfagleg teymi til að leysa húsnæðisþraut framtíðarinnar.  Verkefnið er í mótun og hefur Hönnunarmiðstöð, fulltrúar Reykjavíkurborgar og Samtaka Iðnaðarins lýst sig reyðubúna til samstarfs.  Auglýst verður eftir þátttakendum í verkefnið á næstunni og það kynnt nánar.  Sjá nánar á heimasíðu Hönnunarsjóðs Auroru


Kraumur umsóknarferli 2013

Kraumur tónlistarsjóður auglýsir eftir umsóknum fyrir verkefni á sviði íslenskrar tónlistar sem ráðgert er að eigi sér stað árið 2013. Auglýst er sérstaklega eftir verkefnum sem ekki eru hafin áður en úthlutað er úr sjóðnum. Úthlutað verður um miðjan mars.
Ráðgert er að veita í kringum 8 milljónum króna til verkefna á sviði íslenskrar tónlistar að þessu sinni.
Tónlistarmenn og hljómsveitir úr öllum geirum tónlistar eru hvattir til að sækja um fyrir sín verkefni. Umsóknarferlið er einnig opið fyrir viðburði, námskeið og fræðsluverkefni.

Umsækjendum er bent á að kynna sér markmið og samþykktir sjóðsins og ráð til umsækjenda hér að neðan.
Opnað verður fyrir umsóknarferlið þann 5. janúar.
Kraumur notast ekki við umsóknareyðublöð en allar umsóknir skulu innihalda:
Fjárhagsáætlun skal innihalda yfirlit yfir alla þekkta innkomuliði og útgjöld. Auk þess útlistun á því hvernig stuðningur Kraums getur nýst. Vinsamlegast takið fram ef sótt er um styrki í aðra sjóði eða verkefnið nýtur stuðnings annarstaðar frá.
Umsóknarfrestur er til 4. febrúar 2013
(Póststimpill gildir, og því hægt að setja umsóknina í póst mánudaginn 4. febrúar)
Framkvæmdastjóri Kraums veitir fúslega upplýsingar um umsóknarferlið og er umsækjendum innan handar er varðar ráðgjöf við að skila inn umsókn. Skoðið einnig ráð til umsækjenda hér að neðan.
Skil á umsóknum – Umsóknir skulu sendar:
Kraumur tónlistarsjóður
PO Box 124
121 Reykjavík

Frekari upplýsingar veitir:
Jóhann Ágúst Jóhannsson, framkvæmdastjóri Kraums
S: 894 4321 / johann[a]kraumur.is


Kraumslistinn valinn í fimmta sinn

Kraumslistinn 2012, árleg plötuverðlaun Kraums tónlistarsjóðs, var kynntur í dag.
Á Kraumslistanum er að finna sex plötur sem allar bera þess merki að mikið hefur verið í þær lagt. Hér er að finna vönduð verk eftir leitandi, framsækið og umfram allt framúrskarandi tónlistarfólk.
Plöturnar sem skáru framúr í ár og skipa listann eiga það sameiginlegt að vera frumlegar, spennandi og afar metnaðarfullar en 20 plötur voru tilnefndar til verðlaunanna og skipuðu Úrvalslista Kraums. Það var ekki auðvelt verkefni að gera upp á milli allra þeirra góðu platna sem skipuðu Úrvalslistann og komu út á árinu. Það liggur enginn vafi á því að tónlistarárið 2012 var gjöfult og gott og ekki er annað að sjá en að framtíðin sé björt fyrir íslenska tónlist. Hljómar vissulega eins og klisja en það er bara ekki annað hægt að segja því staðan er þannig.
Árni Matthíasson, formaður dómnefndar, tilkynnti niðurstöðu um val verðlaunaplatna sem líkt og síðustu tvö ár eru sex talsins. Afhending verðlaunanna fór fram í húsnæði Kraums tónlistarsjóðs að Vonarstræti 4b að viðstöddum hópi gesta.
Kraumslistinn 2012 – Verðlaunaplötur
______
Kraumslistinn haldinn í fimmta skiptið
Kraumslistanum (stundum kölluð Kraumsverðlaun) er ætlað að styðja við plötuútgáfu íslenskra hljómsveita og listamanna – með því að styðja og vekja sérstaka athygli á því sem er nýtt og spennandi – og þeim verkum sem skara fram úr í gæðum, metnaði og frumleika. Kraumslistinn er ekki bundinn neinni ákveðinni tónlistarstefnu og honum fylgja engir undirflokkar. Það er von aðstandenda Kraumslistans að valið veki athygli á flottri og fjölbreyttri íslenskri plötuútgáfu, þegar jólagjafaflóðið er við það að skella á, og listamenn reiða sig hvað mest á plötusölu.
Verðlaun
Kraumur leggur upp með að styðja alla þá titla sem valdir eru á Kraumslistann og vekja á þeim jafna athygli frekar en að einblína á eina einstaka verðlaunaplötu.  Sjóðurinn mun styðja við Kraumslistaplöturnar og jafnframt auka við möguleika listamannanna á bakvið þær til að koma verkum sínum á framfæri erlendis með því að kaupa ákveðinn fjölda af plötunum og dreifa þeim til ýmissa starfsmanna tónlistarbransans erlendis (tónlistarhátíðir, plötuútgáfur, umboðsskrifstofur o.s.frv.).
Tuttugu og einn tók þátt Í dómnefnd Kraumslistans 2012 en þar sátu:
Alexandra Kjeld, Andrea Jónsdóttir, Anna Andersen, Arnar Eggert Thoroddsen, Arndís Björk Ásgeirsdóttir, Árni Matthíasson, Ása Dýradóttir, Benedikt Reynisson, , Egill Harðarson, Elísabet Indra Ragnarsdóttir, Guðni Tómasson, Haukur S. Magnússon, Helena Þrastardóttir, Helga Vala Helgadóttir, Hildur Maral Hamíðsdóttir, Höskuldur Daði Magnússon, Kamilla Ingibergsdóttir, Ólafur Halldór Ólafsson, Ólafur Páll Gunnarsson, Sólrún Sumarliðadóttir, og Trausti Júlíusson.
Markmið Kraumslistans
Kraumslistinn 2011 – Verðlaunaplötur
ADHD – ADHD2
Lay Low – Brostinn Strengur
Reykjavík! – Locust Sounds
Samaris – Hljóma Þú (ep)
Sin Fang – Summer Echoes
Sóley – We Sink
Kraumslistinn 2010 – Verðlaunaplötur
Apparat Organ Quartet – Pólyfónía
Daníel Bjarnason – Processions
Ég – Lúxus upplifun
Jónas Sigurðsson – Allt er eitthvað
Nolo – No-Lo-Fi
Ólöf Arnalds – Innundir skinni
Kraumslistinn 2009 – Verðlaunaplötur
Anna Guðný Guðmundsdóttir – Vingt regards sur l’enfant-Jésus
Bloodgroup – Dry Land
Helgi Hrafn Jónsson – For the Rest of my Childhood
Hildur Guðnadóttir – Without Sinking
Hjaltalin – Terminal
Morðingjarnir – Flóttinn mikli
Kraumslistinn 2008 – Verðlaunaplötur
Agent Fresco – Lightbulb Universe·
FM Belfast – How to Make Friends
Hugi Guðmundsson – Apocrypha
Ísafold – All Sounds to Silence Come
Mammút – Karkari
Retro Stefson – Montaña


Hönnunarsjóður Auroru úthlutar

Gleðin var við völd í Vonarstrætinu þegar Hönnunarsjóðurinn úthlutaði 6,5 milljónum.  Ostwald Helgason, Spark Design Space og Vöruhönnuðaverkefnið Textasíða voru meðal þeirra sem fengu styrk.

Sjóðurinn hefur nú úthlutað 17 milljónum til hönnuða og hönnunarverkefna á árinu 2012.
Þeir hönnuðir og hönnunarverkefni sem að þessu sinni hljóta styrk eru:
Um er að ræða aðra úthlutun úr sjóðnum á þessu ári, en þá níundu frá því Hönnunarsjóðurinn hóf starfsemi sína í byrjun árs 2009.   Næsta úthlutun úr sjóðnum verður á vormánuðum 2013, sjá nánar á heimasíðu Hönnunarsjóðs Auroru.


Umsóknarfrestur er liðinn 

Aurora velgerðasjóður tók á móti umsóknum til 1.nóvember fyrir úthlutun 2013.  Sjóðnum bárust fjöldinn allur af fjölbreyttum umsóknum og verðum við í sambandi við umsækjendur á næstu vikum.  Árleg úthlutun verður síðan í janúar/febrúar.


ASCHOBI frumsýnir á tískuvikunni í París

ASCHOBI hönnunarmerkið var frumsýnt á tískuvikunni í París við góðar undirtektir.  Aurora velgerðasjóður styrkti gerð viðskiptaáætlunar  árið 2009 fyrir hönnuðinn Adömu Kai sem kemur frá Sierra Leone.


Hönnunarsjóður Auroru úthlutar 10 milljónum

Sjö framúrskarandi verkefni hljóta styrki í fyrri úthlutun Hönnunarsjóðs Auroru 2012 þar á meðal hönnunartvíeykið Ostwald Helgason, Eygló og Barnafatamerkið As We Grow.

Fyrri úthlutun Hönnunarsjóðs Auroru var haldin með viðhöfn í Vonarstrætinu þar sem sjö ólík verkefni fengu styrki samtals að upphæð 10.milljónum króna.

Þau verkefni sem fengu styrk voru:

  • Fatalínan Ostwald Helgason (2 milljónir)
    Ingvar Helgason og Susanne Ostwald, fatahönnuðir fyrir þátttöku í tískuvikunni í New York í september 2012.
  • Fatalínan EYGLO (1.8 milljón)
    Eygló Margrét Lárusdóttir, fatahönnuður fyrir áframhaldandi vöruþróun og markaðssókn erlendis.
  • Barnafatalínan As we grow (1.8 milljón)
    María Ólafsdóttir, Guðrún Ragna Sigurjónsdóttir og Gréta Hlöðversdóttir fyrir kynningu og markaðssetningu erlendis.
  • Vöruhönnuðurinn Brynjar Sigurðarson með Húsgögn (1.5 milljón)
    Brynjar Sigurðarson, vöruhönnuður fyrir frekari vöruþróun m.a. vegna sýningar í Galleri Kreo, París.
  • Krads arkitektar vinnustofan PLAYTIME (1.2 milljón)
    Til frekari þróunar á vinnustofu fyrir arkitektanema, hérlendis og erlendis, í samstarfi við hinn heimsfræga arkitekt Viny Maas, LEGO ofl. Vinnustofurnar virkja sköpunargleði, skipulagshæfni og rýmisgreind þátttakenda.
  • Valgerður Pétursdóttir, starfsnám hjá AUGE (500 þúsund)
    Starfsnám í listrænni stjórnun og grafískri hönnun hja AUGE, Ítalíu.
  • HönnunarMars – erlent kynningarefni og blogg (1.2 milljón)
    Áframhaldandi samstarf vegna uppbyggingar HönnunarMars hátíðarinnar og kynningar á íslenskri hönnun erlendis.Um er að ræða fyrstu úthlutun úr sjóðnum á þessu ári, en þá áttundu frá því Hönnunarsjóðurinn hóf starfsemi sína í byrjun árs 2009. Aftur verður úthlutað úr sjóðnum á haustmánuðum 2012.

Kraumur úthlutar yfir 11 milljónum til listamanna og tónlistartengdra verkefna

Of Monsters and Men, Sóley Stefánsdóttir, Sólstafir, Lay Low, og fleiri fá styrk á fimm ára starfsafmæli Kraums.

Á fimm ára starfsafmæli sjóðsins heldur Kraumur áfram að styðja íslenskt tónlistarlíf af krafti. Í dag tilkynnti sjóðurinn stuðning við 15 verkefni; 10 verkefni listamanna sem eru af margvíslegum toga á erlendum og innlendum vettvangi, þrjár tónlistarhátíðir hljóta stuðning og tvö fræðsluverkefni. Ákveðin áhersla er á að vinna með kynningu á íslenskri tónlist erlendis í úthlutun sjóðsins að þessu sinni sem og öflugu tónlistarstarfi hérlendis í formi fræðslu og tónleikahalds metnaðarfullra tónlistarhátíða.. Alls bárust sjóðnum 189 umsóknir. Stærstu styrkina hlaut Sóley Stefánsdóttir og hljómsveitin Sólstafir til kynningar á tónlist sinni erlendis. Þá fengu Of Monsters and Men og Lay Low veglegan stuðning vegna tónleikaferðar þeirra um Bandaríkin og Kanada en hún er nýhafin. Meðal annarra styrkþega eru Kammerkór Suðurlands, Dead Skeletons, Moses Hightower, Mr Silla og Snorri Helgason, Eistnaflug, Stafnbúi og Extreme Chill Festival undir Jökli.
Kraumur tónlistarsjóður styður viðkomandi verkefni með fjárhagslegu framlagi sem og faglegri aðstoð og vinnu.
ÚTRÁS – stuðningur & samstarf við listamenn og hljómsveitir : Samtals 5.400.000 kr.
Sóley Stefánsdóttir           Evróputúr og ýmsar tónleikahátíðir         1.200.000 kr.
Sólstafir                           Tvær tónleikaferðir og rokkhátíðir          1.000.000 kr.
Lay Low                           Tónleikaferð um BNA og Kanada                800.000 kr.
Of Monsters and Men      Tónleikaferð um BNA og Kanada                800.000 kr.
Kammerkór Suðurlands   Kynning á kórnum og tengdum verkum     600.000 kr.
Dead Skeletons               Tónleikar í Evrópu m.a. Hróarskelda           500.000 kr.
Stafnbúi: Rímur               Tónleikar í Þýskalandi með 8 manna sveit  500.000 kr.
INNRÁS – stuðningur og samstarf við listamenn og tónlistarhátíðir við tónleikahald innanlands 2012 : samtals 4.000.000 kr.

Eistnaflug                              Rokk í þyngri kantinum á Neskaupstað        700.000 kr.
Mr. Silla og Snorri Helga        Innrás – 7 tónleikar á 7 stöðum á 7 dögum  700.000 kr.
Orgel Bróðir                          Tónleikar í ýmsum kirkjum                           600.000 kr.
Extreme Chill Festival            Rafmögnuð tónlistarhátíð undir Jökli            500.000 kr.
Podium Festival 2012            Klassísk kammermúsíkhátíð og námskeið    500.000 kr.
Moses Hightower                   Innrás út á land næstkomandi haust            500.000 kr.
Við Djúpið                             Tónleikaröð og námskeið fyrir ungt fólk       500.000 kr.
PLÖTUGERÐ OG KYNNING – stuðningur og samstarf við listamenn og hljómsveitir á sviði lagasmíða, plötugerðar og kynningar samtals 400.000 kr.
Duo Harpverk                       Kynning / Plötugerð           400.000 kr.
Ein undantekning var gerð þegar eitt verkefni komst í gegn í þessum flokki enda mikið og gott frumkvöðlastarf í gangi hjá þeim Katie Buckley og Frank Aarnink sem skipa Duo Harpverk sem hafa verið óþreytandi að flytja tónlist eftir ung íslensk tónskáld.
EIGIN VERKEFNI KRAUMS – samtals 3.100.000 kr.
Fræðsla og aðrir styrkir     Ýmis verkefni  – 1.000.000 kr.
Kraumslistinn 2012           Stuðningur & viðurkenning við ísl. plötuútgáfu –  900.000 kr.
Hljóðverssmiðjur         Fræðsla, handleiðsla / samstarfi við Músíktilraunir –  800.000 kr.
Aldrei fór ég suður            Námskeið og fræðsla öllum opin  –  400.000 kr.
Þetta er í fjórða sinn sem Kraumur stendur að námskeiði og fræðsluverkefni í samvinnu við tónlistarhátíðina Aldrei fór ég suður en þar er reynt að greina ýmis mál sem tengjast tónlistargeiranum og síbreytilegu umhverfi.
______
Megintilgangur Kraums er að stuðla að og styrkja íslenskt tónlistarlíf, fyrst og fremst með stuðningi við unga tónlistarmenn. Yfirlýst stefna sjóðsins er að styrkja tiltölulega fá verkefni/listamenn, en gera það þannig að stuðningurinn sé afgerandi. Verkefnaval Kraums tekur mið að því að styrkir til listamanna og verkefna eru í flesta staði hærri og veglegri og þar af leiðandi færri yfir heildina. Þetta er í samræmi við álit fagráðs Kraums sem og niðurstöðu árangursmats Viðskiptafræðistofnunar Háskóla Íslands sem gert var fyrir Kraum og kynnt var fyrir ári.
Kraumur tónlistarsjóður, sem var stofnaður í byrjun árs 2008 af Aurora velgerðarsjóði, hefur það meginhlutverk að efla íslenskt tónlistarlíf – fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Markmið Kraums er að styrkja stöðu tónlistarmanna á Íslandi með beinum styrkjum, aðstoð og samstarfi af ýmsu tagi. Kraumur vill styðja við og ýta undir nýsköpun og metnað á tónlistarsviðinu.
Frá því Kraumur hóf starfsemi sína hafa yfir áttatíu listamenn og hljómsveitir hlotið stuðning frá sjóðnum og má þar nefna Amiina, Bang Gang, Bloodgroup, Celestine, Daníel Bjarnason, Dikta, Elfa Rún Kristinsdóttir, Hjaltalín, Lay Low, Melkorka Ólafsdóttir, Mugison, Nordic Affect, Prinspóló, Ólöf Arnalds, Sin Fang, Skálmöld og Víkingur Heiðar Ólafsson. Kraumur hefur einnig haldið úti samstarfsverkefnum með Músíktilraunum Tónabæjar, Listahátíð í Reykjavík, Jazzhátíð í Reykjavík, Iceland Airwaves, Aldrei fór ég suður, ÚTÓN og fleiri aðilum.


Úthlutun til dóttursjóða og Menntaverkefnis Auroru í Sierra Leone

Fimmta úthlutun Auroru velgerðasjóðs fór fram þann 15. febrúar sl. þegar 85 milljónum króna var veitt til Hönnunarsjóðs Auroru, Kraums tónlistarsjóðs og Unicef.

Stjórn Auroru velgerðasjóðs ákvað í samræmi við úthlutunarstefnu sjóðsins að aðlaga þessa úthlutun betur að erfiðu ástandi á fjármálamörkuðum.  Miklar sviftingar á mörkuðunum gera það að verkum að ávöxtun sjóðsins er minni en á upphafsárum hans, en samkvæmt markmiðum Auroru þá skal úthlutun vera sem nemur ávöxtun sjóðsins hverju sinni.  Það má því gera ráð fyrir að úthlutanir næstu ára taki mið af þessum breytingum.  Það skal þó tekið fram að þrátt fyrir hrun á fjármálamörkuðum á árinu 2008 og erfiðst ástands í framhaldinu, þá stendur sjóðurinn styrkum fótum eftir sem áður.

Þessi fimmta úthlutun sjóðsins samanstóð af 40 milljón króna styrk til Menntaverkefnisins í Sierra Leone sem unnið er í samstarfi við menntayfirvöld þar í landi og Unicef á Íslandi og í Sierra Leone.  Þetta er fimmta og jafnframt lokagreiðslan í þessu stærsta og jafnframt veigamesta verkefni sjóðsins frá upphafi að byggja upp barnvænt menntakerfi og skólahúsnæði, einkum með þarfir stúlkubarna í huga.  Alls hefur sjóðurinn því ráðstafað um 240 milljónum króna til verkefnisins að meðtöldum 36 milljónum króna sem stofnendur sjóðsins lögðu til áður.
Hönnunarsjóður Auroru fær 25 milljónir króna sem er jafnframt fyrsta greiðslan af 75 milljónum sem honum voru veittar þegar stjórn Auroru ákvað að veita Hönnunarsjóðnum framhaldslíf til þriggja ára í viðbót.   Hönnunarsjóðurinn mun áfram fylgja þeirri stefnu að styrkja framúrskarandi hönnuði með heilsteypta viðskiptahugmynd og skýra framtíðarsýn.

Kraumur tónlistarsjóður fékk 20 milljónir króna til að efla íslenskt tónlistarlíf, fyrst og fremst með stuðningi við unga listamenn, aðvelda þeim að koma listsköpun sinni og verkum á framfæri.


Kraumslistinn 2011

ADHD – Lay Low – Reykjavík – Samaris – Sin Fang og Sóley eiga verðlaunaplötur á Kraumslistanum 2011

Kraumslistinn 2011, árleg plötuverðlaun Kraums tónlistarsjóðs, var kynntur í dag. Á listanum er að finna sex plötur sem bera þess merki að mikið hefur verið í þær lagt, að hér eru verk eftir vaxandi og leitandi listamenn. Plöturnar sem skáru framúr og skipa listann eiga það sameiginlegt að vera frumlegar, spennandi og skemmtilegar en 20 plötur voru tilnefndar til verðlaunanna. Það var ekki auðvelt að gera upp á milli allra þeirra góðu platna sem skipuðu listann og komu út á árinu en á því liggur enginn vafi að tónlistarárið 2011 var gjöfult og gott.
Árni Matthíasson, formaður dómnefndar, tilkynnti niðurstöðu um val verðlaunaplatna sem líkt og síðustu tvö ár eru sex talsins. Afhending verðlaunanna fór fram í húsnæði Kraums tónlistarsjóðs að Vonarstræti 4b.
Kraumslistinn 2011 – Verðlaunaplötur
ADHD – ADHD2
Lay Low – Brostinn Strengur
Reykjavík! – Locust Sounds
Samaris – Hljóma Þú (ep)
Sin Fang – Summer Echoes
Sóley – We Sink
Kraumslistanum (stundum kölluð Kraumsverðlaun) er ætlað að styðja við plötuútgáfu íslenskra hljómsveita og listamanna – með því að styðja og vekja sérstaka athygli á því sem er nýtt og spennandi – og þeim verkum sem skara fram úr í gæðum, metnaði og frumleika. Kraumslistinn er ekki bundinn neinni ákveðinni tónlistarstefnu og honum fylgja engir undirflokkar. Það er von aðstandenda Kraumslistans að valið veki athygli á flottri og fjölbreyttri íslenskri plötuútgáfu, þegar jólagjafaflóðið er við það að skella á, og listamenn reiða sig hvað mest á plötusölu.
Verðlaun
Kraumur mun leggja metnað við að styðja alla þá titla sem valdir eru á Kraumslistann, frekar en að einblína á eina einstaka verðlaunaplötu. Sjóðurinn mun styðja við Kraumslistaplöturnar og jafnframt auka við möguleika listamannanna bakvið þær til að koma verkum sínum á framfæri erlendis með því að kaupa ákveðinn fjölda af plötunum og dreifa þeim til ýmissa starfsmanna tónlistarbransans erlendis (tónlistarhátíðir, plötuútgáfur, umboðsskrifstofur o.s.frv.).
Í dómnefnd Kraumslistans 2011 sátu:
Alexandra Kjeld, Andrea Jónsdóttir, Anna Andersen, Arnar Eggert Thoroddsen, Arndís Björk Ásgeirsdóttir, Árni Matthíasson, Benedikt Reynisson, Berglind María Tómasdóttir, Egill Harðarson, Eldar Ástþórsson, Elísabet Indra Ragnarsdóttir, Helena Þrastardóttir, Helga Vala Helgadóttir, Hildur Maral Hamíðsdóttir, Höskuldur Daði Magnússon, Kamilla Ingibergsdóttir, Ólafur Páll Gunnarsson, Ómar Eyþórsson, Trausti Júlíusson og Þorkell Máni Pétursson
Kraumslistinn 2010 – Verðlaunaplötur

Kraumslistinn 2009 – Verðlaunaplötur
Kraumslistinn 2008 – Verðlaunaplötur
Markmið Kraumslistans


Kraumslistinn – Úrvalslisti 2011

Markmið Kraumslistans er að kynna og styðja við plötuútgáfu íslenskra hljómsveita og listamanna með sérstöku tilliti til þeirra sem yngri eru. Viðurkenna og vekja sérstaka athygli á þeim verkum sem skara fram úr í gæðum, metnaði og frumleika.

Verðlaunaplötur – Tilnefning og val
Framkvæmd Kraumslistans 2011 er með þeim hætti að sex manna dómnefnd valdi 20 plötur á Úrvalslista Kraumslistans en við honum tekur 20 manna dómnefnd og velur bestu plöturnar þannig að eftir standa 5 til 6 verðlaunaplötur.
Dómnefnd Kraumsverðlaunanna er skipuð 20 aðilum sem allir hafa mikla reynslu af því að hlusta á og fjalla um íslenska tónlist á ýmsum sviðum fjölmiðla. Formaður dómnefndar er Árni Matthíasson.
Í úrvalslistanefnd áttu sæti ásamt  Árna Matthíassyni: Andrea Jónsdóttir, Trausti Júlíusson, Egill Harðarson, Helena Þrastardóttir og Hildur Maral Hamíðsdóttir.

Úrvalslisti Kraumslistans 2011:
Tilkynnt verður hverjir skipa listann föstudaginn 16. desember – Nánar auglýst síðar

Kraumslistinn – Viðurkenning og verðlaun
Kraumslistinn, sem bar nafnið Kraumsverðlaunin í fyrsta sinn sem hann var valinn í lok árs 2008, snýst fyrst og fremst um að styðja við og vekja athygli á öllum þeim plötum sem dómnefnd velur til Kraumslistans, frekar en eina einstaka verðlaunaplötu. Nú hefur sex manna dómnefnd lokið störfum og valið 20 plötur á Úrvalslista Kraumslistans en stærri dómnefnd velur svo af þeim lista bestu plötur ársins.

Aðstandandi Kraumslistans er Kraumur tónlistarsjóður sem er sjálfstætt starfandi sjóður á vegum Auroru velgerðarsjóðs. Kraumur hefur það að meginhlutverki að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan.

Það er von aðstandenda Kraumlistans að verðlaunin verði liðsauki fyrir íslenska listamenn og íslenska plötuútgáfu, og veki enn frekari athygli á þeirri grósku og fjölbreytni sem einkennir íslenskt tónlistarlíf. Tímasetning tilnefninga og úthlutunar Kraumsverðlaunanna er miðuð við jólagjafaflóðið, þegar listamenn reiða sig hvað mest á plötusölu og ætla má að sóknarfæri séu fyrir íslenska tónlist að rata í fleiri jólapakka.

Kraumur mun leggja metnað við að styðja alla þá titla sem valdir eru á Kraumslistann, frekar en að einblína á eina einstaka verðlaunaplötu. Umgjörðin í kringum verðlaunaafhendinguna er í lágmarki og frekar reynt að einbeita sér að auknum stuðningi við plöturnar.

Kraumur mun styðja við Kraumslistaplöturnar og jafnframt auka við möguleika listamannanna bakvið þær til að koma verkum sínum á framfæri erlendis með því að kaupa ákveðinn fjölda af plötunum og dreifa þeim til ýmissa starfsmanna tónlistarbransans erlendis (tónlistarhátíðir, plötuútgáfur, umboðsskrifstofur o.s.frv.).

Kraumslistinn er ekki bundinn neinni ákveðinni tónlistarstefnu og honum fylgja engir undirflokkar.


Reynslunni ríkari

Hönnunarsjóður Auroru ásamt nokkrum styrkþegum hans miðla af reynslu sinni á tímamótum í starfsemi sjóðsins í fyrirlestraröð Hönnunarmiðstöðvar, Listasafns Reykjavíkur og Listaháskóla Íslands, fimmtudaginn 17. nóvember kl. 20 í Hafnarhúsi.
Aurora Velgerðarsjóður, stofnandi Hönnunarsjóðsins hefur veitt honum brautargengi á ný til þriggja ára. Á þessum tímamótum er við hæfi að staldra við, líta um öxl og miðla af reynslu sjóðsins og þeirra sem hlotið hafa styrki.
Fram komu:
Andrea Maack / EAU DE PARFUM

Anton Kaldal, Gunnar Þ.Vilhjálmson og Steinar Farestveit / saga og
þróun bókstafsins ð,

Hugrún Árnadóttir og Magni Þorsteinsson / KRON by KRONKRON,

Hafsteinn Júlíusson / HAF,

Sigríður Sigurjónsdóttir / SPARK, Design Space,

Hlín Helga Guðlaugsdóttir / Hönnunarsjóður Auroru
Í hádeginu, þennan sama dag, fimmtudaginn 17.nóvember fór fram seinni úthlutun ársins 2011, en jafnframt sú sjöunda frá því hann var stofnaður þann 13. febrúar 2009.


Seinni úthlutun Hönnunarsjóðs Auroru 2011

En þá var úthlutað 6.000.000 kr. til framúrskarandi hönnuða og verkefna þeirra. Alls hefur því verið úthlutað úr sjóðnum rúmlega 17.500.000 króna árið 2011.
Að þessu sinni fengu tveir aðilar framhaldsstyrki til frekari eflingar verkefna sinna, sem er í takt við þá stefnu Hönnunarsjóðsins að fylgja eftir völdum verkefnum þannig að sá árangur megi fremur nást sem viðkomandi stefnir að. Styrkina hlutu Sigríður Sigurjónsdóttir með SPARK hönnunargallerí og Sruli Recht fatahönnuður.
Hönnunarsjóðurinn styrkti einni Sóleyju Stefánsdóttur með verkefni sitt DIG-Equality (Design Innovation for Gender Equality), sem byggir á þeirri hugsjón að hönnun sé afl til samfélagslegra breytinga.
Hönnunarsjóður Auroru hefur styrkt átta hönnuði til starfsnáms (internship) síðustu ár. Í þetta sinn hlaut slíkan styrk Steinar Júlíusson, grafískur hönnuður til starfsnáms hjá Acne Productions í Stokkhólmi.
Hönnunarsjóðurinn heldur áfram samstarfi við skipuleggjendur hönnunarviðburða og tók á dögunum þátt í Atypi, alþjóðlegri ráðstefnu um leturhönnun sem haldin var í Hörpu. Sjóðurinn er einnig í samstarfi við Hönnunarmiðstöð Íslands um bloggsíðu til kynningar íslenskri hönnun erlendis.


Kraumur úthlutar til Innrásinnar 2011

Kraumur tónlistarsjóður kynnti fimmtudaginn 13. júlí úthlutun sína til verkefna íslenskra listamanna og hljómsveita sem taka þátt í Innrás Kraums 2011. Verkefnavalið er fjölbreytt og tónlistarstefnur margar, allt frá klassískum ljóðasöng yfir í þungarokk og raftónlist.
Þeir sem njóta stuðning Kraums að þessu sinni eru Hallveig Rúnarsdóttir og Gerrit Schuil, hljómsveitirnar Valdimar, Ghostigital og Captain Fufanu, Frelsissveit Nýja Íslands sem leika mun á djasshátíð og Skálmöld sem heimsækir þar að auki Færeyjar. Tónleikaferðin Partíþokan hlýtur hæsta styrkinn að þessu sinni en verkefnið er hugarfóstur Svavars Péturs Eysteinssonar sem fer fyrir hljómsveitinni Prinspóló. Með í för verða FM Belfast, Borko og Sin Fang auk Prinspóló.
Markmið Innrásarinnar er að auka við möguleika listamanna og hljómsveita til tónleikahalds innanlands, gefa þeim færi á að koma sér og tónlist sinni á framfæri víðar en á höfuðborgarsvæðinu og efla tónlistarlíf á landsbyggðinni.
Alls bárust 119 umsóknir í nýliðið umsóknarferli Kraums og því ljóst að Kraumur myndi aðeins styðja við lítinn hluta þeirra verkefna sem sóttu um til sjóðsins. Samræmist það yfirlýstri stefnu sjóðsins að styrkja frekar tiltölulega fá verkefni/listamenn – en gera það þannig að stuðningurinn sé afgerandi fyrir viðkomandi listamenn og verkefni þeirra. Í dag er tilkynnt um alls 6 verkefni sem Kraumur mun styrkja og styðja við.
Megintilgangur Kraums er að styrkja íslenskt tónlistarlíf, fyrst og fremst með stuðningi við unga tónlistarmenn. Frá því sjóðurinn var settur á laggirnar í upphafi árs 2008 hafa í kringum 80 hljómsveitir og listamenn fengið stuðning úr sjóðnum, auk þess sem Kraumur hefur sjálfur staðið fyrir fjölda verkefna (Hljóðverssmiðjur, Innrásin – stuðningur við tónleikahald innanlands, Kraumsverðlaunin og Kraumslistinn) auk stuðnings við verkefni Músíktilrauna Tónabæjar, Iceland Airwaves, Listahátíð í Reykjavík, Jazzhátíð í Reykjavík, Við Djúpið o.fl.
Verkefnin sem hlutu stuðning í seinni úthlutun Kraums 2011:
Samtals: 2.2 milljónir til sex verkefna
Kraumur tónlistarsjóður , sem var stofnaður í byrjun árs 2008 af Aurora velgerðarsjóði, hefur það meginhlutverk að efla íslenskt tónlistarlíf – fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Markmið Kraums er að styrkja stöðu tónlistarmanna á Íslandi með beinum styrkjum, aðstoð og samstarfi af ýmsu tagi. Kraumur vill styðja við og ýta undir nýsköpun og metnað á tónlistarsviðinu.


Kraumur úthlutar

Kraumur tónlistarsjóður kynnti í dag úthlutun sína til verkefna listamanna, hljómsveita og annarra aðila á sviði íslenskrar tónlistar. Meðal þeirra sem hljóta stuðning eru hljómsveitirnar Pascal Pinon, Árstíðir og Endless Dark við kynningu á sér og tónlist sinni á erlendum vettvangi – auk þess sem Kraumur heldur áfram að vinna með og styðja við Retro Stefson og Dikta í sömu erindargjörðum. Í báðum tilvikum studdi Kraumur sveitirnar við undirbúning og gerð hljómplatna árin 2009 og 2010 (Get it Together og Kimbabwe) sem nú er stefnt á að kynna frekar á erlendum vettvangi.
Tónlistarhátíðin Eistnaflug, tónleikaferðin Póst rokk og ról, tónskáldið Guðmundur Steinn Guðmundsson og Sjóræningahúsið á Patreksfirði fá stuðning við tónleikhald innanlands, sem hluti af Innrásarverkefni sjóðsins. Markmið Innrásarinnar er að auka við möguleika listamanna og hljómsveita til tónleikahalds innanlands, gefa þeim færi á að koma sér og tónlist sinni á framfæri víðar en á höfuðborgarsvæðinu og efla tónlistarlíf á landsbyggðinni.
Alls bárust 233 umsóknir í nýliðið umsóknarferli Kraums og strax ljóst að Kraumur myndi aðeins styðja við lítinn hluta þeirra verkefna sem sótt var um stuðning fyrir að þessu sinni, enda yfirlýst stefna sjóðsins að styrkja frekar tiltölulega fá verkefni/listamenn – en gera það þannig að stuðningurinn sé afgerandi fyrir viðkomandi listamenn og verkefni þeirra. Í dag var tilkynnt um alls 15 verkefni sem Kraumur mun styðja við og styrkja að þessu sinni.
Sú breyting er á verkefnavali Kraums að þessu sinni að styrkir til listamanna og verkefna eru færri, en í flesta staði hærri og veglegri, en við síðustu úthlun. Er þetta í samræmi við álit fagráðs Kraums sem og niðurstöðu árangursmats Viðskiptafræðistofnun Háskóla Íslands sem gert var fyrir Kraum og systursjóðinn Hönnunarsjóð Auroru og kynnt var í mars. Þar kom m.a. fram að styrkir sjóðsins til verkefna og listamanna hefði fjölgað, en að sama skapi upphæðir lækkað, frá því starfsemin var sett á laggirnar – sem getur veikt sérstöðu sjóðsin og möguleika þeirra sem stuðning hljóta til árangurs.
Megintilgangur Kraums er að styrkja íslenskt tónlistarlíf, fyrst og fremst með stuðningi við unga tónlistarmenn. Frá því sjóðurinn var settur á laggirnar í upphafi árs 2008 hafa yfir 70 hljómsveitir og listamenn fengið stuðning úr sjóðnum, auk þess sem Kraumur hefur sjálfur staðið fyrir fjölda verkefna (Hljóðverssmiðjur, Innrásin – stuðningur við tónleikahald innanlands, Kraumsverðlaunin og Kraumslistinn) auk stuðnings við verkefni Músíktilrauna Tónabæjar, Iceland Airwaves, Listahátíð í Reykjavík, Jazzhátíð í Reykjavík, Við Djúpið o.fl. sem nýst hafa fleirum og breiðum hópi listamanna.
Af þeim 15 verkefnum sem stuðning hlutu úr nýlegu umsóknarferli er eitt þeirra, samstarfsverkefni um námskeið fyrir tónlistarmenn á Aldrei fór ég suður, þegar átt sér stað.
—————————————————-
Pascal Pinon, Tónleikahald og kynning á frumburði sínum erlendis – 1.200.000
Retro Stefson*, Tónleikhald og kynningarstarf, Norðurlönd og Evrópa – 1.000.000
Árstíðir, Tónleikahald og dreifing í Rússlandi og Austur Evrópu – 800.000
Dikta*, Tónleikahald og kynning á verkum sínum í USA – 800.000
Endless Dark, Undirbúningsvinna og kynning á verkum sínum erlendis- 700.000
adhd, Kynningarvinna og tónleikar innanlands  – 600.000
Kalli, Kynningarvinna á erlendum vettvangi – 600.000
Anna Þorvaldsdóttir, Undirbúningur og upptökur á portrait hljómdisk – 600.000
Who Knew, Tónleikahald á erlendum tónlistarhátiðum  – 600.000
Eistnaflug, Innrás: Tónlistarhátíð í Neskaupsstað – 500.000
Aldrei fór ég suður, Innrás: Námskeið fyrir tónlistarmenn og gesti – 400.000
Guðmundur Steinn Guðmundsson, Innrás: Tónleikar innanlands – 300.000
Póst rokk og ról, Innrás: Tónleikar Lockerbie og fleiri um landið – 300.000
Sjóræningahúsið, Innrás: Tónleikasería á Patreksfirði – 300.000
Sleepless in Reykjavik, Myndbandagerð um íslenskt tónlistarlíf  – 300.000
Samtals: 9.000.000
*Kraumur hefur áður stutt við undirbúning og upptökur á breiðskífum Dikta (Get it Together) og Retro Stefson (Kimambwe), sem sveitirnar vinna nú að því að gefa út og kynna á erlendum vettvangi – með stuðningi Kraums.
—————————————————-
Kraumur tónlistarsjóður , sem var stofnaður í byrjun árs 2008 af Aurora velgerðarsjóði, hefur það meginhlutverk að efla íslenskt tónlistarlíf – fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Markmið Kraums er að styrkja stöðu tónlistarmanna á Íslandi með beinum styrkjum, aðstoð og samstarfi af ýmsu tagi. Kraumur vill styðja við og ýta undir nýsköpun og metnað á tónlistarviðinu.
Frá því Kraumur hóf starfsemi sína hafa yfir sjötíu listamenn og hljómsveitir hlotið stuðning frá sjóðnum og má þar nefna Amiina, Bang Gang, Bloodgroup, Celestine, Daníel Bjarnason, Dikta, Elfa Rún Kristinsdóttir, Hjaltalín, Lay Low, Melkorka Ólafsdóttir, Mugison, Nordic Affect, Njútón tónlistarhópur, Ólöf Arnalds, Seabear og Víkingur Heiðar Ólafsson. Kraumur hefur einnig haldið úti samstarfsverkefnum með Músíktilraunum Tónabæjar, Listahátíð í Reykjavík, Jazzhátíð í Reykjavík, Iceland Airwaves, Aldrei fór ég suður og fleiri aðilum.
Auk beins stuðnings við einstaka listamenn og hljómsveitir – og verkefni þeirra á sviði plötuútgáfu, tónleikahalds og kynningar á sér og verkum sínum innanlands sem utan – hefur Kraumur hrundið af stað og starfrækt eigin verkefni til breiðari stuðnings í tónlistarlífinu; m.a. Innrásinni til stuðnings tónleikhaldi innanlands, Kraumslistanum til að vekja athygli og styðja við íslenskri plötuútgáfu og þeim titlum sem þykja skara fram úr í frumleika og metnaði – og svokölluðum Hljóðverssmiðjum í samvinnu við Músíktilraunir, þar sem ungum og upprennandi listamönnum og hljómsveitum gefst kostur á að taka upp nýtt efni undir leiðsögn og fá ráð um næstu skref í ferlinum hjá reyndari tónlistamönnum.


Fyrri úthlutun Hönnunarsjóðs Auroru 2011

Bóas Kristjánsson, HAF, Uppruni, saga og þróun bókstafsins „ð“ fá ásamt fleiri spennandi verkefnum styrk í rúmlega 11 milljón króna úthlutun Hönnunarsjóðs Auroru.

Sjóðurinn hefur leitast við að styrkja framúrskarandi hönnuði með heilsteypta viðskiptahugmynd og skýra framtíðarsýn. Að þessu sinni bárust 80 umsóknir af öllum sviðum hönnunar, sem er mesti fjöldi umsókna sem sjóðnum hefur borist hingað til. Samhliða auknum fjölda umsókna eru einnig aukin gæði þeirra merkjanleg. Hönnunarsjóður Auroru úthlutaði að þessu sinni 11.580.000 kr. til hönnuða og arkitekta til verkefna á sviði grafískrar hönnunar, fatahönnunar, matarhönnunar, vöruhönnunar og arkitektúrs.
Úr fréttatilkynningu;
Að þessu sinni fá þrír aðilar framhaldsstyrki til frekari eflingar verkefna sinna, sem er í takt við þá stefnu Hönnunarsjóðsins að fylgja eftir völdum verkefnum þannig að sá árangur megi fremur nást sem viðkomandi hönnuður stefnir að. Þetta eru þeir Bóas Kristjánsson með fatamerki sitt 8045, Hafsteinn Júlíusson með vörumerki sitt HAF og Charlie Strand með bókina Icelandic Fashion Design sem kemur út í sumar. Öll eiga þessi verkefni sameiginlegt að ötullega hefur verið unnið í þeim frá fyrri styrkveitingum.
Hönnunarsjóðurinn styrkir í fyrsta skipti Anton Kaldal, Gunnar Vilhjálmsson og Steinar Farestveit með rannsóknarverkefni sem kafar djúpt í uppruna, sögu, og þróun bókstafsins „ð“, sem er þýðingarmikill hluti af þjóðararfi Íslendinga. Rannsóknin verður tekin saman með útgáfu bókar. Arkitektastofan KRADS með verkefni sitt PLAYTIME, sem er farandvinnustofa ætluð nemum í arkitektúr, þróuð í samvinnu við danska leikfangaframleiðandann LEGO. Sruli Recht fatahönnuður með nýja herrafatalínu sína og Auður Ösp Guðmundsdóttir, Embla Vigfúsdóttir Katarina Lötzsch og Robert Peterssen með matarhönnunarverkefnið “ Pantið áhrifin” en það verkefni fékk Nýsköpunarverðlaun Forseta Íslands á dögunum.
(ítarefni um hönnuðina og tenglar)
Auk þessa tekur Hönnunarsjóður Auroru áfram þátt í uppbyggingu HönnunarMars Hönnunarmiðstöðvar Íslands og styrkir í því tilliti gerð myndbanda sem heimild um hátíðina og gerir Hönnunarmiðstöð kleift að bjóða hingað erlendum blaðamönnum.
Hönnunarsjóður Auroru hefur styrkt hönnuði til starfsnáms síðustu ár en þetta er í fyrsta skipti sem styrkirnir eru veittir til starfsnáms erlendis. Styrkina hljóta Birna Geirfinnsdóttir sem fær styrk til starfsnáms hjá Fraser Muggeridge Studio í London, sem er í eigu Fraser Muggeridge og Björgvin Friðgeirsson til að starfa hjá “Soup” í Kaliforniu, sem er í eigu John Bielenberg margverðlaunaðs grafísks hönnuðar.
Um er að ræða fyrstu úthlutun úr sjóðnum á þessu ári, en þá sjöttu frá því Hönnunarsjóðurinn hóf starfsemi sína í byrjun árs 2009. Aftur verður úthlutað úr sjóðnum á haustmánuðum 2011.


Árangursmat dóttursjóðanna kynnt

Góð mæting var í stofu 101 á Háskólatorgi þegar Viðskiptafræðistofnun Háskóla Íslands kynnti árangursmat sitt á starfsemi og styrkveitingum dóttursjóðanna..

Markmið með gerð árangursmatsins var fyrst og fremst að aðstoða stjórnendur sjóðanna til að meta það starf sem á sér stað innan sjóðanna, hvaða áhrif það hefur á frama styrkþega og einnig hönnunar- og tónlistarsamfélagið í víðari skilningi. Einnig var árangursmatið hugsað sem lærdómur um það hvernig best er að standa að styrkveitingum, hvaða form gefur bestan árangur, hvaða aðferðarfræði hentar best þeim sem sækja um styrki og hvaða ásýnd svona sjóðir hafi gagnvart umsækjendum og samstarfsaðilum.
Höfundar skýrslunnar eru þau Margrét Sigrún Sigurðardóttir og Tómas Viktor Young
en þau kynntu helstu niðurstöður árangursmatsins.
Auður Einarsdóttir framkvæmdastjóri Auroru velgerðasjóðs, Hlín Helga Guðlaugsdóttir framkvæmdastjóri Hönnunarsjóðs Auroru og Eldar Ástþórsson framkvæmdastjóri Kraums tónlistarsjóðs fóru einnig yfir starfsemi sjóðanna.
Rannsóknin var byggð á á hálfopnum viðtölum við framkvæmdastjóra sjóðanna og styrkþega. Niðurstaða árangursmatsins leiddi í ljós almenna ánægju meðal styrkþega með sjóðina en umsóknarferlið þykir persónulegt og óformlegt. Vegna aukins fjölda umsókna benda höfundar skýrslunnar á að nauðsynlegt sé að gera umsóknarferlið formfastara. Í síðasta umsóknarferli fékk Kraumur 233 umsóknir en Hönnunarsjóðurinn 80 umsóknir sem er umsóknarmet síðan sjóðirnir hófu starfsemi sína.
Styrkþegar voru allir sammála um að styrkurinn hafi hjálpað þeim mikið í framkvæmd verkefnisins sem sótt var um en hefðu samt sem áður framkvæmt verkefnin sín án styrksins. Þetta sýnir í raun að sjóðirnir eru á réttri leið með að styrkja verkefni sem eru með skýra framtíðarsýn og markmið og líklegri til að verða að veruleika.
Markmið sjóðanna er að veita styrki sem eru veglegri til fárra verkefna svo stuðningurinn skipti sköpum fyrir verkefnin sem er í takt við markmið móðursjóðsins.  Rannsakendur benda á að þróun í átt að lægri styrkjum til stærri hóps sé ekki að þjóna markmiðum sjóðanna og minnki líkur á árangri fyrir styrkþegana sjálfa. Þessi hætta sé fyrir hendi þegar fjöldi góðra umsókna eykst og var þróun hjá sjóðunum á ákveðnum tímapunkti.
Niðurstaða árangurmatsins er því sú að styrkþegar eru ánægðari með að sjóðirnir veiti veglegri styrki á færri verkefni. Sjóðirnir hafa tekið það til sín og munu leitast við að framfylgja þeim markmiðum.
Framkvæmdastjórum sjóðanna ber saman um að gerð árangursmats sé mikilvægt framlag fyrir starfsemi sjóðanna. Hér sé á ferð rannsókn sem hjálpi til við mótun stefnu þeirra í styrkveitingum og almennri starfsemi. Góðar leiðbeiningar við hvernig má styrkja og efla starfsemina, viðhalda þeim verkþáttum sem virka hvað best – en gera breytingar þar sem umbóta er þörf. Starfsemi sjóðanna hafi verið í stöðugri þróun síðustu ár, enda sett upp sem tilraunaverkefni, og rannsókn sem þessi sé ekki aðeins gott veganesti fyrir komandi starfsár, heldur veki vonandi upp umræður um það sem betur má fara í styrkveitingum almennt.
Á mynd: Auður Einarsdóttir, framkvæmdastjóri Aurora velgerðarsjóðs, Eldar Ástþórsson, framkvæmdastjóri Kraums tónlistarsjóðs, Margrét Sigrún Sigurðardóttir, lektor við Viðskiptafræðistofun Háskóla Íslands og höfundur árangursmatsins, Tóms Viktor Young höfundur árangursmatsins, Hlín Helga Guðlaugsdóttir framkvæmdastjóri Hönnunarsjóðs Auroru.


Sviðslistir, Rústabjörgunarsveitin Ársæll og sýning Louise Bourgouis í Listasafni Íslands eru ný styrktarverkefni Auroru velgerðasjóðs

Í dag 16.febrúar úthlutar Aurora  Velgerðasjóður í fjórða sinn um 100 milljónum króna til sex verkefna á sviði mannúðar, mennta og menningar hérlendis og í Afríkuríkinu Síerra Leóne.

Styrkur til sviðslista:
Sviðslistir á Íslandi eru í mikilli framþróun og hefur sköpunarkrafturinn vakið athygli út fyrir landsteinana.   Aurora  hefur ákveðið að styrkja sviðslistir á Íslandi þ.e. leiklist, listdans og sönglist um 10 milljónir króna. Með þessum styrk vill Aurora Velgerðasjóður efla enn frekar sviðslistir með því að styrkja framúrskarandi og metnaðarfull verkefni.  Aurora Velgerðasjóður hefur fengið með sér í lið þau Viðar Eggertsson leikstjóra og Ingibjörgu Þórisdóttur dramatúrg og leiklistagagrýnanda, til að veita faglega ráðgjöf við val á verkefnum en lögð verður mikil áhersla á að verkefnin séu listræn, áræðin og unnin af fagfólki.
Opnað hefur verið fyrir umsóknir og eru allar nánari upplýsingar á heimasíðu sjóðsins.

Nánari upplýsingar: www.aurorafund.is

Rústabjörgunarsveitin Ársæll

Rústabjörgunarsvetin Ársæll er hluti af Alþjóðabjörgunarsveit Slysavarnafélagsins Landsbjargar og sinnir óveðursaðstoð, viðbrögðum við jarðskjálftum og ofanflóðum í byggð á landsvísu.   Sveitin vann mikið þrekvirki við erfiðar aðstæður á Haítí í kjölfar jarðskjálftans í janúar 2010 en þeir voru með fyrstu björgunarsveitum á svæðið.  Komið er að ýmsu viðhaldi og endurnýjun á þeim sérhæfða búnaði sem hópurinn hefur yfir að ráða og hefur því Aurora Velgerðasjóður ákveðið að styrkja sveitina um 3 milljónir króna en upphæðin verður nýtt  til tækjakaupa.

Nánari upplýsingar : www.bjorgunarsveit.is

Louise Bourgeois – Sýning á listaverkum hennar í Listasafni Íslands:
Louise Bourgeois er í hópi þekktustu listakvenna samtímans. Hún lést í fyrra á 99. aldursári enn þá í fullu í fjöri og starfandi af þrótti sem listamaður. Hún hóf sinn feril sem málari en um miðja síðustu öld fór hún að takast á við skúlptúr sem síðan þróaðist út í viðamiklar innsetningar. Þar er hún brautryðjandi og af mörgum talin vera sá listamaður sem brúaði bilið milli nútímalistar og samtímalistar.  Nú á hundrað ára afmælisári hennar eru sýningar á verkum hennar eftirsóttari en nokkurn tíma áður og því er þetta einstakt tækifæri fyrir Listasafn Íslands að fá sýningu af þessari stærðargráðu en hún verður sú fyrsta í Evrópu eftir andlát listkonunnar og má búast við erlendum gestum sem kæmu gagngert til að sjá sýninguna.  Auroa velgerðarsjóður hefur ákveðið að styrkja Listasafn Íslands um 3 milljónir króna sem fara í uppsetningu á verkum  Louise Bourgeois og útgáfu veglegrar bókar sem gefur þannig Íslendingum tækifæri til að kynnast betur þessari merku listakonu.
Í viðhengi eru nánari upplýsingar ásamt myndum, önnur var tekin af Louise árið 2007 af Dimitris Yeros og hin er af verki hennar Spider/Könguló frá 1995.

Nánari upplýsingar: www.listasafn.is

Kraumur tónlistarsjóður
Kraumur tónlistarsjóður var settur á laggirnar árið 2008  af Auroru Velgerðasjóði sem tilraunaverkefni til þriggja ára.  Starfsemi Kraums hefur verið umfangsmikil og blómleg en sjóðurinn hefur átt fjölbreytt samstarf við ýmsa aðila innan tónlistargeirans.  Á þessum þremur árum hafa um 100 tónlistarmenn, hljómsveitir og tónlistartengd verkefni fengið úthlutað um 60 milljónum króna.  Kraumur  hefur m.a. styrkt tónleika og tónleikaferðalög heima og heiman, aðstoðað við markaðssetningu erlendis og staðið meðal annars fyrir nýjum tónlistarviðurkenningum undir nafninu Kraumslistinn.  Það er því ljóst að nærvera sjóðsins skiptir miklu máli í íslensku tónlistarlífi, en sem dæmi má nefna þá  bárust sjóðnum 232 umsóknir nú fyrir næstu úthlutun. Í ljósi þessa ákvað stjórn Auroru að veita þessu kraftmikla starfi áframhaldandi brautargengi og leggja Kraumi tónlistarsjóði til aðrar 60 milljónir til næstu þriggja ára.

Nánari upplýsingar : www.kraumur.is

Hönnunarsjóður Auroru
Hönnunarsjóður Auroru var stofnaður fyrir tveimur árum síðan og fær nú úthlutað í þriðja sinn 25 milljónum króna.  Sjóðurinn hefur styrkt og starfað með fjölbreyttum hópi hönnuða en markmið sjóðsins er að styðja hönnuði og aðstoða þá við að koma sjálfum sér, hugmyndum sínum, vörum og verkefnum á framfæri hérlendis og erlendis. Auk þessa miðlar sjóðurinn einnig þekkingu á sviði hönnunar og arkitektúrs, í samstarfi við aðra aðila í faginu, eftir því sem við á. Hönnunarsjóði Auroru er þannig ætlað að styðja við bak efnilegra hönnuða og efla grasrótarstarf í hönnun.  Sjóðurinn leggur áherslu á að styðja verkefni sem skara fram úr á einhvern hátt, hvetja þannig til hugmyndaauðgi og skapandi hugsunar í íslenskri hönnun.

Nánari upplýsingar: www.honnunarsjodur.is

UNICEF – menntaverkefni í Afríkuríkinu Síerra Leóne
Aurora úthlutar í fjórða sinn 40 milljónum króna til að byggja upp barnvænt menntakerfi og skólahúsnæði, einkum með þarfir stúlkubarna í huga. Þetta er liður í veigamesta verkefni sjóðsins frá stofnun en alls hefur verið varið 160 milljónum króna til verkefnisins.  Verkefnið er unnið í samvinnu við menntayfirvöld þar í landi og UNICEF á Íslandi og í Síerra Leóne.  Í krafti þess hafa á annað hundrað kennarar hlotið endurmenntun og um 60 skólabyggingar risið með tilheyrandi vatnsveitu- og frárennsliskerfum, húsbúnaði og kennslugögnum.  Mikið er lagt í endurmenntun kennara og þjálfun í kennsluaðferðum þar sem barnið er sett í forgang, auk þess sem samfélagið er virkjað með því að stofna foreldrafélög við skólanna og mæðraklúbba.   Verkefnið hefur gengið mjög vel og er verið að skoða það að nota sömu aðferðafræði á fleiri svæðum í Síerra Leóne.

Nánari upplýsingar: www.unicef.is og www.aurorafund.is,

Þetta er í fjórða sinn sem styrkir eru veittir úr Aurora velgerðasjóði sem stofnaður var í janúar 2007 af hjónunum Ingibjörgu Kristjánsdóttur og Ólafi Ólafssyni sem lögðu honum til einn milljarð í stofnfé.  Á þessum árum hefur fjármunum verið varið úr sjóðnum til verkefna sem stuðlað geta að betra mannlífi á Íslandi og í þróunarlöndum.  Aurora velegerðasjóður er sjálfseignastofnun sem hefur verið trú þeim meginmarkmiðum sínum að styrkja fá en stór verkefni þar sem þörf er fyrir verulega fjármuni til að þau geti orðið að veruleika og dafnað.
Stjórn sjóðsins tekur jafnframt mið af því að viðkomandi verkefni hafi afgerandi áhrif í samfélögum sínum. Lögð er áhersla á að fjárframlög sjóðsins á Íslandi efli nýsköpun og sprotastarfsemi og auðgi þannig flóru atvinnugreina í landinu. Verkefni, sem Aurora styrkir í þróunarlöndunum, eru fyrst og fremst tengd menntun og menningu. Leitast er við að fylgja verkefnum vel eftir og aðstoða styrkþega og samstarfsaðila eftir föngum.
l


Kraumslistinn 2010

Kraumslistinn – árleg plötuverðlaun Kraums tónlistarsjóðs til þeirra verka í íslenskri plötuútgáfu sem þótt hafa framúrskarandi og spennandi á árinu – var kynntur þriðja árið í röð miðvikudaginn 22. desember. Árni Matthíasson, formaður dómnefndar, kynnti þar niðurstöðu dómnefnar um verðlaunaplöturnar, sem líkt og síðustu tvö ár eru sex talsins fyrir árið 2010. Auk þess léku þau Ólöf Arnalds og hljómsveitin Ég lög af plötum sínum sem báðar eru á Kraumslista ársins.

Kraumslistinn 2010 – Eftirtalda plötur hljóta verðlaun

Apparat Organ Quartet, Daníel Bjarnason, Ég, Jónas Sigurðsson, Nolo og
Ólöf Arnalds eru á Kraumslistanum 2010 og hljóta plötuverðlaun Kraums.

Þeir titlar sem hljóta plötuverðlaun Kraums hljóta stuðning frá Kraumi í formi plötukaupa og kynningu á verðlaunaplötunum á erlendum vettvangi. Samtals hafa nú 60 hljómplötur verið tilnefndar til verðlaunanna og lent á úrvalslista Kraumslistans og 12 hljómplötur – frá flytjendum á borð við Hjaltalín, Huga Guðmundsson, Ísafold kammersveit, Agent Fresco og FM Belfast – komist á lokalista Kraumslistans árin 2008-2010.

Val dómnefndar Kraumslistans, bæði hvað varðar tilnefningar og verðlaunaplötur, kemur oft á óvart og þar leynast oft hljómplötur sem með valinu fá verðskuldaða athygli.

Óhætt að segja að árið í ár hafi verið öflugt hvað plötuútgáfu varðar, enda fjölmargir spennandi titlar sem ekki komast á úrvalslista Kraumslistans fyrir árið 2010.

Kraumslistinn
Kraumslistanum (stundum kölluð Kraumsverðlaun) er ætlað að styðja við plötuútgáfu íslenskra hljómsveita og listamanna – með því að styðja og vekja sérstaka athygli á því sem er nýtt og spennandi – og þeim verkum sem skara fram úr í gæðum, metnaði og frumleika. Kraumslistinn er ekki bundinn neinni ákveðinni tónlistarstefnu og honum fylgja engir undirflokkar. Það er von aðstandenda Kraumslistans að valið veki athygli á flottri og fjölbreyttri íslenskri plötuútgáfu, þegar jólagjafaflóðið er við það að skella á, og listamenn reiða sig hvað mest á plötusölu.

Verðlaun
Kraumur mun styðja við þær plötur sem dómnefnd velur á Kraumslistann, og jafnframt auka við möguleika listamannanna bakvið þær til að koma verkum sínum á framfæri utan landsteinana, með því að kaupa ákveðinn fjölda af plötunum (100 stk hver plata árin 2008 og 2009) og dreifa til ýmissa starfsmanna tónlistarbransans erlendis (tónlistarhátíðir, plötuútgáfur, umboðsskrifstofur o.s.frv.), í samvinnu við Útflutningskrifstofu íslenskrar tónlistar (ÚTÓN).


Haustúthlutun Hönnunarsjóðsins

Hönnunarsjóður Auroru veitir 6.000.000 til fjögurra verkefna.  Þetta er fimmta úthlutun úr sjóðnum síðan hann var stofnaður þann 13.febrúar 2009.  Ákveðið var að hafa þrjár úthlutanir á þessu ári til þess að koma til móts við verkefnahraða.

Þriðja úthlutun Hönnunarsjóðs Auroru fyrir árið 2010 fór fram þann 21. október í húsnæði sjóðsins að Vonarstræti 4b.

Sjóðurinn hefur leitast við að styrkja hönnuði með heilsteypta viðskiptahugmynd og skýra framtíðarsýn með það í huga að stuðningur sjóðsins hafi afgerandi áhrif í ferli viðkomandi hönnuðar í átt til frekari fjármögnunarmöguleika og/eða sjálfbærni. Í þessari úthlutun voru fjórir hönnuðir styrktir til frekari þróunar og framgangs verkefna sinna.  Hönnunarsjóðurinn hefur mótað sér þá stefnu að fylgja eftir völdum verkefnum þannig að sá árangur sem viðkomandi hönnuður stefnir að megi nást.
Þrír hönnuðir fá framhaldsstyrki að þessu sinni til frekar eflingar verkefna sinna en einn hönnuður er að fá styrk í fyrsta skipti úr sjóðnum.
Þeir hönnuðir sem fengu úthlutað eru:
VERKEFNI: EAU DE PARFUM

VERKEFNI: KRON BY KRONKRON

VERKEFNI: FRAMLEIÐSLA SÉRVERKEFNA

VERKEFNI: MUNDI

Nánari upplýsingar um styrki og störf Hönnunarsjóðs Auroru er að finna á www.honnunarsjodur.is


Útvarp barna í Mósambík

Á hverjum laugardagsmorgni kveikja þúsundir barna á útvarpinu til  að hlusta á Paulo Manjate, 16 ára útvarpsmann sem sér um vinsælan þátt í útvarpi barna í Mósambík..

Á síðastliðnu ári styrkti Aurora Velgerðasjóður verkefni Unicef á Íslandi í Mosambík. Þetta er verðlaunað útvarpsverkefni með börnum og ungmennum í Mósambík og til að gefa ykkur smá innsýn í störf barnanna þá er hér stutt frásögn sem við fengum senda frá Unicef um starfsemi og áhrif sem þessi útvarpstöð hefur á líf og störf barnanna þar í landi.
Útvarp barna í Mósambík – jafningjafræðsla og þátttaka barna í samfélaginu

Á hverjum laugardagsmorgni kveikja þúsundir barna á útvarpinu til  að hlusta á Paulo Manjate, 16 ára útvarpsmann sem sér um vinsælan þátt í útvarpi barna í Mósambík.
„Góðan daginn öllsömul, þið eruð að hlusta á útvarpsþáttinn ‘Happy class’ og við bjóðum ykkur hjartanlega velkomin,” segir Paulo og byrjar þannig þátt sinn í beinni útsendingu frá útvarpsstöð í Mósambík. Útvarpsþáttur þessi er hluti af stærra verkefni þar sem börn eru þáttastjórnendur og framleiðendur útvarpsefnis fyrir jafnaldra sína. UNICEF styður börnin í þáttagerðinni en þau hafa sjálf frjálsar hendur í efnisvali og umfjöllun.

Í nær klukkustund hafa hinir ungu hlustendur tækifæri til þess að taka þátt í samkeppnum, hlusta á uppáhaldstónlistina sína og fá ráðleggingar frá öðru ungu fólki sem deila með þeim áhugamálum og erfiðleikum.
„Þættirnir okkar eru mikilvægir vegna þess að þeir gefa okkur tækifæri til þess að koma skilaboðum áleiðis til annarra barna um réttindi okkar,” segir Paulo.
Það sem gerir útvarpsþættina enn vinsælli meðal barna er að þættirnir eru ekki aðeins teknir upp í stúdíóinu. Paulo og framleiðsluteymið hans, sem eru öll unglingar á hans aldri, fara oft á stúfana með hljóðnema og útsendingarbíl og hitta jafnaldra sína á heimavelli.
„Oft erum við með útsendingar frá skólum og hátíðahöldum – í raun sendum við út hvaðan sem við finnum hópa af börnum og unglingum sem við getum átt samskipti við,” segir Paulo.

Eftir að útvarpsþættinum lýkur, um hádegisbil á laugardögum, fer Paulo aftur heim til fjölskyldu sinnar og vina þar sem hann fær innblástur fyrir næsta þátt.

UNICEF hefur stutt útvarpsþætti barna hjá Radio Mozambique síðan í febrúar 2000. Radio Mozambique sendir út 34 útvarpsþætti barna um gjörvalla Mósambík – 23 þeirra eru á tungumálum heimamanna og 11 eru á portúgölsku. Efni þáttanna er allt frá umræðu um ofbeldi og misnotkun barna, HIV/alnæmi, heilsu, menntun, umhverfisvernd og að sjálfsögðu tónlist og skemmtiefni.
Ábyrgðarhlutverk útvarpsmannsins.
Narcisso er 12 ára gamall drengur sem er fullur sjálfstrausts. Hverja helgi  vinnur hann að útvarpsþáttum barna fyrir útvarpsstöðina Xai Xai. Narcisso hélt nýlega í efnisleit í Chibuto-hérað þar sem hann heimsótti grunnskóla til  að afla upplýsinga um þau vandamál  sem standa grunnskólastarfi í héraðinu fyrir þrifum.
„Mér finnst gaman að komast út úr stúdíóinu vegna þess að þá fæ ég tækifæri til að rannsaka alvörumál og spyrja spurninga sem önnur börn myndu vilja spyrja – ég tek þá ábyrgð mjög alvarlega,” segir hann.
Um 1000 börn og ungmenni vinna að útvarpsþáttum barna víðsvegar um Mósambík og ná þau til fleiri þúsunda barna um gjörvallt landið. Útvarpsverkefnið hefur stækkað óðfluga síðustu ár og vinsældir útvarpsþátta barnanna hafa aukist jafnt og þétt. Með þessari vinsældaaukningu hafa sífellt fleiri samfélagsútvarpsstöðvar ákveðið að bjóða upp á útvarpsþætti barna en nú bjóða um 50 smærri útvarpsstöðvar upp á þennan skemmtilega og valdeflandi dagskrárlið fyrir börn.


Brúðuheimar

Lista- og menningarmiðstöðin Brúðuheimar var opnuð í Borgarnesi í gær við hátíðlega athöfn í gömlu kaupfélagshúsunum í Englendingavík innan við Brákarsund.  Þar eru brúður í öllum mögulegum myndum í aðalhlutverki.

Það var Vigdís Finnbogadóttir, fyrrverandi forseti, sem opnaði formlega Brúðuheima, þennan mikla ævintýraheim, en opnun Brúðuheima var hugsanlega stærsta ævintýri lífsins fyrir aðstandendur verkefnisins að þeirra sögn.
Brúðuheimar er frumkvöðlaverkefni hjónanna Bernd Ogrodnik brúðulistamanns og Hildar Jónsdóttur framkvæmdastjóra. Miðstöðin er annars vegar gagnvirkt leikbrúðusafn og hins vegar brúðuleikhús sem sýnir verk fyrir bæði börn og fullorðna.
Brúður Bernds eru  aðal aðdráttarafl Brúðuheima  og í leikbrúðusafninu er fjöldinn allur af kunnulegum persónum, s.s. ljóti andarunginn úr sýningu Þjóðleikhúsins á Klaufum og kóngsdætrum, vondu skógarnornirnar úr sýningu Borgarleikhússins á Ronju ræningjadóttur, mannætuplantan Audrey úr sýningu Leikfélags Akureyrar á Litlu Hryllingsbúðinni að ógleymdum Pappírs Pésa sjálfum.
Brúður Bernds  er einnig  hægt að sjá í fullu fjöri allar helgar en þá verður boðið upp á sýningar í brúðuleikhúsinu.
Kaffihús staðarins er einn ævintýraheimurinn til viðbótar en þar er lögð áhersla á barnvænar veitingar með hollustuna í fyrirrúmi. Á loftinu fyrir ofan kaffihúsið er leikherbergi fyrir börnin þar sem þau getað skapað sinn eigin ævintýraheim með leikbrúðum og leikbúningum.  Einnig er hægt að setjast út á pall á góðviðrisdögum en þaðan eru einungis nokkrir metrar niður í fjöru þar sem krakkarnir geta leikið sér. Og ekki skemmir það fyrir að næsti nágranni Brúðuheima er hinn landsfrægi Bjössaróló.
Heimsókn í Brúðuheima er ævintýraleg upplifun og skemmtileg samverustund fólks á öllum aldri og er Aurora velgerðasjóður afar stolt af að hafa átt þess kost að leggja þeim lið við þetta verðuga verkefni.


Vorúthlutun Hönnunarsjóðs Auroru

Þetta var fjórða úthlutun úr sjóðnum frá því hann var stofnaður þann 13.febrúar 2009 og önnur úthlutun þessa árs. Ákveðið var að hafa þrjár úthlutanir á þessu ári til þess að koma til móts við hraða verkefna í faginu.
Þetta var fjórða úthlutun úr sjóðnum frá því hann var stofnaður þann 13.febrúar 2009 og önnur úthlutun þessa árs.
Ákveðið var að hafa þrjár úthlutanir á þessu ári til þess að koma til móts við hraða verkefna í faginu. Sú fyrsta fór fram 17.febrúar s.l. þar sem 7.880.000 kr. var úthlutað. Í gær var úthlutað 4.000.000 kr. og þar með hefur um 33.000.000 kr. verið úthlutað til um 25 hönnuða og verkefna frá því Hönnunarsjóðurinn hóf starfsemi sína.

Sjóðurinn hefur leitast við að styrkja hönnuði með heilsteypta viðskiptahugmynd og skýra framtíðarsýn með það í huga að stuðningur sjóðsins hafi afgerandi áhrif í ferli viðkomandi hönnuðar í átt til frekari fjármögnunarmöguleika og/eða sjálfbærni. Í því samhengi hefur verið stefna hjá Hönnunarsjóðnum að veita hönnuðum ráðgjöf í viðskiptum og framleiðslu og tækni. Þetta er unnið í samvinnu við viðkomandi hönnuð og fagaðila. Framhald verður á þessu og mun Hönnunarsjóðurinn nú styrkja Unu Hlín Kristjánsdóttur með fatamerki sitt Royal Extreme til slíkrar ráðgjafar að verðmæti 250.000 kr. Önnur slík verkefni eru einnig í farvatninu og til þeirra ráðstafað 250.000 kr.

Af sama meiði sprettur styrkur til LungA, listahátíð á Seyðisfirði. Sjóðurinn mun verðlauna tvo framúrskarandi þáttakendur í hönnunarsýningu LungA, en verðlaunin verða á formi sérsniðinnar ráðgjafar að verðmæti 250.000 kr. LungA fagnar 10 ára afmæli sínu í ár og er því vel við hæfi að huga að næstu skrefum.

Sérstakir starfsreynslustyrkir fyrir nýlega útskrifaða hönnuði, voru fyrst kynntir í október s.l. Þessum styrkjum er ætlað að fjölga tækifærum fyrir nýlega útskrifaða hönnuði á vinnumarkaði, auka færni þeirra og efla tengslanet innan greinarinnar, enda er vilyrði starfandi hönnuðar, arkitekts eða fyrirtækis forsenda umsóknar. Nú er það Hreinn Bernharðsson sem fær 550.000 kr. styrk til þriggja mánaða starfsreynslu hjá Hrafnkeli Birgissyni vöruhönnuði. Þeir munu vinna að ýmsum verkefnum á Íslandi og í Danmörku í sumar.
Hafsteinn Júlíusson með vörumerki sitt HAF, fær 1.500.000 kr. til vöruþróunar og markaðssetningar. HAF var kynnt í Mílanó í síðasta mánuði og hlaut góðar undirtektir og athygli. Hafsteinn útskrifaðist frá LHÍ 2008 með BA próf í vöruhönnun, 2009 með Master í innahúss- og iðnhönnun og hefur síðan starfað fyrir ítalska hönnuðinn Diego Grandi á Ítalíu.

Hönnunarsjóðurinn hefur lagt sig fram um að styrkja einnig verkefni sem þjóna hagsmunum margra, s.s. hönnunarsýningar, sem styðja við greinina. Og að þessu sinni fær slíkan styrk Sigríður Sigurjónsdóttir 1.200.000 kr. til sýningahalds í SPARK design space, sem er nýstofnað hönnunargallerí í Reykjavík. Í fréttatilkynningu frá SPARK segir að “starfsemi gallerísins sé vettvangur fyrir íslensk og erlend hönnunarverkefni en sérstök áhersla verður lögð á verkefni sem fela í sér samstarf hönnuða við aðrar starfsstéttir. Þar verður boðið upp á verkefni og viðburði sem spennandi verður að fylgjast með.“ Fyrsta sýningin opnar í júlí.
Nánari upplýsingar um styrki og störf Hönnunarsjóðs Auroru er að finna á www.honnunarsjodur.is


Kraumur kynnir stuðning við íslenskt tónlistarlíf

Kraumur tónlistarsjóður kynnti þann 15. apríl síðastliðinn fyrstu úthlutanir sínar og stuðning við íslenskt tónlistarlíf, tónlistarmenn og hljómsveitir fyrir árið 2010.

Kraumur tónlistarsjóður kynnti þann 15. apríl síðastliðinn, fyrstu úthlutanir sínar og stuðning við íslenskt tónlistarlíf, tónlistarmenn og hljómsveitir fyrir árið 2010.
Tuttugu listamenn og hljómsveitir hljóta beinan stuðning frá Kraumi og samstarf við verkefni sín á árinu; Bang Gang, Bloodgroup, Bryndís Jakobsdóttir, Daníel Bjarnason, Einar Scheving, Feldberg, FM Belfast, Hafdís Bjarnadóttir, Kammerkórinn Carmina, K-tríó, Leaves, Mammút, Ourlives, Ólöf Arnalds, Retro Stefson, Samúel Jón Samúelsson Big Band, Seabear, Sólstafir, Trúbatrix hópurinn og Víkingur Heiðar Ólafsson. Kraumur mun jafnfram halda áfram með eigin verkefni; m.a. að styðja við íslenska plötuútgáfu, verðlauna framúrskarandi árangur á því sviði með Kraumslistanum – sem og halda Hljóðverssmiðjur í sumar með ungum og upprennandi hljómsveitum og listamönnum.
Samtals er nú verið að veita 11,7 milljónum króna til margvíslegra verkefna á sviði íslenskrar tónlistar. Alls bárust 208 umsóknir í nýliðnu umsóknarferli. Yfirlýst stefna sjóðsins er að styrkja tiltölulega fá verkefni/listamenn, en gera það þannig að stuðningurinn sé afgerandi.
Áhersla er lögð á kynningu á íslenskri tónlist og verkum íslenskra listamanna á erlendri grundu í stuðningi Kraums að þessu sinni – auk stuðning við starfsemi listamanna og hljómsveita hérlendis; allt frá vinnu við lagasmíðar og upptökur á eigin verkum, til námskeiða og tónleikahalds á landsbyggðinni.

KYNNING Á ÍSLENSKRI TÓNLIST Á ERLENDUM VETTVANGI
Stærstu samstarfsstyrkina að þessu sinni fá hljómsveitin FM Belfast, við tónleikahald og kynningu á verkum sínum erlendri gundu, og tónskáldið Daníel Bjarnason við eftirfylgni og kynningarstarf á breiðskífu sinni Processions á alþjóðvettvangi. Kraumur styður bæði verkefnin um 1.000.000 króna hvort. Kraumur efnir sömuleiðis til samstarfs og stuðnings við Feldberg, Mammút, Ourlives, Ólöf Arnalds, Seabear, Samúel Jón Samúelsson Big Band og Sólstafir við að koma sér og verkum sínum á framfæri erlendis.
Daníel Bjarnason er klassískt tónskáld sem verið hefur iðinn við að brjóta niður þá múra sem tengjast slíkri nafnbót. Það má segja að Daníel sé að sumu leyti að feta nýja slóð fyrir klassísk tónskáld á okkar tímum og koma klassískri tónlist til breiðari hóps áheyranda. Procession er þegar farin að fá góða dóma og viðtökur á alþjóðavettvangi og með frekari kynningu og tónleikahaldi nær hún vonandi eyrum enn fleiri.
Hljómsveitin FM Belfast er á öðrum enda tónlistarlitrófsins, leikur dans- og popptónlist, og hefur vaxið gríðarlega sem tónleikasveit síðan hún kom fyrst fram á Iceland Airwaves hátíðinni árið 2006. Sveitin gerði og gaf út sína fyrstu breiðskífu, How to Make Friends, með stuðningi Kraums árið 2008 og síðan hefur orðspor sveitarinnar farið langt út fyrir landsteinana. Árið 2010 ætlar sveitin að leggja áherslu á útlönd og mun sveitin m.a. koma fram á tónlistarhátíðum og bransasamkomum víð um Evrópu, m.a. Hróaskeldu og SPOT.
PLÖTUGERÐ OG INNLEND VERKEFNI
Kraumur heldur áfram að styðja við verkefni listamanna og hljómsveita hérlendis við að lagasmíðar, upptökur og við að útgáfu á verkum sínum. Kraumur efnir til samstarfs og stuðnings við Bang Gang, Bryndísi Jakobsdóttir, Einar Scheving, Hafdísi Bjarnadóttir, Leaves, Retro Stefson og Víking Heiðar Ólafsson við verkefni sín á sviði lagasmíða, vinnu, útgáfu og/eða kynningu á eigin verkum. Allir þessir listamenn stefna á að gefa út nýjar breiðskífur á árinu.
Kraumur heldur Innrásinni – stuðningi sínum við tónleikahald innanlands – áfram á árinu. Markmið Innrásarinnar er að auka við möguleika listamanna til tónleikahalds, gefa þeim færi á að koma sér og tónlist sinni á framfæri víðar en á höfuðborgarsvæðinu og efla tónlistarlíf á landsbyggðinni. Fjölmargir listamenn og hljómsveitir hafa lagt land undir fót og haldið tónleika víðsvegar um landið síðustu tvö ár undir merkjum Innrásarinnar.
Innrás Kraums mun styðja við tónleika og tónleikaferð Kammerkórsins Carmina, K-tríó, Trúbatrix hópsins (Myrra Rós Þrastardóttir, Miss Mount, Elín Ey, Elíza, Pascal Pinon, Mysterious Marta og fjöldi annara tónlistarkvenna) og Bloodgroup í Reykjavík og á landsbyggðinni. Blodgroup mun sömuleiðis standa fyrir tónleikum í Færeyjum með stuðningi Kraums. Tími til komin að þakka Færeyjingum fyrir hjálpina með því að færa þeim frábæra tónlist frá Íslandi.
KRAUMSLISTINN OG STARFSEMIN 2010
Kraumur hefur það sem af er þessu ári staðið fyrir námskeiði og opinni ráðstefnu fyrir tónlistarmenn og tónlistaráhugamenn á og í samvinnu við Aldrei fór ég suður, staðið fyrir Leit að ungum tónskáldum í samstarfi við Við djúpið og Rás 1 og sem einn samstarfsaðila Músíktilrauna í mars valið þrjár hljómsveitir til þátttöku í Hljóðverssmiðjum Kraums – þar sem ungum og upprennandi hljómsveitir fá fræðslu, handleiðslu og aðstöðu til að taka upp eigð efni með aðstoð fagmanna.
Kraumur hefur sömuleiðis keypt (100 stk af hverjum titli) og kynnt þær sex hljómplötur sem hlutu viðurkenningu Kraumslistans 2009 (áður Kraumsverðlaun) – meðal annars með útsendingum á tónleikahaldara, plötuútgáfur og tengiliði erlendis. Plöturnar eru; Anna Guðný Guðmundsdóttir – Vingt regards sur l’enfant-Jésus, Bloodgroup – Dry Land, Helgi Hrafn Jónsson – For the Rest of my Childhood, Hildur Guðnadóttir – Without Sinking, Hjaltalin – Terminal og Morðingjarnir – Flóttinn mikli. Kraumslistinn 2010 verður kynntur í desember í ár og mun Kraumur veita þeim plötum sem hljóta viðurkenningu samskonar stuðning.
Nánari upplýsingar veitir Eldar Ástþórsson, framkvæmdastjóri Kraums tónlistarsjóðs, eldar@kraumur.is eða www.kraumur.is


Aurora velgerðasjóður ráðstafar 100 milljónum króna til fjögurra verkefna á Íslandi og í Afríku

Stjórn Auroru velgerðasjóðs kynnti í dag þá ákvörðun sína að veita alls 100 milljónir króna til fjögurra verkefna á sviði mannúðar, mennta og menningar hérlendis og í Afríkuríkinu Síerra Leóne.

Nýtt styrktarverkefni sjóðsins er Brúðuheimar í Borgarnesi, lista- og menningarmiðstöð, sem verður mikilvægur þáttur í menningartengdri ferðaþjónustu á svæðinu.  Brúðuheimar fá 15 milljónir króna, þar af 7 milljónir króna í formi láns.
Þrjú verkefni fá styrki í annað eða þriðja sinn: Hönnunarsjóður Auroru fær 25 milljónir króna, Kraumur, tónlistarsjóður Auroru, fær 20 milljónir króna og menntaverkefni í Síerra Leóne fær 40 milljónir króna.
Þetta er í þriðja sinn sem styrkir eru veittir úr Auroru velgerðasjóði, sem hjónin Ingibjörg Kristjánsdóttir og Ólafur Ólafsson stofnuðu í janúar 2007 og lögðu til einn milljarð króna. Á þessum þremur árum hefur fjármunum verið varið úr sjóðnum til verkefna sem stuðlað geta að betra mannlífi á Íslandi og í þróunarlöndunum. Stofnfé Auroru velgerðasjóðs hefur ávaxtast ágætlega og er í dag um 1,3 milljarðar króna.
Sjóðurinn hefur verið trúr þeim meginmarkmiðum sínum að styrkja fá en stór verkefni þar sem þörf er fyrir verulega fjármuni til að þau geti orðið að veruleika og dafnað.  Sjóðsstjórn tekur jafnframt mið af því að viðkomandi verkefni hafi afgerandi áhrif í samfélögum sínum. Lögð er áhersla á að fjárframlög sjóðsins á Íslandi efli nýsköpun og sprotastarfsemi og auðgi þannig flóru atvinnugreina í landinu. Verkefni, sem Aurora styrkir í þróunarlöndunum, eru tengd menntun og menningu en einnig heilsugæslu. Leitast er við að fylgja verkefnum vel eftir og aðstoða styrkþega og samstarfsaðila eftir föngum.
Frá stofnun, fyrir þremur árum, hefur Aurora velgerðasjóður ráðstafað alls 322,5 milljónum króna til 11 verkefna.  Þar af hafa 144,5 milljónir króna runnið til fjögurra verkefna í Afríku og Nepal og 178 milljónir króna til sjö verkefna hér á landi. Þess má geta að áður en sjóðurinn var formlega stofnaður styrktu þau Ingibjörg og Ólafur tvö verkefni, hér á landi og í Afríkuríkinu Síerra Leóne, um 78 milljónir króna, þannig að heildarupphæð styrkja er orðin um 400 milljónir króna.
Landnámssetrið í Borgarnesi er annað þessara tveggja innlendu verkefna og markaði reyndar upphafið að stofnun Auroru velgerðasjóðs. Það er um margt dæmigert fyrir verkefni sem sjóðurinn styrkir hér á landi og setrið  hefur tvímælalaust haft mikil áhrif í heimahéraði sínu og raunar í íslensku samfélagi. Fuglasafn Sigurjóns við Mývatn er annað áhugavert verkefni sem Aurora velgerðasjóður hefur styrkt á landsbyggðinni. Sjóðurinn hefur einnig haft frumkvæði að því að stofna tvo dóttursjóði, Kraum tónlistarsjóð og Hönnunarsjóð Auroru.

Brúðuheimar, lista og menningamiðstöð, er frumkvöðlaverkefni hjónanna Bernd Ogrodnik brúðulistamanns og Hildar Jónsdóttur framkvæmdastjóra. Miðstöðin verður í gömlum húsum sem áður hýstu Kaupfélag Borgfirðinga í Borgarnesi. Húsin eru frá 19. öld og mikilvæg fyrir verslunarsögu landsins, enda eru þau friðuð og er verið að endurgera þau í anda byggingarlistar 19. aldar.
Miðstöðin verður annars vegar gagnvirkt leikbrúðusafn og hins vegar brúðuleikhús sem sýnir verk fyrir bæði börn og fullorðna.  Þar verður einnig rekið kaffihús með sérstaka áherslu á hollustu fyrir börn á öllum aldri.
Heimsókn í Brúðuheima verður ævintýraleg upplifun og skemmtileg samverustund fólks á öllum aldri enda er brúðuleikúsið heillandi heimur út af fyrir sig og höfðar bæði til barna og fullorðinna.
Stefnt er að því að opna Brúðuheima í maí 2010 og verður menningarmiðstöðin rekin árið um kring.

Rökstuðningur Auroru velgerðasjóðs:
Brúðuheimar hafa alla burði til að verða töfraheimur fyrir unga sem aldna enda er listrænn stjórnandi Brúðuheima, Bernd Ogrodnik, meðal fremstu brúðulistamanna heims. Brúðuheimar eru öflug viðbót við menningartengda ferðaþjónustu í Borgarbyggð og munu án efa styrkja þá aðila sem fyrir eru, svo sem Landnámssetrið og Snorrastofu í Reykholti.

Í krafti þessara verkefna hafa á annað hundrað kennarar hlotið endurmenntun og um 60 skólabyggingar risið með tilheyrandi vatnsveitu- og frárennsliskerfum, húsbúnaði og kennslugögnum.
Á árinu sem leið var ákveðið að leggja aukna  áherslu á gæði námsins og að laga það sem best að þörfum barnanna og þá sérstaklega stúlkubarna.  Markmiðið er að halda stúlkunum sem lengst í skóla og koma þannig í veg fyrir að þær gengi í hjónaband og hefji barneignir á æskuárum.  Meira er því lagt í endurmenntun kennara og þjálfun í kennsluaðferðum þar sem barnið er sett í forgang, auk þess sem samfélagið er virkjað með því að stofna foreldrafélög við skólana og mæðraklúbba.  Frekari upplýsingar um verkefnið er að finna á heimasíðu Auroru velgerðasjóðs, http://www.aurorafund.is/, og einnig á heimasíðu UNICEF, www.unicef.is

Starfsemi Kraums tónlistarsjóðs hefur verið umfangsmikil og blómleg. Á þessum tveimur árum hefur sjóðurinn úthlutað tæplega 30 milljónum króna í beinum styrkjum til 74 tónlistarmanna, hljómsveita og tónlistartengdra verkefna.  Einnig hefur sjóðurinn átt fjölbreytt samstarf við ýmsa aðila innan tónlistargeirans. Sjóðurinn hefur m.a. styrkt tónleika og tónleikaferðalög heima og heiman, aðstoðað við markaðssetningu erlendis og staðið fyrir nýjum tónlistarviðurkenningum, Kraumslistanum.
Ljóst  er að nærvera sjóðsins skiptir miklu máli í íslensku menningarlífi, sem marka má til dæmis af því að tæplega 200 umsóknir bárust þegar síðast var auglýst úthlutun úr sjóðnum! Framkvæmdastjóri Kraums, tónlistarsjóðs Auroru, er Eldar Ástþórsson.  Frekari upplýsingar eru á líflegri heimasíðu Kraums, www.kraumur.is.

Markmið með stofnun sjóðsins var að virkja kraftinn, sem býr í hönnunargeiranum, með beinum fjárframlögum til framúrskarandi hönnuða og auðvelda þeim að koma sjálfum sér, hugmyndum sínum og vörum á framfæri hérlendis og erlendis, enn fremur að miðla þekkingu á þessu sviði, efla grasrótarstarf og stuðla að samstarfi hönnuða og aðila úr athafnalífinu. Lagt er upp úr því að koma ungum hönnuðum til aðstoðar með ráðgjöf, tengslamyndun og starfsnámsstyrkjum.
Sjóðurinn leggur áherslu á að styðja verkefni sem skara fram úr á einhvern hátt og hvetja þannig til hugmyndaauðgi og skapandi hugsunar í íslenskri hönnun.
Það sem af er hefur Hönnunarsjóður Auroru úthlutað alls 30 milljónum í beinum styrkjum til 25 verkefna og hönnuða og hann hefur einnig tekið þátt í samstarfi um ýmis verkefni á sviði hönnunar. Framkvæmdastjóri sjóðsins er Hlín Helga Guðlaugsdóttir. Frekari upplýsingar um Hönnunarsjóð Auroru eru á heimasíðu sjóðsins, www.honnunarsjodur.is


Úthlutun úr Hönnunarsjóði Auroru 17.febrúar 2010

Átta hönnuðir og arkitektar fengu úthlutað 7.880.000 kr. úr Hönnunarsjóði Auroru í gær við hátíðlega athöfn í Listasafni Íslands þar sem Marengs sá um snilldar veitingar.

Átta hönnuðir og arkitektar fengu úthlutað samtals 7.880.000 kr. úr Hönnunarsjóði Auroru í gær við hátíðlega athöfn í Listasafni Íslands þar sem Marengs sá um snilldar veitingar.

Þrjú ný verkefni fá styrk að þessu sinni, en að baki þeim stendur fjölbreyttur hópur fólks.

Hönnunarsjóðurinn mun halda áfram stuðningi við eftirtalda einstaklinga, sem öll eru í markaðssókn erlendis;
Auk þessa eru veittir tveir styrkir til nýlega útskrifaðra hönnuða til starfsreynslu hjá starfandi hönnuði eða arkitekt á Íslandi. Hönnunarsjóðurinn kynnti slíka styrki fyrst í Október s.l. Þetta eru annarsvegar Kristrún Thors vöruhönnuður til starfsreynslu hjá Guðrúnu Lilju Gunnlaugsdóttur í Studio Bility. Hinsvegar Laufey Jónsdóttir, fatahönnuður sem fær nú úthlutlað seinni hluta styrks sem úthlutað var í Október s.l. en hún vinnur að hönnun fatalínunnar Blik hjá Glófa ehf.
Að þessu sinni bárust Hönnunarsjóðnum 62 umsóknir á sviði arkitektúrs, grafískrar hönnunar, landslagsarkitektúrs, fatahönnunar og vöruhönnunar. Fjölbreytileiki umsóknanna gefur Hönnunarsjóðnum tækifæri til að breikka starfssvið sitt enn frekar og koma að fjölbreyttum verkefnum á öllum sviðum hönnunar og arkitektúrs.

Um er að ræða fyrstu úthlutun ársins af þremur en næsta úthlutun er áætluð í maí og svo í  september. Umsóknarfrestur verður auglýstur sérstaklega á heimasíðu sjóðsins (http://www.honnunarsjodur.is/). Þetta er gert til að mæta enn frekar hraða og veltu verkefna í faginu.

Hönnunarsjóður Auroru var stofnaður 13 febrúar 2009 af Auroru Velgerðarsjóði og er því árs gamall um þessar mundir. Á fyrsta starfsári Hönnunarsjóðsins hlutu 18 verkefni alls 22.660.000 kr í styrki, en þar af koma 3.660.000 kr til greiðslu á þessu ári. Fatahönnuðir og vöruhönnuðir voru atkvæðamestir í umsóknum og einnig úthlutuðum styrkjum, en samstarfsverkefni sjóðsins voru hins vegar af ýmsum toga, t.d  Hagnýtt Hádegi, fyrirlestrarröð um praktísk málefni, Íslensk samtímahönnun, farandsýning Hönnunarmiðstöðvar Íslands til kynningar á íslenskri hönnun erlendis og Auroru letrið, Copper Stencil eftir Gunnar Þór Vilhjálmsson. Að auki kynnti Hönnunarsjóðurinn sérstaka styrki til nýlegra útskrifaðra hönnuða og arkitekta í starfsreynslu hjá starfandi fagfólki.

Meðal þeirra sem sjóðurinn hefur styrkt og starfað með á þessu fyrsta starfsári sínu má nefna Andreu Maack, Bóas Kristjánsson, Charlie Strand, Jón Björnsson, Hugrún Árnadóttir og Magni Þorsteinsson, Gunnar Þ. Vílhjálmsson, Guðrúnu Lilju Gunnlaugsdóttur, Katrínu Ólínu, Lindu Björg Árnadóttir, Laufeyju Jónsdóttur, Söru Maríu Júlíusdóttur, Sonju Bent, Snæbjörn Stefánsson, Stefnumót bænda og hönnuða við LHÍ og Hönnunarmiðstöð Íslands. Hönnunarsjóðurinn er stoltur bakhjarl og samstarfsaðili allra þessara verkefna.

Nánari upplýsingar og myndefni veitir:
Hlín Helga Guðlaugsdóttir, frkvstj. Hönnunarsjóðsins
s. 699-7733 / hlin@honnunarsjodur.is

Forsíða


Kraumslistinn 2009 tilkynntur

Kraumslistinn, sérstök viðurkenning Kraums tónlistarsjóðs til þeirra verka sem þótt hafa framúr-skarandi, frumleg og spennandi í íslenskri plötuútgáfu á árinu, var kynntur annað árið í röð í dag, miðvikudaginn 16. desember.
Kraumslistinn, sérstök viðurkenning Kraums tónlistarsjóðs til þeirra verka sem þótt hafa framúrskarandi, frumleg og spennandi í íslenskri plötuútgáfu á árinu, var kynntur annað árið í röð í gær, miðvikudaginn 16. desember.
Athöfnin fór fram í húsnæðinu að Vonarstræti 4B – sem rýmir Kraum tónlistarsjóð og Hönnunarsjóð Auroru.  Þórunn Sigurðardóttir stjórnarformaður Kraums bauð fólk velkomið, Eldar Ástþórsson framkvæmdastjóri Kraums kynnti hugmyndafræði Kraumslistans og stuðninginn sem sjóðurinn mun veita þeim plötum sem dómnefnd valdi. Framkvæmd Kraumslistans er með þeim hætti að sérstök dómnefnd velur úrvalslista (20 plötur) og síðan Kraumslistann 2009 (5 plötur) . Líkt og í fyrra sá dómnefnd sérstaka ástæðu til að verðlauna fleiri en fimm plötur að þessu sinni, en samkvæmt reglum Kraumslistans hefur dómnefnd leyfi til að auka við fjölda verðlaunaplatna, ef sérstakt tilefni þykir til.
Dómnefnd Kraumslistans er skipuð 16 aðilum sem síðustu ár hafa starfað við umfjöllun og spilun á íslenskri tónlist á ýmsum sviðum fjölmiðlunar. Formaður dómnefndar er Árni Matthíasson blaðamaður.
Fram komu Hjaltalín, Helgi Hrafn Guðmundsson og Morðingjarnir sem öll léku órafmagnað.
Formaður dómnefndar Árni Matthíasson tilkynnti um Kraumslistann 2009. Í ár hljóta eftirtaldir listamenn viðurkenningu og stuðning fyrir plötur sínar;
* Anna Guðný Guðmundsdóttir – Tuttugu tillit til Jesúbarnsins
* Bloodgroup – Dry Land
* Helgi Hrafn Jónssonon – For the Rest of My Childhood
* Hildur Guðnadóttir – Without Sinking
* Hjaltalín – Terminal
* Morðingjarnir – Flóttinn mikli

Kraumur mun styðja við þær plötur sem dómnefnd velur á Kraumslistann, og jafnframt auka við möguleika listamannanna bakvið þær til að koma verkum sínum á framfæri utan landsteinana, með því að kaupa ákveðinn fjölda af plötunum og dreifa til ýmissa starfsmanna tónlistarbransans erlendis (tónlistarhátíðir, plötuútgáfur, umboðsskrifstofur o.s.frv.), í samvinnu við Útflutningskrifstofu íslenskrar tónlistar (ÚTÓN).
Kraumslistanum er ætlað að styðja við plötuútgáfu íslenskra hljómsveita og listamanna – með því að styðja og vekja sérstaka athygli á því sem er nýtt og spennandi – og þeim verkum sem skara fram úr í gæðum, metnaði og frumleika. Kraumslistinn er ekki bundinn neinni ákveðinni tónlistarstefnu og honum fylgja engir undirflokkar. Það er von aðstandenda Kraumslistans að valið veki athygli á flottri og fjölbreyttri íslenskri plötuútgáfu, nú þegar jólagjafaflóðið er við það að skella á, og listamenn reiða sig hvað mest á plötusölu.


Ferð stjórnar til Sierra Leone

Það var átta manna hópur Íslendinga sem beið óþreyjufullur við innritunarborðið á flugvellinum á Heathrow til að komast í flug til Freetown, Sierra Leone nú í byrjun nóvember. Flugið var yfirbókað sem jók spennuna enn frekar, okkur var boðið að vera degi lengur í London með góðan vasapening en við afþökkuðum, dagskrá næstu daga var þéttsetin og hafði tekið langan tíma í undirbúningi svo við vildum ólm komast á áfangastað.
Hópurinn sem um ræðir var stjórn Auroru og framkvæmdastjóri ásamt framkvæmdastjóra Unicef á Íslandi.
Tilgangur ferðarinnar var að kynna okkur stöðu menntaverkefnisins sem Aurora styrkir þar í landi og unnið er í samvinnu við Unicef og menntayfirvöld í landinu.   Að sjá hverju hefur verið áorkað og heimsækja nokkra skóla sem komust á legg vegna fjárframlags sjóðsins. En einnig að skoða hugsanleg ný verkefni á vegum hjálparstofnana og jafnvel einstaklinga.
Undanfarin ár hafa tugir skólabygginga risið víðs vegar um landið að tilstuðlan stofnenda velgerðarsjóðsins Auroru.  Til að byrja með var áherslan lögð á byggingu skólahúsnæðis, víðs vegar í afskekktum byggðum landsins, enda var þörfin mikil, þar sem mikið hafði eyðilagst í í borgarastyrjöldinni sem geisaði í landinu frá 1991 – 2002.    50 skólar voru byggðir árið 2007 fyrir fjárframlag frá Ólafi og Ingibjörgu  en í framhaldi af því settu þau á laggirnar velgerðarsjóðinn  og hefur hann styrkt menntaverkefnið síðan 2008. Ákveðið var að einbeita sér að einu héraði og var Kono hérað fyrir valinu.  Það er í austanverðu landinu og liggur að landamærum Gíneu. Þar eru einnig helstu demantanámur landsins og þar af leiðandi fór það hérað mjög illa í borgarastríðinu.  Í dag er áherslan lögð á að auka gæði námsins og að laga það sem best að þörfum barnanna og þá sérstaklega stúlkubarna.  Þar af leiðandi eru færri skólabyggingar reistar en meira lagt í  að endurmennta kennara, og þjálfa þá í kennsluaðferðum þar sem barnið er sett í forgang (child centered teaching).  Við hvern skóla eru stofnaðir “Mothers Clubs” og “School Management Committees”. Tilgangur “Mothers Club” er m.a. að vekja mæður samfélagsins til meðvitundar um mikilvægi menntunar og þá sérstaklega að virkja þær sem eftirlits- og stuðningsaðila dætra sinna á meðan á skólagöngu stendur.  Þær standa vörð um réttindi barna sinna og gegna mikilvægu hlutverki þegar mál koma upp sem tengjast kynferðislegu áreiti eða misnotkun.  Þeirra hlutverk er að fylgja eftir málum sem upp koma og sjá til þess að þau verði kærð til yfirvalda.
Markmiðið með stofnun “School Management Committee” sem er að mörgu leiti sambærilegt foreldraráði, er að samfélagið taki þannig meiri ábyrgð á skólastarfinu.  Það er á ábyrgð foreldraráðsins að skólastarfið gangi sem skyldi, það sér til þess að fá kennara til starfa, það sækir um endurmenntun fyrir þá og sér um öll samskipti við yfirvöld. Með þessu er verið að virkja samfélagið umhverfis hvern skóla,  það er á þeirra valdi að auka menntun og þekkingu barna sinna sem leiðir vonandi til betra lífs í framtíðinni.
En aftur að ferðinni þá flugum við svo snemma á þriðjudagsmorgni frá Freetown, höfuðborg landsins til Kono héraðs og lentum rétt fyrir utan Koidu borg sem er  höfuðborg héraðsins og þriðja stærsta borg landsins. Þar tóku á móti okkur starfsmenn Unicef; Vidhya Gangesh aðstoðar-framkvæmdastjóri Unicef í SL, en hún er frá Indlandi og er með mikla reynslu í þróunarmálum, Alison Parker, tengill á aðal-skrifstofunni í Freetown, Sunkarie Kabba Kamara, yfirmaður skrifstofu Unicef í Makeni,  Mario byggingar-verkfræðingur á vegum Unicef ásamt 4 bílstjórum með sína fararkosti.
Við héldum beint í heimsókn til fyrsta skólans, “Sirajudeen Islamic Primary School” en fyrir styrk frá Auroru var  byggður nýr skóli þar nú í ár. Nemendur eru 438 talsins, stúlkur 224 og drengir 214. Til viðmiðunar voru nemendur þessa skóla árið 2003 90 talsins, 50 stúlkur og 40 drengir. Okkur til mikillar ánægju var yfirkennarinn ung kona en annars allir kennarar karlkyns. Yfirkennarinn er jafnframt í fjarnámi til að ná sér í kennarapróf en menntamálaráðuneyti landsins í samvinnu við Unicef hóf fjarkennsluprógramm fyrir rúmu ári til að efla menntun kennara.

Nemendum skólans er skipt niður á 3 skólastofur sem þýðir að tæplega 150 börn eru í hverri stofu. Skólinn er semsagt búinn að sprengja utan af sér húsnæðið nú þegar og skýrði yfirkennarinn þetta á þann veg að þegar börnin í nærliggjandi þorpum sáu hversu falleg byggingin var komu mörg þeirra aftur í skólann sem höfðu hætt námi einhverra hluta vegna. Þannig var það ekki óalgeng sjón að sjá börn á öllum aldri í bekkjunum og mjög svo ánægjulegt að sjá hversu mikið aðdráttarafl skólarnir hafa. Auk skólabyggingarinnar voru einnig ný kynskipt salerni,  aðstaða til handþottar og vatnsbrunnur. Salernin eru mjög mikilvæg þar sem þau eru hluti af hreinlætisuppeldi og koma í veg fyrir kynferðislega áreitni sem stúlkur verða gjarnan fyrir í skólum þar sem engin salerni eru.
Vatnsbrunnarnir eru einnig órjúfanlegur hluti skólabyggingarinnar. Oft eru engir vatnsbrunnar fyrir í þorpunum og þurfa þorpsbúar þá gjarnan að sækja vatn langar leiðir. Vatnsburður er oftast verkefni ungra stúlkna og getur þanng komið í veg fyir skólagöngu þeirra. Með því að byggja brunninn í skólanum er þetta vandamál leyst auk þess sem vatnsbrunnurinn gegnir mikilvægu samfélagslegu hlutverki.
Næst var ferðinni heitið til “Bandafaye Community School” en hann var byggður árið 2007. Þar eru nemendur 273, drengir 146 og stúlkur 127. Við fórum beint á fund með SMC (School Management Committee) og Mothers Club sem fræddu okkur á starfi þeirra og ekki var hægt annað en að hrífast af ákafa þeirra, vilja og krafti til að skapa betra samfélag. Eftir að hafa litið inn í skólastofur og hlýtt á söng nemenda var okkur boðið að koma og skoða þorpið þeirra sem við þáðum með þökkum. Þar voru konur  uppteknar við vinnu sína; þvo þvott, merja korn eða að selja vörur sínar á markaðinum sem var við þorpstorgið.  Við veltum því fyrir okkar  hvar karlarnir voru og komum auga á þá þar sem þeir sátu í notalegum skugganum undir tré.  Ekki óalgeng sjón á þessum slóðum.
Fundur með yfirmanni menntamála í Kono héraði, Mr. Komba,  var næstur á dagskrá. Mr Komba var mjög stoltur af framförunum sem átt hafa sér stað í menntamálum í héraðinu, bæði aukningu í skólabyggingum, þökk sé Auroru og Unicef, og auknum áhuga foreldra á að senda börn sín í skóla. Hann benti okkur á töflu sem sýndi árangur nemenda á lokaprófi 6.bekkjar (Primary School) en 79.4% nemenda náðu því prófi, 69.5% drengja og 90.4% stúlkna. Þessar tölur fara stighækkandi ár hvert að hans sögn.
Einnig var áhugavert að sjá skjal sem hékk upp á vegg frá “World Food Program” sem tiltók hvað hver nemandi átti heimtur á að fá að borða daglega; 100 gr af korni, 30 gr af baunum,  10 gr af grænmetisolíu og 3 gr af salti.
Seinasta heimsókn dagsins var til “Sumbedu Community School” og funduðum við með skólastjóra og kennurum. Þar fræddi skólastjórinn okkur á jákvæðum  áhrifum endurmenntunar bæði á kennara og nemendur.  Endumenntunin snýst m.a. um að uppfræða og þjálfa kennara í barnavænum kennsluaðiferðum þar sem þarfir barnsins hafa forgang en ekki kennarans. Hann sagðist ekki líta á sjálfan sig lengur sem kennara (teacher), heldur sem “facilitator” og meinti með því að hans hlutverk væri að auðvelda og hjálpa nemendum að skilja viðfangsefnið á þeirra eigin forsendum.  Hann sagði þetta hafa mjög jákvæð áhrif á nemendurna, þeir væru mun áhugasamari og ánægðari í skólanum og það skilaði sér einnig í betri árangri í náminu.
Einnig upplýsti hann okkur um það að aðeins einn kennari fyrir utan skólastjórann væri á launum frá ríkinu, mánaðarlaunin væru samsvarandi 50 USD en aðrir kennarar væru upp á foreldra og þorpsbúa komnir með aðstoð í formi smærri fjárframlaga, matarframlaga eða vinnuhjálpar.  Þarna kemur foreldraráðið (SMC) einnig sterkt inn en velferð kennara er á ábyrgð þess og því sér það oft um að afla tekna fyrir kennarana.
Eins og í hinum skólunum tóku börnin einkar vel á móti okkur og eftir hressilegan söng var galsi kominn í hópinn enda langur dagur að enda kominn.  Við brugðum á leik með þeim í nýjum leiktækjum sem höfðu verið sett upp á skólalóðinni.  Það stóð ekki á viðbrögðum frá hressum krökkunum og öll vildu þau ólm sýna okkur hvernig þau notuðu leiktækin og ekki var verra að fá mynd af sér í leiðinni.
Miðvikudagurinn byrjaði á heimsókn á héraðssjúkrahúsið í Koidu borg, nánar tiltekið á fæðingadeildina þar. Deildin var í nýrri byggingu sem hafði verið byggð fyrir styrk frá Unicef og öll aðstaða með ágætum.  Þó var tómlegt um að litast þegar okkur bar að garði og virtist ekki mikið um að vera á deildinni þá stundina. Yfirhjúkrunarkonan sannfærði okkur um að þetta væri mjög óvanalegt, deginum áður hefði verið fullt út úr dyrum.
Samkvæmt skýrslu sem unnin var af WHO, UNICEF, UNFPA, og The World Bank  eru dauðsföll vegna barneigna hæst í Sierra Leone, en af hverjum 100.000 barnsfæðandi konum deyja 2100. Næst á eftir kemur Afganistan með 1800 dauðsföll af hverjum 100.000 barnsfæðandi konum.  Helsta skýringin er að flestar konur eiga börn sín heima fyrir í þorpinu og ef eitthvað kemur upp á er oft of langt í hjálp.

Síðan var haldið til Magburaka, heilsugæsla sem er með sérstaka deild fyrir börn sem þjást af  næringarskorti. 57% dauðsfalla barna undir 5 ára aldri í Sierra Leone má rekja til næringarskorts. Mæður geta oft á tíðum ekki haft börn sín á brjósti vegna eigin næringarskorts og eru börn því nærð með mjólkurdufti sem blandað er með menguðu vatni sem veldur sýkingu. Á deildinni eru börnin meðhöndluð  og mæðurnar fræddar um mikilvægi réttrar næringar og hreinlæti. Áberandi var fjöldi ungra mæðra á deildinni, en við hittum eina þeirra sem var með son sinn þar til meðferðar og hafði henni verið nauðgað á leið í skólann. Hún var aðeins 14 ára gömul.
Við komum til Freetown um kvöldið, og þáðum þá kvöldverðarboð Unicef með menntamálaráðherra landsins Dr. Minkailu Bah.  Það var mjög ánægjulegt að hitta Dr. Bah aftur, en hann hafði komið til Íslands tveimur árum áður, er hann þáði boð okkar um að vera viðstaddur afhendingu styrks Auroru til menntamála í Sierra Leone.   Hann var þá nýtekinn við embætti sem menntamálaráðherra að afloknum kosningum haustið 2007.  Í ræðu sinni um kvöldið minntist Dr. Bah þess með ánægju að eitt af hans fyrstu embættisverkum hefði verið að þiggja boð um heimsókn til landsins í norðri og taka við styrk upp á 2 milljónir dollara til stuðnings menntunar barna í Sierra Leone.  Deginum áður höfðum við spurnir af því, okkur til óvæntrar ánægju að forseti landsins Dr. Ernest Bai Koroma hefði áhuga á að hitta okkur, en Dr. Bah hafði á sínum tíma gert ríkisstjórn landsins grein fyrir styrk Auroru Velgerðarsjóðst til menntamála í landinu.
Snemma á fimmtudagsmorgun klæddi hópurinn sig upp í sitt fínasta púss og átti fomlegan fund með menntamálaráðherranum, í ráðuneyti hans sem síðan fylgdi okkur á fund forseta Sierra Leone. Það var ekki laust við spenning í hópnum en á þessum slóðum er það mikill virðingarvottur að vera boðinn á fund með forseta landsins.  Dr Koroma hefur verið við völd í Sierra Leone í tvö ár og nýtur almennt virðingar fyrir störf sín.  Hann hefur sýnt það í verki að hann líður ekki spillingu í stjórnkerfinu, en daginn áður en hópurinn hitti hann gerðust þau óvenjulegu tíðindi að ráðherra heilbrigðismála ásamt tveimur embættismönnum voru látnir taka pokann sinn og ástæðan sögð spilling.  Okkur var sagt að það væru engin fordæmi fyrir því að ráðherra væri rekinn úr ríkisstjórn fyrir spillingu, enda vakti atvikið mikla athygli innanlands sem utan og var m.a. sagt frá því á öllum helstu fréttastöðvum í Evrópu. Hlutskipti hans er hins vegar ekki öfundsvert og verkefnin gríðarleg.  Efnahagslegt hrun litla landsins í norðri sýnist jafnvel hjákátlegt við hlið ástandsins í Sierra Leone.  Að sjálfsögðu  eru ekki allir sammála um forgangsröðunina og ýmsum finnst batinn koma hægt.  En fyrir gestinn sem hefur komið fjórum sinnum til landsins á síðustu fimm árum eru áþreifanlegar breytingar að eiga sér stað.
Forsetinn tók hlýlega á móti okkur á skrifstofu sinni og þakkaði stofnendum og stjórn sjóðsins fyrir sýndan hlýhug í garð Sierra Leone og aðstoðina við menntamál landsins.  Hann ræddi einnig nauðsyn þess að uppbygging landsins væri unnin í samráði við einkageirann þannig að hægt væri að koma hjólum atvinnulífsins af stað. Mikil vinna hefur verið lögð í að bæta lagalegt umhverfi atvinnulífsins m.a. með það að markmiði að laða að alþjóðlega fjárfesta.
Heimsóknin til forsetans var mikill heiður fyrir Auroru og staðfesting á því að styrkir sjóðsins koma að góðum notum og séu vel metnir.
Eins og nefnt var í upphafi að þá var tilgangur ferðarinnar jafnfamt að kynna sér hugsanleg ný verkefni á vegum hjálparstofnana og jafnvel einstaklinga.  Áhuginn var svo mikill hjá stjórninni að skipta þurfti liði, einn hópurinn kynnti sér hvað aðrar hjálparstofnanir eru að gera í heilbrigðismálum, sérstaklega í sambandi við konur, barneignir og vannæringu. Annar hópurinn kynnti sér enn frekar menntamál og heimsóttu kennaraskóla sem starfræktur er í útjaðri Freetown og þriðji hópurinn kynnti sér hvernig hægt væri að hjálpa hjólum atvinnulífsins í gang aftur en um 70% atvinnuleysi er í landinu. Síðan bárum við saman bækur okkar og óhætt er að segja að af nógu er að taka, það er bara spurningin hvar er þörfin brýnust?
Það voru þreyttir en ánægðir ferðalangar sem kvöddu Sierra Leone í lok vikunnar, það tekur tíma að melta áhrifin sem slík ferð sem þessi hefur en Aurora velgerðasjóður mun svo sannarlega leggja sitt af mörkum til að auðga framtíð Sierra Leone og íbúa þess hrjáða lands.


Hönnunarsjóður Auroru og Kraumur tónlistarsjóður fagna opnun starfsemi sinnar í nýju húsnæði að Vonarstræti 4b.

Föstudaginn 20. nóvember mun Hönnunarsjóður Auroru og Kraumur tónlistarsjóður ásamt nýjum nágrönnum sínum í Vonarstrætinu, Hönnunarmiðstöð Íslands bjóða í innflutninspartý.
Fyrir tæpum mánuði síðan fluttu dóttursjóðir Auroru velgerðasjóðs saman í nýtt húsnæði að Vonarstræti 4b. Framkvæmdastjórar sjóðanna, Hlín Helga og Eldar eru hæstánægð með aðstöðuna og samveruna.

Hlín Helga bar hitann og þungan af framkvæmdum við lagfæringarnar á húsnæðinu en Eldar fékk það hlutverk að samþykkja allar breytingar sem hún lagði til. Hann var einnig liðtækur við húsgagnaburð og annað stúss við innflutninginn. En það er ekki annað að sjá á þessum myndum að hann sé ánægður með vinnu Hlínar Helgu og bauð strax  til vinnusmiðju á vegum Útflutningsráðs íslenskrar tónlistar (ÚTÓN / IMX) um hvernig tónlistarmenn geta komið tónlist sinni á framfæri á netinu.


Tíu milljónum úthlutað til íslenskra hönnuða.

Hönnunarsjóður Auroru úthlutaði þann 1. október síðastliðinn, 10 milljónum króna til átta íslenskra hönnuða og verkefna.

Hönnunarsjóður Auroru úthlutaði þann 1. október síðastliðinn, 10 milljónum króna til átta íslenskra hönnuða og verkefna. Auk þess voru kynnt tvö ný verkefni Hönnunarsjóðsins sem er ætlað að efla faglegar stoðir hönnunar á Íslandi og fjölga tækifærum fyrir nýútskrifaða hönnuði á vinnumarkaðnum. Annarsvegar með ráðgjöf fyrir styrkþega sjóðsins og hinsvegar með því að bjóða upp á starfsreynslustyrki fyrir nýútskrifaða hönnuði.

Úthlutunin fór fram í nýju húsnæði sjóðsins í Vonarstræti en þar munu báðir dóttursjóðir Auroru velgerðasjóðs; Hönnunarsjóður Auroru og Tónlistarsjóðurinn Kraumur deila með sér húsnæði, og sjaldan hefur götuheiti átt jafn vel við starfsemina og nú.

Þeir sem hlutu styrki að þessu sinni voru Andrea Maack, Bóas Kristjánsson, Charlie Strand, Guðrún Lilja Gunnlaugsdóttir, Laufey Jónsdóttir, Snæbjörn Stefánsson, Sonja Bent og verkefnið „Stefnumót bænda og hönnuða“.

Einnig voru kynnt tvö ný verkefni Hönnunarsjóðsins en þeim er ætlað að efla faglegar stoðir hönnunar á Íslandi og fjölga tækifærum fyrir nýútskrifaða hönnuði á vinnumarkaðnum. Annarsvegar með ráðgjöf fyrir styrkþega sjóðsins og hinsvegar með því að bjóða upp á starfsreynslustyrki fyrir nýútskrifaða hönnuði.

Um er að ræða seinni úthlutun þessa fyrsta starfsárs Hönnunarsjóðs Auroru, en 20. maí s.l. var úthlutað 12,5 milljón til níu íslenskra hönnuða og voru verkefnin af ýmsum toga. Hönnunarsjóðurinn hefur því úthlutað samtals 22,5 milljón til sautján hönnuða og verkefna á Íslandi á árinu.

Nánari útlistun á styrkþegum og verkefnum þeirra:

ANDREA MAACK
VERKEFNI: ILMVATN
Verkefnið er unnið í samstarfi við franska ilmvatnsfyrirtækið Apf aromes and parfums, en ilmirnir eru hannaðir eftir myndlistarverkum Andreu. Styrkurinn, að upphæð 2.000.000 kr er veittur til vöruþróunar og markaðssetningar þriggja ilmvatna Andreu. Tímarammi verkefnis er áætlaður tvö ár.
http://andreamaack.com/

BÓAS KRISTJÁNSSON
VERKEFNI: HERRAFATALÍNA 8045
Styrkurinn, að upphæð 1.000.000 kr er veittur til hönnunar, vöruþróunar og kynningarstarfs á nýrri línu fyrir Haust/Vetur 2010, sem verður sýnd á Paris Fashion Week í janúar 2010. Bóas kynnti fyrstu fatalínu sínu í París sumarið 2009 og hefur hlotið athygli erlendra fjölmiðla í kjölfarið. Tímarammi verkefnis er áætlaður 4 mánuðir.
http://www.kristjansson-boas.com/

CHARLIE STRAND
VERKEFNI: BÓKIN FUTUREPROOF
Verkefnið er metnaðarfull leið til kynningar á íslenskri fatahönnun erlendis. Styrkurinn, að upphæð 1.000.000 kr er veittur til lokafrágangs bókarinnar. Gert er ráð fyrir að hún komi út á vormánuðum 2010.
http://www.charliestrand.com/

GUÐRÚN LILJA GUNNLAUGSDÓTTIR
VERKEFNI: GLEYM MÉR EI. DUFTKER OG LÍKKISTUR ÚR ENDURUNNUM EFNUM.
Verkefnið var einnig styrkt í maí s.l. en síðan þá hefur verið unnið ötullega í verkefninu og mikilvæg skref yfirstaðin. Styrkurinn, að upphæð 1.000.000 kr. er veittur til mótagerðar fyrir framleiðslu. Stefnt er á að fyrsta varan líti dagsins ljós á vormánuðum 2010.
http://www.bility.is/

SNÆBJÖRN STEFÁNSSON
VERKEFNI: BARNALEIKFÖNG
Verkefnið er ferskt innlegg í þróun barnaleikfanga í heiminum í dag. Styrkurinn, að upphæð 500.000 kr. er veittur til vöruþróunar.

SONJA BENT
VERKEFNI:HERRAFATALÍNA
Styrkurinn, að upphæð 750.000 kr er veittur til að mæta kostnaði við kynningarstarf og sölu herralínu Sonju í New York, en henni hefur verið boðin þáttaka í „Project Space“ á Manhattan. Tímarammi verkefnisins er 6 mánuðir.
http://sonjabent.com/

LAUFEY JÓNSDÓTTIR
VERKEFNI: FATALÍNA FYRIR GLÓFA. UM ER AÐ RÆÐA FYRSTA STYRKINN SEM VEITTUR ER TIL AÐ FJÖLGA TÆKIFÆRUM FYRIR NÝÚTSKRIFAÐA HÖNNUÐI Á VINNUMARKAÐI.
Verkefnið er samstarfsverkefni Laufeyjar og Glófa sem hófst í gegnum verkefni Hönnunarmiðstöðvar og Útflutningsráðs „Hönnun til útflutnings“. Laufey hefur hannað nýja línu fyrir Glófa sem bera mun sitt eigið nafn en vera kennt við Laufeyju. Styrkurinn, að upphæð 1.000.000 kr. er veittur til þess að leggja lokahönd á línuna og fylgja henni úr hlaði með kynningum innanlands og utan með Glófa. Tímarammi verkefnis er 6 mánuðir.

STEFNUMÓT BÆNDA OG HÖNNUÐA
VERKEFNI: MATARHÖNNUN.
Stefnumót bænda og hönnuða er verkefni innan Listaháskóla Íslands. Þegar námskeiðinu líkur á vorin, ræður Listaháskólinn 3-4 nýútskrifaða hönnuði til að fullvinna vörur sem komið hafa út úr námskeiðinu undir handleiðslu reyndar hönnuða. Mikil áhersla er lögð á teymisvinnu og þverfaglega vinnu með sérfræðingum t.d. frá Matís. Hönnunarsjóðurinn mun styrkja einn þessara nýútskrifuðu hönnuða í tvö tímabil, samtals um 1.000.000 kr. Tímarammi verkefnis er áætlaður tvö ár.

Nánari upplýsingar:
Hlín Helga Guðlaugsdóttir frkv.stj.  Hönnunarsjóðsins, s. 772-1200 / hlin@honnunarsjodur.is


10 milljónum úthlutað til íslenskra hönnuða í dag, fimmtudag.

Hönnunarsjóður Auroru úthlutar í dag 1. október, 10 milljónum til átta íslenskra hönnuða ogverkefna. Áhersla er lögð á beinan stuðning við hönnuði, sem eiga það sameiginlegt að skarafram úr á einn eða annan hátt í hönnun sinni, faglegum vinnubrögðum og sköpunarkrafti.

Hönnunarsjóður Auroru úthlutar í dag 1. október, 10 milljónum til átta íslenskra hönnuða og verkefna. Áhersla er lögð á beinan stuðning við hönnuði, sem eiga það sameiginlegt að skara fram úr á einn eða annan hátt í hönnun sinni, faglegum vinnubrögðum og sköpunarkrafti. Auk þess verða kynnt tvö ný verkefni Hönnunarsjóðsins sem er ætlað að efla faglegar stoðir hönnunar á Íslandi og fjölga tækifærum fyrir nýútskrifaða hönnuði á vinnumarkaðnum. Annars vegar meðráðgjöf fyrir styrkþega sjóðsins og hinsvegar með því að bjóða upp á starfsreynslustyrki fyrir nýútskrifaða hönnuði.
Styrkirnir verða afhentir við hátíðlega athöfn kl. 17 í dag 1.október, í nýju húsnæðiHönnunarsjóðsins, Vonarstræti 4b, neðri hæð.
Um er að ræða seinni úthlutun þessa fyrsta starfsárs Hönnunarsjóðs Auroru, en 20. maí s.l. var úthlutað 12,5 milljón til níu íslenskra hönnuða og voru verkefnin af ýmsum toga. Hönnunarsjóðurinn hefur því úthlutað samtals 22,5 milljón til sautján hönnuða og verkefna á Íslandi á árinu, en á heimasíðu sjóðsins má sjá nánari upplýsingar um verkefnin og starfsemisjóðsins : http://www.honnunarsjodur.is

Einn þeirra sem hlaut styrk í maí var Jón Björnsson, nýútskrifaður vöruhönnuður fráDesign Academy Eindhoven. Hann býr á Höfn í Hornarfirði og framleiðir nú vasa úr svörtum sandi í vinnustofu sem áður hýsti verbúð og beitingaskúra. Sandvasarnir „Flower Eruption“ hafa hlotið mikla athygli og eru nú, fyrir tilstilli Hönnunarsjóðsins væntanlegir í verslanir. Á heimasíðu sjóðsins er hægt að skyggnast á bakvið tjöldin.
Nánari upplýsingar:
Hlín Helga Guðlaugsdóttir frkv.stj. Hönnunarsjóðsins,
s. 772-1200 / hlin@honnunarsjodur.is


Ný álma við barnadeild héraðssjúkrahússins í Mangochi, Malaví.

Eins og fram hefur komið styrkir Aurora velgerðarsjóðurinn byggingu nýrrar álmu við barnadeildina við héraðssjúkrahúsið í Mangochi héraðið í Malaví.

Eins og fram hefur komið styrkir Aurora velgerðarsjóðurinn byggingu nýrrar álmu við barnadeildina við héraðssjúkrahúsið í Mangochi héraðið í Malaví.
Fyrir rúmu ári síðan hófust byggingaframkvæmdir  á nýju álmunni við barnadeildina en þar er gert ráð fyrir  rúmum fyrir 36 börn.
Í álmunni er opin deild, gjörgæsludeild, nýburadeild og loks einangrunardeild sem er einkum notuð fyrir kóleru.
Þessi bætta aðstaða er á vissan hátt bylting í heilbrigðisþjónustu á svæðinu og eru miklar vonir bundnar við barnadeildina.
Það stóð til að framkvæmdum mundi ljúka í árslok 2008 en vegna óviðráðanlegra orsaka, s.s. óvenju langt og mikið regntímabil og erfiðara gekk fyrir verktakann að nálgast aðföng en gert var ráð fyrir lauk byggingu álmunnar ekki fyrr en í maí síðastliðnum.
Jafnframt því að byggja þessa nýju álmu styrkti sjóðurinn framkvæmdir á lagfæringu á öllu skólpi við núverandi byggingar spítalans.
Meðfylgjandi eru myndir frá nýju álmunni, íbúar svæðisins eru afar þakklátir fyrir framtakið og aðstaða sem þessi getur skipt sköpum í lífi barnanna í héraðinu.
Það er að frumkvæði Sigurðar Guðmundssonar og konu hans Sigríðar Sveinbjörnsdóttur að ráðist var í verkefnið en þau hjónin unnu á svæðinu  og þekkja því vel þörfina, en jafnframt hverju hægt er að áorka með nýju barnadeildinni.


Hljóðverssmiðjur á Flateyri

Tankurinn var reistur árið 1925 til geymslu á lýsi en var breytt í atvinnuhúsnæði árið 1980. Ýmis starfsemi hefur verið í Tankinum síðan þá, m.a. bátasmiðja, trésmíðaverkstæði og nú síðast beitningaraðstaða. Eftir miklar endurbætur var aðstaðan orðin boðleg til að taka upp tónlist. Múgsefjun var fyrsta hljómsveitin til að taka upp í Tankinum vorið 2007, en breiðskífa þeirra ‘Skiptar skoðanir’ er að fullu tekin upp í hljóðverinu. Síðan hafa ýmsir listamenn tekið upp í Tankinum og franska hljómsveitin Klezmer Chaos tók þar upp um páskana.


Framúrskarandi hönnuðir fá úthlutað 11 milljónum úr Hönnunarsjóði Auroru

Þann 20.maí síðastliðinn fór fram fyrsta úthlutun úr Hönnunarsjóði Auroru til íslenskra hönnuða. Veittir voru sjö styrkir til hönnuða samtals 11 milljónir króna og tveggja samstarfsverkefna sjóðsins, samtals 1,5 milljónir króna. Sjóðurinn var stofnaður fyrr á árinu af Auroru velgerðarsjóði.

Þann 20.maí síðastliðinn fór fram fyrsta úthlutun úr Hönnunarsjóði Auroru til íslenskra hönnuða. Veittir voru sjö styrkir til hönnuða samtals 11 milljónir króna og tveggja samstarfsverkefna sjóðsins, samtals 1,5 milljónir króna. Sjóðurinn var stofnaður fyrr á árinu af Auroru velgerðarsjóði. Nánar á www.honnunarsjodur.is

Sjóðnum er ætlað að styðja við framúrskarandi hönnuði, efla grasrótarstarf í hönnun og vera vettvangur hugmynda og skapandi hugsunar í íslenskri hönnun. Með þessu leggur sjóðurinn sitt af mörkum til eflingar nýsköpunar og sprotastarfsemi á Íslandi.
Um þessar mundir stendur yfir sýningin „Hönnun 2009“ á Kjarvalsstöðum sem er á vegum Hönnunarmiðstöðvar Íslands og Listasafns Reykjavík. Hönnunarsjóður Auroru kynnir þar til leiks „Vaxtarsprota“ íslenskrar hönnunar, 5 upprennandi og efnilega hönnuði sem sýna verk sín á sýningunni en sá hluti sýningarinnar er fyrsta opinbera verkefni sjóðsins. Sýningin er hluti af Listahátíð Reykjavíkur.

Næsta úthlutun úr sjóðnum verður á haustmánuðum.
Þeir sem fengu úthlutaðan styrk að þessu sinni eru:

HUGRÚN ÁRNADÓTTIR OG MAGNI ÞORSTEINSSON www.kronkron.com
KRON by KRONKRON
skólína
Styrkurinn er veittur til sýningahalds í Kaupmannahöfn, París og Mílanó haustið 2009

JÓN BJÖRNSSON www.bjoss.com
Flower Eruption
Vasar steyptir úr íslenskum sandi
Styrkur til vöruþróunar Flower Eruption

GUÐRÚN LILJA GUNNLAUGSDÓTTIR www.bility.is
Líkkistur og duftker úr pappamassa
Styrkurinn er veittur til frumgerðasmíði og tilrauna og rannsóknarvinnu

KATRÍN ÓLÍNA www.katrin-olina.com
Styrkur er veittur til uppbyggingar hönnunarfyrirtækis og kynningarstarfs.

LINDA BJÖRG ÁRNADÓTTIR www.lindabjorgarnardottir.com
Scintilla – heimilistextíll
Styrkur til sýningahalds hjá Martine Sitbon í París í september nk. og kynningu í tengslum við það.

SARA MARÍA JÚLÍUSDÓTTIR www.dontbenaked.com
NAKTI APINN
Styrkur til að þróa og efla framleiðslu hönnunar hennar.

Vík Prjónsdóttir www.vikprjonsdottir.com
Brynhildur Pálsdóttir, Egill Kalevi Karlsson, Guðfinna Mjöll Magnúsdóttir, Hrafnkell Birgisson, Þuríður Rós Sigurþórsdóttir
Styrkur til vöruþróunar.

Samstarfsverkefnin eru:

HÖNNUNARSÝNINGIN „ ÍSLENSK HÖNNUN 2009“ – „VAXTARSPROTAR“
Samstarfsaðili: Hönnunarmiðstöð Íslands og Listasafn Reykjavíkur www.honnunarmidstod.is
Sýningin „Íslensk hönnun 2009“ á Kjarvalsstöðum er á vegum Hönnunarmiðstöðvar Íslands og Listasafns Reykjavíkur. Hönnunarsjóður Auroru kynnir þar til leiks „Vaxtarsprota“ íslenskrar hönnunar, 5 upprennandi og efnilega hönnuði sem sýna verk sín á sýningunni en sá hluti sýningarinnar er fyrsta opinbera verkefni sjóðsins. Sýningin er hluti af Listahátíð Reykjavíkur.
“Vaxtarsprotarnir”eru:
Dagur Óskarsson www.dagur.is
Jón Björnsson www.bjoss.com
Friðgerður Guðmundsdóttir www.fridgerdur.com
Sóley Þórisdóttir www.soleythoris.com
Þórunn Árnadóttir www.thorunndesign.com

LETURGERÐ OG MERKI HÖNNUNARSJÓÐS AURORU
Samstarfsaðili: Gunnar Þór Vilhjálmsson www.gunnarvilhjalmsson.net
Letrið er endurgerð á letrinu Golden Type, sem William Morris teiknaði fyrir forlagið sitt Kelmscott Press. Hann notaði það í bókinni Sidonia the Sorceress sem hann gaf íslensku þjóðinni (Landsbókasafninu) í október 1894. Sú bók er hugsuð sem nokkurskonar „design manual“ fyrir Hönnnunarsjóð Auroru, þar sem horft verður til leturs, leturmeðferðar, framsetningu og litavals. Letrið teiknaði Morris eftir stafagerð sem Nicolas Jenson gerði í Feneyjum 1475, Laertis, en það hefur verið fyrirmynd prentstafa í Latneska/Roman stafrófinu allt til dagsins í dag. Morris var mikill aðdáandi Íslenskra fornbókmennta, kom í tvær heimsóknir til Íslands og ferðaðist um landið á hestbaki, 1871 og 1873. Vinnuheiti letursins er GOLDEN AURORA.


Aurora velgerðasjóður styrkir verkefni í Nepal

Aurora velgerðasjóður styrkir verkefni í Nepal „Shelter for Life“ sem er á vegum bandarísku hjálparstofnunarinnar „Beyond Tears Worldwide“

Tilgangur verkefnisins er að skapa umhverfisvæn heimili „Shelter for Life“, með því að útvega þorpsbúum sólarorku og reyklausar eldavélar. Með því skapast hreint loft og ljós á hvert heimili en hjálparstofnunin einbeitir kröftum sínum nú að Mugu héraði í Nepal.

Vegna lélegs aðbúnaðar í fjallaþorpum Nepals eru það aðeins um 50% barna sem ná eins árs aldri og meðalaldurinn er 36 ár. Öndunarfærasjúkdómar eru megin orsök þessarar háu dánartíðni og mun því þetta verkefni bjarga fjölda mannlífa. Reyklausar eldavélar og sólarorkan mun einnig minnka notkun á eldivið um 65% og þar af leiðandi ágang á ört minnkandi skóglendi Himalayafjalla.

Útvaldir nemendur og starfsmenn Leysin American School í Sviss undir leiðsögn Lou Felo, starfsmanni hjálparstofnunarinnar „Beyond Tears Worldwide“ hafa farið árlega til Mugu héraðs í Nepal og unnið að því að gera þetta að veruleika.
Í mars síðastliðnum fór hópur nemenda frá Sviss til þorpsins Jhamphay í Mugu héraði og setti upp 36 sólarorkupanela og eldavélar við öll híbýli þorpsins. Vonandi verður það til að auka lífsgæði þorpsbúa og afkomenda þeirra til muna, bæði líkamlega og andlega.


Úthlutanir og stuðningur við íslenskt tónlistarlíf.

Kraumur tónlistarsjóður kynnir í dag fyrstu úthlutanir sínar og stuðning við íslenskt tónlistarlíf, tónlistarmenn og hljómsveitir árið 2009. Áhersla er lögð á innlend verkefni og starfsemi listamanna og hljómsveita hérlendis í stuðningi Kraums í ár, allt frá plötugerð til námskeiða- og tónleikahalds á landsbyggðinni.
Kraumur tónlistarsjóður kynnti í gær, 2. apríl fyrstu úthlutanir sínar og stuðning við íslenskt tónlistarlíf, tónlistarmenn og hljómsveitir árið 2009. Áhersla er lögð á innlend verkefni og starfsemi listamanna og hljómsveita hérlendis í stuðningi Kraums í ár, allt frá plötugerð til námskeiða- og tónleikahalds á landsbyggðinni.
Meðal þeirra listamanna sem Kraumur mun styðja og vinna með á árinu eru Hjaltalín, Lay Low, Sindri Már Sigfússon (Sin Fang Bous / Seabear), Ólafur Arnalds, Ólöf Arnalds, Mógil, For a Minor Reflection og Nordic Affect. Kraumur mun jafnframt styðja við tónleika fjölda ungra listamanna á Stofutónleikum Listahátíðar í Reykjavík, námskeið og vinnusmiðjur á tónlistarhátíðinni Aldrei fór ég suður á Ísafirði, Tónlistarhátíð unga fólksins í Kópavogi og Reykjavik Jazz Performance vinnusmiðjur fyrir unga og upprennandi listamenn.
Kraumur mun sjálfur standa fyrir Hljóðverssmiðjum í Tankinum á Flateyri með verðlaunasveitum Músíktilrauna 2009 og þátttöku reyndari tónlistarmanna. Innrásin, átak Kraums til stuðnings tónleikahaldi á landsbyggðinni, heldur áfram af fullum krafti. Að þessu sinni er kynntur stuðningur við hljómsveitirnar Sudden Weather Change, Retro Stefson, Árstíðir, Nögl, Molestin o.fl. í tengslum við Innrásina, sem m.a. munu koma fram á tónlistarhátíðunum Eistnaflugi á Neskaupsstað og Lunga á Egilsstöðum. Kraumur mun jafnframt styðja við Trúbatrix, nýtt tengslanet og tónlistarhóp sem samanstendur af íslenskum tónlistarkonum sem flytja frumsamda Íslenska tónlist, til tónleikahalds innanlands. Alls hefur tæpum 11 milljónum nú verið úthlutað í beinan stuðing til listamanna og hljómsveita, eigin verkefna Kraums og samstarfsverkefna sjóðsins.
Nánari upplýsingar eru á vef sjóðsins www.kraumur.is


Aurora velgerðasjóður ráðstafar 111,5 milljónum króna til styrktarverkefna á Íslandi og í Afríku

Stjórn Auroru velgerðasjóðs hefur úthlutað alls 111,5 milljónum króna í styrki til sex verkefna á sviði mannúðar, mennta og menningar hérlendis og í Afríkuríkjunum Síerra Leóene og Mósambík, þar af til fjögurra verkefna sem sjóðurinn hefur ekki styrkt áður.

Stjórn Auroru velgerðasjóðs hefur úthlutað alls 111,5 milljónum króna í styrki til sex verkefna á sviði mannúðar, mennta og menningar hérlendis og í Afríkuríkjunum Síerra Leóene og Mósambík, þar af til fjögurra verkefna sem sjóðurinn hefur ekki styrkt áður.
Þetta er í annað sinn sem styrkir eru veittir úr Auroru velgerðasjóði sem hjónin Ingibjörg Kristjánsdóttir landslagsarkitekt og Ólafur Ólafsson, stjórnarformaður Samskipa og Alfesca, stofnuðu 23. janúar 2007 og lögðu til einn milljarð króna. Samkvæmt stofnskrá er gert ráð fyrir að verja arði og vaxtatekjum sjóðsins til verkefna sem stuðlað geta að betra mannlífi á Íslandi og verkefna í þróunarlöndum.
Að þessu sinni ákvað stjórn sjóðsins að áhersla yrði lögð á verkefni hér á landi en fjögur af verkefnunum sex eru íslensk. Þess má geta að það tókst að mestu leyti að verja eignir sjóðsins í efnahagshruninu og sjóðsstjórn heldur því ótrauð áfram að starfa í þeim anda sem til var stofnað.
Ný styrktarverkefni
Rauði kross Íslands fær 20 milljónir króna til stuðnings þremur verkefnum:
Fjárhæðinni verður skipt á milli verkefnanna þriggja. Þörf fyrir aðstoð Rauða krossins af þessu tagi hefur aukist stórlega í efnahagskreppunni.

Rökstuðningur stjórnar Auroru:
Rauði krossinn nýtur virðingar fyrir umfangsmikið mannúðarstarf sitt heima og heiman þar sem fagmennska og óeigingirni er í fyrirrúmi. Aurora velgerðasjóður ákvað að veita aðstoð þeim sem verst verða úti í efnahagskreppunni á Íslandi og þá lá beinast við að leita til Rauða krossins um samstarf. Verkefnin þrjú, sem Aurora styrkir í ár, eru ólík en þjóna í heild mismunandi hópum sem eiga um sárt að binda.

Nýstofnaður Hönnunarsjóður Auroru er tilraunaverkefni til þriggja ára og fær 25 milljónir króna á ári til að styrkja hönnuði við að koma verkefnum sínum á framfæri og aðstoða við vöruþróun, frumframleiðslu og markaðssetningu hérlendis og erlendis. Sjóðurinn mun einnig miðla þekkingu á sviði hönnunar og stuðla að samstarfi hönnuða og aðila úr atvinnulífinu. Sjóður af þessu tagi hefur aldrei verið til á Íslandi. Hönnunarsjóður Auroru opnar fljótlega heimasíðuna www.honnunarsjodur.is og þar verður hægt að nálgast frekari upplýsingar um starfsemina.

Rökstuðningur stjórnar Auroru:
Þörf er á sérstökum hönnunarsjóði á Íslandi til að styðja við bak efnilegra hönnuða en ekki síður til að efla grasrótarstarf í hönnun og vera vettvangur hugmynda og skapandi hugsunar í greininni. Stjórn Auroru vonar að nýi sjóðurinn stuðli að því að íslensk hönnun vaxi og dafni og verði ein af stoðunum sem skotið verði undir atvinnulífið við endurreisn þess.

Hugi Guðmundsson tónskáld fær 3 milljónir króna fyrir hönd aðstandenda heimasíðunnar MusMap.com til styrktar alþjóðlegu menningarverkefni sem ætlað er að efla klassíska tónlist og vinna henni ný lönd með því að nota Vefinn.

Rökstuðningur stjórnar Auroru:
Mus.Map.com er afrakstur sjálfboðavinnu í þeim frumkvöðlaanda sem Aurora velgerðasjóður vill hlúa að og efla, einstætt viðfangsefni á sinn hátt og stuðlar ekki síst að því að klassísk tónlist nái eyrum ungs fólks. Hugi Guðmundsson hefur skýra framtíðarsýn í þessum efnum og þó verkefnið sé tiltölulega smátt í sniðum, enn sem komið er, hefur það alla burði til að verða drifkraftur og áhrifavaldur í heimi klassískrar tónlistar.
UNICEF á Íslandi fær 3,5 milljónir króna til styrktar verðlaunuðu útvarpsverkefni samtakanna með börnum og ungmennum í Mósambík sem snýr að jafningjafræðslu, sjálfstyrkingu og þátttöku barna. Ríkisútvarpið, Rás 1, undirbýr nú sambærilega útvarpsþætti fyrir börn á Íslandi í samvinnu við UNICEF í tilefni tvítugsafmælis Barnasáttmála Sameinuðu þjóðanna.

Rökstuðningur stjórnar Auroru:
Verkefnið í Mósambík er hrífandi dæmi um jafningjafræðslu þar sem börn og unglingar nota útvarp til að ræða saman á eigin forsendum um ýmis vandamál sem að þeim steðja. Áform Unicef og Rásar 1 að stofna til útvarpsþáttar með verkefnið í Mósambík sem fyrirmynd eru mjög áhugaverð en markmiðið er að koma á tengslum ungmenna í þessum tveimur löndum og  stefna þannig saman ólíkum reynsluheimum þeirra.

Verkefni til þriggja ára sem fá styrki í annað sinn

Menntaverkefni UNICEF í Afríkuríkinu Síerra Leóne fær 40 milljóna króna framhaldsstyrk til að byggja upp barnvænt menntakerfi og skólahúsnæði, einkum með þarfir stúlkubarna í huga. Stofnað var til verkefnisins í fyrra og jafnframt tilkynnt að Aurora myndi ráðstafa til þess alls 120 milljónum króna í þrennu lagi á árunum 2008-2010.
Styrktarverkefnið í Síerra Leóne er hið stærsta og umfangsmesta á vegum Auroru velgerðasjóðs til þessa. Í krafti verkefnisins hafa nú þegar á annað hundrað kennarar hlotið þjálfun. Framkvæmdir við byggingu níu skóla í héraðinu Kono, með tilheyrandi vatnsveitu- og frárennsliskerfum, húsbúnaði og kennslugögnum, eru vel á veg komnar.

Kraumur, tónlistarsjóður Auroru fær 20 milljónir króna til að styrkja ungt tónlistarfólk til listsköpunar og kynningar á verkum sínum. Kraumur var stofnaður í fyrra að frumkvæði Auroru velgerðasjóðs og var þá tilkynnt að Aurora myndi ráðstafa til tónlistarsjóðsins alls 50 milljónum króna í þrennu lagi á árunum 2008-2010.  Stjórn Auroru ákvað að bæta 5 milljónum króna við 15 milljóna króna framlag í ár, enda hefur Kraumur sýnt og sannað að hans er þörf. Nærvera hans skiptir miklu máli í íslensku menningarlífi.

Starfsemi Kraums er umfangsmikil og blómleg og sjóðurinn hefur víða komið við. Hann styrkti tónleika og tónleikaferðalög heima og heiman, aðstoðaði við markaðssetningu og stóð fyrir nýjum tónlistarverðlaunum, Kraumsverðlaununum, svo nokkuð sé nefnt. Frekari upplýsingar eru að finna á líflegri heimasíðu Kraums, http://kraumur.is/


Saga frá Sierra Leone

UNICEF á Íslandi sendi okkur þessa stuttu frásögn frá Síerra Leóne sem starfsmenn UNICEF þar skrifuðu eftir heimsókn í einn af skólunum sem byggður var fyrir stuðning Auroru-sjóðsins. Í frásögninni er meðal annars tekið viðtal við átta barna móður, Kadiatu Kaloko, sem á dóttur í einum af samfélagsskólunum og lætur vel af þeim tækifærum sem nú hafa opnast fyrir dóttur hennar við opnun skólans.

UNICEF á Íslandi sendi okkur þessa stuttu frásögn frá Síerra Leóne sem starfsmenn UNICEF þar skrifuðu eftir heimsókn í einn af skólunum sem byggður var fyrir stuðning Auroru-sjóðsins. Í frásögninni er meðal annars tekið viðtal við átta barna móður, Kadiatu Kaloko, sem á dóttur í einum af samfélagsskólunum og lætur vel af þeim tækifærum sem nú hafa opnast fyrir dóttur hennar við opnun skólans.
Hér er frásögnin (á ensku):
A mother’s determination for her children’s future
Kadiatu Kaloko, now 35, had her first of eight children when she was about 16. She never had the chance to go to school and can’t read or write, but she understands the importance of education and wants her daughters to attend the community school, which UNICEF upgraded from a simple one-room pavilion structure to a three-class concrete block last year.

As her 10-year old daughter Nanah carefully learns to say English words aloud, Kadiatu still takes up back-breaking farming work every day under the hot sun. She is chairlady of a mothers’ group, a pilot association encouraged by UNICEF to boost the chances of girls at school.
“I started the mothers’ club,” says Kadiatu in energetic Temne, one of Sierra Leone’s many local languages. Each of the 75 member mothers contributes Le500 a month (equivalent to about 16 US cents) and together they work a piece of community farmland, selling the proceeds from their cassava and rice crop to fund their daughters’ education at the school.
“Before [our meetings with UNICEF] we didn’t know the benefit of girls’ education,” says Kadiatu. “But now I want all my children to go to school so they can be somebody in the future to help our family.”
While her mother can’t speak Krio, let alone English, daughter Nanah’s favourite subject is English, taught by teachers who recently attended a UNICEF-supported training session to help make lessons more child-centred, so that students participate more in lessons.
“I want to go to school to help my family in the future,” says Nanah, who follows her class attentively.
Several mothers in the club are still children themselves and already have their own one-year olds. Following their own experiences, some, such as 16-year-old Mabinti Koroma, whose baby is wrapped to her back, hope their own daughters will wait until they are at least 19 before they marry.
“I got married and became pregnant very early. It’s not good,” says Mabinti. “I will tell my daughter to go to school and wait until she’s matured to get married.”
Overall only 64 per cent of primary-school-age children are enrolled in primary school. Special efforts are needed to reach Universal Primary Education in Sierra Leone by 2015. There are some positive indicators, including the development of an Education Sector Plan for 2008 to 2015 and the commitment by Government to allocate 20 per cent of the national budget to education annually.
While gender gaps have nearly disappeared in early primary education, of the children who do enroll in primary school, only 11% finish at the right time for their age, and more than 40% never finish at all, regardless of their age or stage. An estimated nine thousand teachers are volunteers, and many teach an outdated curriculum with old-fashioned methods. Gender disparities also increase with age and stage, leaving girls behind: only 15% of girls go to secondary school.
The major barrier to girls’ education is poverty. Children who are orphans or from single parent families are most likely to be out of school, the indirect costs such as uniforms and school materials are a barrier- children often have to work on the farm or look after younger siblings instead of going to school.  Additional factors which contribute to the high number of out of school children include a low level of female literacy; cultural practices, such as child marriage, and the distance to be traveled to attend a school .
Interventions such as those provided by the Aurora Foundation through the Icelandic NATCOM including the construction of community schools, provision of furniture as well as teaching and learning materials and training of mothers’clubs and school management committees and teachers are crucial to ensure enrolment of all children and to enable children to successfully complete their education, empowering children especially girls.


Kraumsverðlaunin 2008 tilkynnt

Síðastliðinn föstudag, 28. nóvember var tilkynnt um tilnefningar og verðlaunaplötur Kraumsverðlaunanna í fyrsta sinn.
Kraumsverðlaunin 2008 hljóta; Agent Fresco fyrir Lightbulb Universe, FM Belfast fyrir How to Make Friends, Hugi Guðmundsson fyrir Apocrypha, Ísafold fyrir All Sounds to Silence Come, Mammút fyrir Karkara og Retro Stefson fyrir Montaña.

Tilnefningu hljóta (auk ofangreindra); Celestine (At the Borders of Arcadia), Dísa (Dísa), Dr. Spock (Falcon Christ), Emiliana Torrini (Me and Armini), Introbeats (Tívólí chillout), Klive (Klive), Lay Low (Farewell Good Night’s Sleep), Morðingjarnir (Áfram Ísland), Múgsefjun (Skiptar skoðanir), Ólafur Arnalds (Variations of Static), Reykjavík! (The Blood), Sigur Rós (Með suð í eyrum við spilum endalaust), Sin Fang Bous (Clangour) og Skakkamanage (All Over the Face).

Óhætt að segja að árið í ár sé öflugt hvað íslenska plötuútgáfu varðar, enda dómnefnd Kraumsverðlaunanna búin að hafa nóg að gera síðustu vikur og fjöldi spennandi titla sem komist hafa á blað í starfi hennar. Tilkynnt var um
Samkvæmt reglum Kraumsverðlaunanna er gert ráð fyrir að dómnefndin velji og verðlauni fimm breiðskífur sem koma út á árinu, þó með þeim fyrirvara að hægt sé að fjölga í þeim hópi ef sérstakt tilefni sé til. Í ár er tilefni, Kraumsverðlaunaplöturnar eru sex talsins.
Athöfnin fór fram á Smiðjustíg 4A í æfingahúsnæði nokkurra hljómsveita. Þórunn Sigurðardóttir stjórnarformaður Kraums bauð gesti velkomna, Eldar Ástþórsson framkvæmdastjóri Kraums gerði gestum grein fyrir framkvæmd og markmiðum Kraumsverðlaunanna og Árni Matthíasson formaður dómnefndar gerði grein fyrir niðurstöðu hennar. Fram komu hljómsveitirnar Agent Fresco og FM Belfast.
Kraumsverðlaunin eru ný plötuverðlaun, sett á fót í þeim tilgangi að kynna og styðja við plötuútgáfu íslenskra hljómsveita og listamanna – og verðlauna og vekja sérstaka athygli á þeim verkum sem skara fram úr í gæðum, metnaði og frumleika. Verðlaunin eru ekki bundin neinni ákveðinni tónlistarstefnu og þeim fylgja engir undirflokkar. Verðlaunin hafa ekkert aldurstakmark, en markmið þeirra er að einbeita sér að verkum yngri kynslóðar íslenskra tónlistarmanna og hljómsveita. Það er von aðstandenda verðlaunanna að þau verki athygli á fjölbreyttri íslenskri plötuútgáfu, nú þegar jólagjafaflóðið er við það að skella á og listamenn reiða sig hvað mest á plötusölu.
Kraumsverðlaunin snúast ekki um eina einstaka verðlaunaplötu, heldur að viðurkenna og verðlauna fleiri titla. Umgjörð verðlaunanna er haldið í lágmarki, og frekar reynt að einbeita sér að stuðningi við verðlaunaplöturnar. Vinninghafarnir hljóta ekki verðlaunagrip, heldur eru verðlaunin fyrst og fremst fólgin í viðurkenningu, kynningu – og plötukaupum Kraums á verðlaunatitlunum.
Kraumur mun styðja við verðlaunaplöturnar, og jafnframt auka við möguleika listamannanna bakvið þær til að koma verkum sínum á framfæri utan landsteinana, með því að kaupa ákveðinn fjölda af plötunum og dreifa til starfsmanna tónlistarbransans erlendis (tónlistarhátíðir, plötuútgáfur, umboðsskrifstofur o.s.frv.), í samvinnu við Útflutningskrifstofu íslenskrar tónlistar (ÚTÓN).
Aðstandandi verðalaunana er Kraumur, sjálfstætt starfandi sjóður og starfsemi á vegum Auroru velgerðarsjóðs, sem hefur það að meginhlutverk að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan.


Kraumur – ný heimasíða

Dómnefnd Kraumsverðlaunanna hóf formlega störf í byrjun mánaðarins og vinnur nú hörðum höndum að því ná niðurstöðu um hvaða plötur verða tilnefndar til fyrstu Kraumsverðlaunanna.Ný heimasíða fyrir Kraum og kraumsverðlaunin hefur verið opnuð og óskar dómnefnin eftir aðstoð listamanna og almennings við svokallaðan ‘Plötulista 2008’ sem þar er að finna.
http://kraumur.is


Kraumsverðlaunin afhent í fyrsta sinn í ár

Metnaður og frumleiki í íslenskri plötugerð verðlaunaður með nýjum verðlaunum

Kraumsverðlaunin eru ný plötuverðlaun, sett á fót í þeim tilgangi að kynna og styðja við plötuútgáfu íslenskra hljómsveita og listamanna – og verðlauna og vekja sérstaka athygli á þeim verkum sem skara fram úr í gæðum, metnaði og frumleika. Aðstandandi verðalaunanna er Kraumur, sjálfstætt starfandi sjóður og starfsemi á vegum Auroru velgerðasjóðs sem hefur það meginhlutverk að efla íslenskt tónlistarlíf, fyrst og fremst með stuðningi við unga listamenn. Auðvelda þeim að vinna að listsköpun sinni og koma verkum sínum á framfæri innanlands sem utan.

Dómnefnd Kraumsverðlaunanna hefur nú hafið störf. Hún er skipuð 15 aðilum sem hafa reynslu af að fjalla um og spila íslenska tónlist á ýmsum sviðum fjölmiðlunar, í dagblöðum, útvarpi og á netinu. Formaður dómnefndar er Árni Matthíasson.
Kraumsverðlaunin eru ekki bundin neinni ákveðinni tónlistarstefnu og þeim fylgja engir undirflokkar. Verðlaunin hafa ekkert aldurstakmark, en markmið þeirra er engu að síður að einbeita sér að verkum yngri kynslóðar íslenskra tónlistarmanna og hljómsveita.
Það er von aðstandenda verðlaunanna að þau verði liðsauki fyrir íslenska listamenn og íslenska plötuútgáfu, og veki athygli á þeirri grósku og fjölbreytni sem ár hvert er fest á disk, vínyl og stafrænni útgáfu hér á landi. Tímasetning tilnefninga og úthlutunar Kraumsverðlaunanna er miðað við jólagjafaflóðið, þegar listamenn reiða sig hvað mest á plötusölu og ætla má að sóknarfæri séu fyrir íslenska tónlist að rata í fleiri jólapakka.
Kraumsverðlaunin byggjast á því að 5 plötur sem gefnar eru út á árinu verða tilnefndar til verðlauna. Af þeim hlýtur síðan ein Kraumsverðlaunin. Ef sérstakt tilefni þykir til hefur dómnefnd vald til að auka við fjölda tilnefndra platna. En það skal aðeins gert ef alveg sérstök ástæða þykir til. Umgjörð í kringum verðlaunin verður haldið í lágmarki, en frekar reynt að einbeita sér að stuðningi við þá titla sem hljóta útnefningu.
Kraumur mun styðja við þá titla sem hljóta útnefningu, og jafnframt auka við möguleika listamannanna bakvið plöturnar til að koma verkum sínum á framfæri utan landsteinana , með því að kaupa ákveðinn fjölda af útnefndum plötum og dreifa til ýmissa starfsmanna tónlistarbransans erlendis (tónlistarhátíðir, plötuútgáfur, umboðsskrifstofur o.s.frv.), í samvinnu við Útflutningskrifstofu íslenskrar tónlistar (ÚTÓN).

Markmið verðlaunana er;
Að kynna og styðja við íslenska plötuútgáfu, þá sérstaklega verk ungra listamanna og hljómsveita.
Verðlauna og verkja athygli á því sem er nýtt og spenanndi í íslenskri tónlist ár hvert á sviði plötuútgáfu.
Verðlauna og vekja athygli á þeim verkum sem sem skara fram úr í gæðum, metnaði og frumleika.
Umsóknarferli;
Ekkert umsóknarferli er fyrir listamenn / plötuútagáfur.*
Ekkert þátttökugjald er fyrir listamenn / plötuútgáfur.
Plötur eru valdar til Kraumsverðlauna óháð tónlistarstefnu, sölu, útgáfuformi eða útgáfufyrirtæki.
*Óskað eftir ábendingum: Þar sem ekkert umsóknarferli er fyrir listamenn og plötuútgáfur er það á ábyrgð dómnefndar að fylgjast með plötuútgáfu á árinu. Plötulista dómnefndar yfir útgefna titla árið 2008 má finna á


Opnun Fuglasafns Sigurgeirs

Sunnudaginn 17. ágúst síðastliðinn var Fuglasafn Sigurgeirs formlega opnað við hátíðlega athöfn. Blíðskapar veður var við athöfnina og voru rúmlega 200 manns samankomnir til að fagna þessum áfanga.
Valgerður Sverrisdóttir þingmaður flutti kveðju þingmanna, Margrét Valsdóttir oddviti Skútustaðahrepps sendi kveðjur frá sveitarstjórn hreppsins og færði safninu eina milljón krónur að gjöf, Vilborg Gissurardóttir sendi kveðju frá Atvinnuþróunarfélaginu og Ólafur Ólafsson flutti kveðju frá Aurora velgerðasjóði og líkti starfsemi safnsins á skemmtilegan hátt við fuglinn.  Vigdís Finnbogadóttir, verndari safnsins minntist Sigurgeirs og opnaði safnið formlega.

Fuglasafnið er við bakka Mývatns, nánar tiltekið í Neslöndum, þar er frábært útsýni yfir vatnið og fuglalífið. Byggingin er glæsilleg og fellur einstaklega vel inn í umhverfi sitt, en arkitekt hennar er Manfred Vilhjálmsson.

Hönnuður sýningarinnar er Axell Hallkell Jóhannsson og tókst honum einstaklega vel til, safnið vekur áhuga jafnt hjá ungum sem öldnum, sérfræðinga og leikmanna.
Stjórn Auroru var viðstödd opnuninna og er einstaklega stolt af að vera viðriðinn þetta glæsilega verkefni.


Glæsilegir útitónleikar

Glæsilegir útitónleikar voru haldnir við gömlu þvottalaugarnar í Laugardalnum síðastliðinn laugardag þar sem Björk, Sigur Rós, Ólöf Arnalds og Ghosdigital komu fram.

Glæsilegir útitónleikar með yfirskriftinni Náttúra voru haldnir við gömlu þvottalaugarnar í Laugardalnum síðastliðinn laugardag þar sem að Björk, SigurRós, Ólöf Arnalds og Ghosdigital komu fram. Tónleikarnir tókust framar vonum og almenn gleði og góður andi ríkti hjá áhorfendum að þeim loknum.

Aurora velgerðasjóður var meðal þeirra sem styrktu þessa tónleika þar sem öllum var heimill aðgangur án endurgjalds og þegar hæst stóð voru um 30 þúsund manns í brekkunni við þvottalaugarnar.
Þessi staðsetning var einkar vel til fundinn og Þvottabrekkan hefur sannað sig sem tónleikastaður, falleg staðsetning, miðsvæðis og tréin sem umkringja svæðið gera það að verkum að það er meira log en á mörgum öðrum stöðum á höfuðborgarsvæðinu.

Tónleikarnir hófust kl. 17:00 og margir tónleikagestanna gerðu sér glaðan dag,  mættu vel búnir með börn og buru, teppi og nesti, nutu veðurblíðunnar og fallegra tóna fram eftir kvöldi.
Tónleikarnir voru einnig sýndir beint á netinu, þar sem að 2,5 milljónir manna fylgdust með.


Bygging barnadeildar í Malaví

Eins og fram hefur komið styrkir sjóðurinn byggingu á nýrri barnadeild við héraðsjúkrahúsið í Mangochi héraðið í Malaví. Það er því mjög ánægjulegt að geta sagt frá því að framvinda verksins er í samræmi við væntingar.
Eins og fram hefur komið styrkir Aurora velgerðarsjóðurinn byggingu nýrrar barnadeildar við héraðssjúkrahúsið í Mangochi héraðið í Malaví.
Byggingarframkvæmdir hófust í apríl síðastliðnum og er verkið á áætlun.
Gert er ráð fyrir að barnadeildin verði tilbúin í lok árs 2008. Á hinni nýju barnadeild verða rúm fyrir 24 börn í einu og verður öll aðstaða eins og best verður á kosið. Þessi bætta aðstaða er á vissan hátt bylting í heilbrigðisþjónustu á svæðinu og eru miklar vonir bundnar við barnadeildina.
Það er að frumkvæði Sigurðar Guðmundssonar Landlæknis að ráðist var í verkefnið en hann vann á svæðinu og þekkir því vel þörfina, en jafnframt hverju hægt er að áorka með nýju barnadeildinni.

Íbúar á svæðinu eru afar þakklátir og fylgjast grannt með framkvæmdum. Þeir vita sem er að sá aðbúnaður sem þessi nýbygging veitir getur skipt sköpum í lífi lítils barns.


Innrásin – Kraumur styður tónleikhald innanlands

Kraumur kynnti þann 19. júní á Iðnó stuðning sinn tónleikahald innanlands í tengslum við Innrásina, nýtt átak sem hefur það að markmiði að greiða leið tónlistarmanna til tónleikahalds á landsbyggðinni. Alls hljóta fimm tónleikaferðir og 14 flytjendur Innrásar-stuðning frá Kraumi. Meðal annars Sumargleði Kimi Records þar sem Benni Hemm Hemm, Morðingjarnir, Borko og Reykjavík! munu leika á sjö tónleikum á átta dögum víðsvegar um landið, 14.-21. júlí.
Sumargleðin er fyrsta tónleikaferð sumarsins sem farinn er með stuðningi Kraums. Hún hefst með tónleikum í Draugasetrinu á Stokkseyri mánudaginn 14. júlí og lýkur viku síðar – eftir viðkomu á Ísafirði, Akureyri, Húsavík, Seyðisfirði, Hörn í Hornafirði – á NASA við Austurvöll í Reykjavík. Tveir af fjórum flytjendum sem koma munu fram í tónleikaferðinni ? Borko og Benni Hemm Hemm ? tóku lagið saman á Iðnó í dag.
Samstarfsaðili Kraums við Innrásina er Rás 2, sem styðja mun við átakið með því að kynna og auglýsa þá tónleika sem fara fram á landsbyggðinni í sumar og haust.
Kraumur hefur það meginhlutverk að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Með Innrásinni vill Kraumur styðja hljómsveitir og tónlistarmenn við tónleikhald á landsbyggðinni. Markmiðið er að auka við möguleika listamanna til tónleikahalds, gefa þeim færi á að koma sér og tónlist sinni á framfæri víðar en á höfuðborgarsvæðinu og efla tónlistarlíf á landsbyggðinni.
Hugmyndin að baki Innrásinni er m.a. sú staðreynd að stundum virðist auðveldara fyrir listamenn og hljómsveitir að spila erlendis, frekar en hérlendis. Með Innrásinni er ætlunin að styðja listamennina beint og auðvelda þeim tónleikhald innanlands með fjárhagslegum styrk, ferða- og græjustuðning. Jafnframt er stefnt á að búa til gagnagrunn yfir tengiliði sem nýst geta listamönnum við skipulagningu tónleika úti á landi.
INNRÁSAR-STUÐNINGUR KRAUMS
Rás 2 rokkar hringinn
Hljómsveitir; Sign, Dr. Spock og Benny Crespo’s Gang

Hvert:
1. apríl, Fjölbrautaskóli Suðurlands (Selfossi)
2. apríl, Prófasturinn (Vestmannaeyjum)
3. apríl, Sindrabær (Höfn í Hornafirði)
4. apríl, Valhöll (Eskifirði)
5. apríl, Græni hatturinn (Akureyri)
10. apríl, Paddy?s (Reykjanesbæ)
11. apríl, Nasa (Reykjavík)

Stuðningur Kraums til listamanna: 300.000,- kr.

—————————-

Sumargleði Kimi Records – Tökum hringinn á þetta!
Hljómsveitir; Benni Hemm Hemm, Borko, Morðingjarnir og Reykjavík!

Hvert:
14. júlí ? Stokkseyri, Draugasetrið
15. júlí ? Ísafjörður Edinborg
16. júlí ? Akureyri Græni Hatturinn
17. júlí ? Húsavík Gamli Baukur
18. júlí ? Seyðisfjörður Leikhúsið
19. júlí ? Höfn í Hornafirði Pakkhúsið
20. júlí ? Pása
21. júlí ? Reykjavík – Nasa

Stuðningur Kraums til listamanna með ferða- og græjustuðnings: 600.000,- kr.

—————————-

Tónleikaferð Njútón
Hljómsveit; Tónlistarhópurinn Njútón

Hvert:
25. júlí – Hádegistónleikar í Ketilhúsinu, á vegum Listasumars á Akureyri.
27. júlí – Tónleikar/innsetning í heimahúsi í miðbæ Reykjavíkur. Samvinnuverkefni Njútons og Ingibjargar Magnadóttur myndlistarmanns.
2. ágúst – Tónleikar í Skálholtskirkju, á vegum Sumartónleika í Skálholtskirkju.

Stuðningur Kraums til listamanna, með ferðastuðning: 300.000,- kr.

—————————-

Telmann og tónlist á Íslandi – Heiðurs- og fagnarðartónleikaferð
Listamenn: Elfa Rún Kristinsdóttir fiðurleikari og Melkorka Ólafsdóttir flautuleikari

Tónleikaferðin er farin til heiðurs því mikilvæga hlutverki sem kirkjur á Íslandi hafa þjónað í tónlistarlífi landsmanna gegnum aldirnar ? og er jafnfram fagnaðargjörningur þeirra tímamóta að nú er í byggingu tónlistarhús allra landsmanna í Reykjavík.

Hvert:
18. ágúst – Hóladómkirkja í Haltadal (hluti af árlegri Hólahátíð)
19. ágúst – Glerárkirkja, Akureyri
20. ágúst – Mývatn
21. ágúst – Bláa kirkjan, Seyðisfirði (hluti af sumartónleikaröð)
23. ágúst – Skálholtskirkja
24. ágúst – Flateyjarirkja
26. ágúst – Ísafjarðarkirkja
28. ágúst – Tvöfaldir tónleikar í Langholtskirkju

Stuðningur Kraums til listamanna, með ferðastuðning: kr. 400.000 kr

—————————-

Skátar og Bloodgroup – Hausttúr um Ísland
Hljómsveitir; Bloodgroup og Skátar

Hvert:
1. október – Grundarfjörður
2. október – Ísafjörður
3. október – Akureyri
4. október – Egilsstaðir
8. október – Selfoss
9. október – Keflavík
10. október – Akranes
11. október – Hafnarfjörður

Stuðningur Kraums til listamanna með ferða- og græjustuðnings: kr. 400.000,-


Mugison kynningartónleikar í London

Eftir vel heppnað tónleikaferð með bandarísku rokksveitinni Queens of the Stone Age um Kanada stóð Mugison fyrir kynningartónleikum á Corsica Studios í London þann 22. maí. Tilefnið var kynning á áframhaldandi tónleikahaldi Mugison og hljómsveitar hans í sumar víðsvegar um Bretland og Evrópu – sem og útgáfa nýjustu breiðskífu Mugsion, Mugiboogie, á alþjóðavettvangi.

Eftir vel heppnað tónleikaferð með bandarísku rokksveitinni Queens of the Stone Age um Kanada stóð Mugison fyrir kynningartónleikum á Corsica Studios í London þann 22. maí. Tilefnið var kynning á áframhaldandi tónleikahaldi Mugison og hljómsveitar hans í sumar víðsvegar um Bretland og Evrópu – sem og útgáfa nýjustu breiðskífu Mugsion, Mugiboogie, á alþjóðavettvangi.

Tónleikadagskrá kvöldsins samanstóð að mestu af lögum af Mugiboogie. Sérstakir tónleikar voru fyrir blaðamenn og starfsmenn tónlistarbransans klukkan 19:30, þar sem sem Mugsion var sjálfur mættur á gólfið strax eftir tónleikana við mikinn fögnuð viðstaddra og hóf að dreifa plötunni til gesta. Síðar um kvöldið fóru fram aðrir tónleikar sem opnir voru almenningi.

Góð mæting var á báða tónleika Mugison þetta kvöldið og greinilegt að áhugi er á tónlist hans í London, einu helsta vígi tónlistarbransans. Útflutningsskrifstofa íslenskrar tónlistar (ÚTÓN) og íslenska sendiráðið í London komu að skipulagningu tónleikana og greinilegt að þeirra vinna við að fá þangað blaðamenn og bransafólk skilaði árangri.

Mugison mun á næstu vikum koma fram á tónleikum víða í Evrópu, m.a. í Frakklandi, Þýskalandi, Sviss, Hollandi, Belgíu, Tékklandi, Englandi, Írlandi og Danmörku – þar sem hann kemur fram á Hróaskelduhátíðinni víðfrægu. Mugison leikur síðan aftur í London á Corsica Studios 9. júlí.

Hljómsveit Mugison skipa auk hans sjálfs þeir; Arnar Gíslason (trommur), Guðni Finnson (bassi), Davíð Þór (hljómborð) og Pétur Ben (gítar).

Kraumur – tónlistarsjóður styður tónleikafrerðir Mugison og hljómsveitar hans um Norður-Ameríku og Evrópu með fjármagni og ráðgjöf.

Hlekkur: www.mugison.com

Á síðunni má finna fréttir, myndir, Youtube myndbönd og fleira frá tónleikaferð Mugison. Þar má jafnframt kaupa allar geislaplötur Mugison til þessa sem niðurhal og geisladisk.


Innrásin að hefjast

Kraumur vekur athygli á Innrásinni; nýju átaki sem hefur það að markmiði að greiða leið tónlistarmanna til tónleikahalds á landsbyggðinni.

Kraumur hefur það meginhlutverk að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Með Innrásinni mun Kraumur styðja hljómsveitir og tónlistarmenn við tónleikhald á landsbyggðinni. Markmiðið er að auka við möguleika listamanna til tónleikahalds, gefa þeim færi á að koma sér og tónlist sinni á framfæri víðar en á höfuðborgarsvæðinu og efla tónlistarlíf á landsbyggðinni.
Hugmyndin að baki Innrásinni er m.a. sú staðreynd að stundum virðist auðveldara fyrir listamenn og hljómsveitir að spila erlendis, frekar en hérlendis. Lítill stuðningur er oft við þá sem vilja reyna fyrir sér með tónleikahaldi á landsbyggðinni. Með Innrásinni er ætlunin að styðja listamennina beint og auðvelda þeim tónleikhald innanlands með fjárhagslegum styrk, ferða- og græjustuðning. Jafnframt er stefnt á að búa til gagnagrunn yfir tengiliði sem nýst geta listamönnum við skipulagningu tónleika úti á landi.
Kraumur og Rás 2 hafa hafið samstarf í kringum Innrásina. Útvarp allra landsmanna mun styðja myndarlega við átakið með því að kynna og auglýsa þá tónleika sem fara fram á landsbyggðinni í sumar og haust. Rás 2 og starfsmenn stöðvarinnar luma jafnframt á reynslusögum sem eflaust geta nýst mörgum, en stöðin hefur síðastliðin þrjú ár geyst um landsbyggðina þar sem þeir hafa Rokkað og Plokkað hringinn með mörgum fremstu tónlistarmönnum þjóðarinnar af yngri kynslóðinni. Má þar nefna Ólöfu Arnalds, Pétur Ben, Lay Low, Ampop, Hermigervil og Diktu. Hljómsveitirnar Sign, Dr. Spock og Benny Crespo’s Gang Rokkuðu hringinn núna í apríl – með stuðningi Kraums við listamennina.
Umsóknir
Hér með er auglýst eftir hugmyndum og umsóknum frá hljómsveitum og listamönnum sem hyggja á tónleikahald á landsbyggðinni. Ekki verður farið fram á útfyllingu umsóknareyðublaða eða langar verkefnalýsingar. Tekið er við umsóknum frá jafnt einum flytjanda (hljómsveit/listamanni) sem og fleirum í samfloti. Umsóknir skal senda á e-mail með eftirfarandi upplýsingum:
a) Nafn hljómsveita/r eða listamanns/a ásamt stuttum upplýsingatexta
b) Nafn, sími, e-mail tengiliðs
c) Fyrirhugaðir tónleikastaðir
E-mail: kraumur@aurorafund.is
Frekari upplýsingar á vef Popplands Rásar 2.
Kraumur
Starfsemi Kraums var sett á laggirnar í upphafi árs af Aurora velgerðasjóð. Kraumur hefur það meginhlutverk að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innanlands sem utan. Á yfirstandandi starfsári er Kraumur m.a. að styðja við útrás og tónleikaferð Mugison, tónleikahald Amiinu innanlands, verkefni Víkings Heiðars Ólafssonar og plötuútgáfu Skakkamanage, Celestine, Diktu, FM Belfast, Ólafar Arnalds og Elfu Rúnar Kristinsdóttur.
Frekari upplýsingar
Eldar Ástþórsson, framkvæmdarstjóri Kraums S: 869 8179
eldar.astthorsson@aurorafund.is


Afhending skóla í Fasewaya í Koniadugu héraði.

Í marsmánuði afhenti Unicef þorpsbúum í Fasewana nýja skólabyggingu en hún var byggð fyrir tilstuðlan Auroru velgerðasjóðs. Lóa Magnúsdóttir, starfsmaður Unicef Island er stödd í Sierra Leone um þessar mundir og var viðstödd afhendinguna ásamt menntamálaráðherra Sierra Leone, Dr. Bah og framkvæmdastjóra Unicef í Sierra Leone, Geert Cappelaere.

Skólinn sem afhentur var þennan dag er björt, falleg og traustleg bygging, máluð blá og hvít. Blá leiktæki prýða leikvöllinn fyrir framan skólann og kepptust krakkarnir við að fá að sitja í rólunum og príla í klifurgrindunum.
Eftir venjubundna kynningu á gestum og fyrirfólki, héldu Dr. Bah og Geert stuttar ræður. Dr. Bah talaði einna helst um heimsókn sína til Íslands, en hann var viðstaddur þegar afhent var úr sjóðnum í janúar síðasliðinn,  og hvernig landið kom honum fyrir sjónir. Hann hvatti heimamenn til þess að fara vel með þessa skólabyggingu sem þeim var falin og tók íslenskar skólabyggingar sem dæmi um fyrirmyndir í umgengni um opinberar byggingar!
Eftir athöfnina ræddi Lóa við Meru, unga 14 ára stúlku sem er nemandi nýja skólans í Fasewaya. Mera er dæmi um stúlku sem gengur nú í fyrsta skipti í skóla fyrir tilstuðlan Auroru.  Mera hefur aldrei fengið tækifæri til þess að fara í skóla þar sem foreldrar hennar treystu sér ekki til þess að senda hana alla leið til bæjarins Kabala, þar sem nálægasti grunnskólinn er staðsettur, 45 kílómetra leið frá Fasewaya. Að sögn foreldra Meru eru hætturnar margar fyrir stúlkur sem ferðast þurfa til Kabala og margar þeirra koma heim barnshafandi.

Í afskekktum þorpum eins og Fasewaya þekkja aðeins fáir foreldrar gildi menntunar og fáir hafa efni á því að senda börn sín langar leiðir í skóla. Sum barnanna í afskekktum svæðum Síerra Leóne þurfa að ferðast fleiri kílómetra hvern einasta dag til þess að ganga í skóla, meðan önnur börn búa tímabundið hjá fjarskyldum ættingjum meðan á skólagöngu þeirra stendur. Mera telur sig mjög lánsama og sagði okkur að þegar þorpið hennar var valið sem staðsetning fyrir grunnskólann sá hún það sem tækifæri til þess að fá loksins að láta draum sinn rætast og ganga í skóla með stuðningi foreldra sinna. Meru langar til þess að verða hjúkrunarfræðingur í framtíðinni og metur því þetta tækifæri til náms mikils.


Kraumur kveður sér hljóðs

Kraumur, nýr sjálfstætt starfandi sjóður og starfsemi sem hefur það að markmiði að efla íslenskt tónlistarlíf, hefur kynnt sín fyrstu verkefni og stuðning við unga íslenska tónlistarmenn og hljómsveitir. Á yfirstandandi starfsári mun Kraumur meðal annars greiða leið tónlistarmanna til tónleikahalds á landsbyggðinni, sem og styðja við metnaðarfull verkefni tónlistarmanna með beinum hætti.
Fyrstu verkefni Kraums sem og stuðningur hins nýja sjóðs við tónlistarmenn og hljómsveitir voru kynnt 1. apríl síðastliðinn, í æfingahúsnæði nokkurra hljómsveita að Smiðjustíg 4B.
Stærstu framlög Kraums til listamanna að þessu sinni fara í stuðning við Mugison, Víking Heiðar Ólafsson og Amiinu og metnaðarfull verkefni þeirra á árinu. Tónlistarmennirnir Elfa Rún Kristinsdóttir og Ólöf Arnalds og hljómsveitirnar Dikta, FM Belfast, Celestine og Skakkamanage (sem er ein þeirra sveita sem hafa æfingaðstöðu á Smiðjustíg 4B) hljóta jafnramt fjárhagsstuðning og ráðgjöf í tengslum við gerð nýrra hljómplatna á árinu.
Eldar Ástþórsson, framkvæmdarstjóri Kraums, kynnti einnig til leiks þrjú eigin verkefni Kraums sem sjóðurinn mun vinna að á yfirstandandi starfsári; Innrásina ? sem hefur það að markmiði að auðvelda ungu tónlistarfólki tónleikahald á landsbyggðinni, Hljóðverssmiðjur til að efla grasrótina og gefa hljómsveitum og listamönnum færi á að taka upp sín fyrstu lög undir ráðgjöf reyndari listamanna og Kraumsverðlaunin til stuðnings plötuútgáfu og auka tækifæri listamanna kringum útgáfu á tónlist sinni.
Meðal viðstaddra við athöfnina voru Þorgerður Katrín Gunnarsdóttir mennamálaráðherra, sem talaði um mikilvægi stuðnings við íslenskt tónlistarlíf, Þórunn Sigurðardóttir, formaður stjórnar Kraums og stjórnarmaður í Auroru velgerðarsjóði, sem gerði grein fyrir markmiðum sjóðsins og Eldar Ástþórsson, framkvæmdarstjóri Kraums, sem kynnti fyrstu verkefni hans og stuðning. Einnig voru viðstödd hjónin Ingibjörg Kristjánsdóttur landslagsarkitekt og Ólafur Ólafsson stjórnarformaður Samskipa, en stofnun Kraums byggir á samþykkt stjórnar velgerðasjóð þeirra Auroru, sem fjármagnar starfsemi Kraums.
Kraumur styður eftirfarandi listamenn til góðra verka á árinu. Stuðningur er í formi fjárhagslegs styrks ásamt tilheyrandi ráðgjöf og aðstoð þar sem því er komið við. Framkvæmdastjóri Kraums er listamönnum til halds og trausts og annast tengsl sjóðsins við samstarfsaðila og fylgir því eftir að markmiðum samstarfs og stuðnings sé náð.
Mugison
Tónleikahald og útrás á erlendum vettvangi
Örn Elías Guðmundsson, Mugison, uppskar laun erfiðisins með útgáfu á meistaraverkinu Mugiboogie í fyrra. Hljómplatan toppaði bæði sölulista og árslista tónlistarspekúlanta hérlendis, og nú hyggur meistari Mugison á frekari landvinninga með púkann. Útgáfa er fyrirhuguðu í Evrópu og Norður-Ameríku í vor, þar sem tónleikhald gegnir lykilhlutverki í kynningu. Kraumur mun styðja við Mugison og útrás hans með myndarlegum hætti.
Í tengslum við útgáfu á Moogiboogie á alþjóðlegum vettvangi hyggur Mugison á tónleika víðsvegar á Norðurlöndunum (m.a. Hróaskelduhátíðinni), Þýskalandi, Frakkland, Ítalíu og víðar í Evrópu, Bandaríkin og Kanada (tónleikaferð með Queens of the Stone Age). Stuðningur miðast við að gera tónleikana mögulega með beinum stuðningi við Mugison og hljómsveit hans. Meðlimir í hljómsveit Mugison eru; Arnar Gíslasson trommur, Guðni Finnson bassi, Pétur Þór Ben gítar og Davíð Þór Jónsson hammond/píanó.
Upphæð: 4.000.000,- kr
Víkingur Heiðar Ólafsson
Tónleikahald, kennsla og kynning í framhaldsskólum
Víkingur Heiðar er að ljúka framhaldsnámi við Julliard tónlistarháskólann og hefur hlotið einstaka dóma fyrir leik sinn. Stuðningurinn við tónlistarferil Víking Heiðars miðar jafnframt að því að gefa framhaldsskólanemum tækifæri á að kynnast og komast í tæri við tónlistarfluttning hans. Gert er ráð fyrir nokkrum tónleikum og samstarfi við framhaldsskóla um framkvæmd þeirra – en að öðru leyti er stuðningur Kraums við Víking og meðleikara meginstoð verkefnisins. Auk þess sem Víkingur leikur á píanóið mun Árni Heimir Ingólfsson, tónlistarfræðingur og tónlistarstjóri Sinfóníuhljómsveitar Íslands, útskýra verkin og opna nemendum leiðir að því að njóta klassískrar tónlistar.
Upphæð: 1.500.000,- kr
Amiina
Tónleikahald á landsbyggðinni
Það eru spennandi tímar framundan hjá Amiinu. Eftir að hafa gefið út sína fyrstu hljómplötu, hina einstöku Kurrr, bæði hérlendis og á alþjóðavettvangi í fyrra, tekur nú við áframhaldandi vinna og kynning á plötunni, gerð kvikmyndatónlistar fyrir myndir John Crowley og Kit Hui og tónleikaferðir með Sigur Rós. Telja má tónleika Amiinu hérlendis á fingrum annarar handar. Breyting verður á því í ár, því með stuðningi Kraums er sveitinni m.a. gert kleift að gera að veruleika áætlanir sínar um tónleikaferð um Ísland. Amiina eru; Hildur Ársælsdóttir, Edda Rún Ólafsdóttir, Maria Huld Markan Sigfúsdóttir og Sólrún Sumarliðadóttir.
Upphæð: 1.200.000,- kr
Celestine / Dikta / Elfa Rún Kristinsdóttir / FM Belfast / Skakkamanage / Ólöf Arnalds
Framkvæmda- og vinnustuðningur tengd hljómplötugerð
Þrátt fyrir að tilheyra ólíkum tónlistarstefnum og straumum eiga þessir tónlistarmenn og hljómsveitir það sameiginlegt að vera vinna að nýjum hljómplötum í ár. Á meðan Celestine, Dikta, Skakkamanage og Ólöf Arnalds eru með sína aðra plötu smíðum eru Elfa Rún Kristinsdóttir og FM Belfast að vinna að sínum fyrstu hljómplötum. Það er von Kraums að þessi stuðningur nýtist viðkomandi listamönnum vel við þá vinnu sem fylgir lagasmíðum, æfingum og upptökum. Auk fjárframlags verður listamönnunum veitt stuðningur í formi ráðgjar og samvinnu þar sem því verður komið við. Ekki loku skotið fyrir áframhaldandi samstarf við þessa listamenn á næsta ári.
Upphæð: 500.000,- kr hver hljómsveit / listamaður (samtals 3.000.000)
Eigin verkefni Kraums:
Innrásin ? Tónleikastuðningur Kraums
Verkefnið miðar að því að ýta undir og efla tónleikahald á landsbyggðinni og öfugt. Hugmyndin að baki þessu starfi er m.a. sú staðreynd að stundum virðist auðveldara fyrir listamenn og hljómsveitir að spila erlendis, en hérlendis ? t.a.m. í Kaupmannahöfn frekar en á Egilstöðum. Lítill stuðningur er í dag við þá sem vilja reyna fyrir sér með tónleikhald á landsbyggðinni. Markmiðið með Innrásinni er að brúa þetta bil ? og auka við fjölbreytni og möguleika ungra listamanna til tónleikahalds. Stuðningurinn verður í formi æfingastyrkja, ferða- og græjustuðnings. Jafnframt verður stefnt á að búa til gagnagrunn yfir tengiliði sem nýst geta listamönnum við skipulagningu tónleika úti á landi. Markmiðið er stuðningur við tónlistarlíf í landinu og við listamennina beint með því að auka við tækifæri þeirra við útbreiðslu listar sinnar, fjölbreytni í tónleikahaldi og tekjumöguleikum.
Hljóðverssmiðjur
Stuðningur við grasrótina. Upprennandi listamönnum gert kleift að komast í stúdíó með faglegri upptökustjórn og ráðgjöf reyndari listamanna. Framkvæmd er þannig háttað að listamanni/hljómsveit er gefið tækifæri á þátttöku og veru í stúdíó í tiltekin tíma. Hugmyndir eru uppi að upptökuferlið fari fram á landsbyggðinni. Afraksturinn yrði fullklárað efni sem listamaðurinn á sjálfur og getur nýtt eftir hentugleika, t.d. til útgáfu (t.d. á netinu), nýtt kynningarskyni eða dreift á útvarpsstöðvar.
Kraumsverðlaunin
Það er gamall og góður siður að velja bestu plötur ársins. Með Kraumsverðlaununum er þessi leið farin, en með það að markmiði að styðja við útgáfur ungra íslenskra hljómsveita og listamanna og auka við möguleika þeirra í kjölfar útgáfunnar. Hvernig? Kraumur mun skuldbinda sig til að versla 100 stk af öllum plötum sem útnefndar verða til verðlaunana (sem því miður er í sumum tilvikum hátt hlutfall heildarsölu). Þessi eintök mun sjóðurinn sjá um að senda út og dreifa á starfsmenn tónlistarbransans erlendis eins og tónlistarhátíðir, umboðsskrifstofur, plötuútgáfur o.s.frv. Með þessu er verið að auka við möguleika viðkomandi listamanns á alþjóðavettvangi. Verðlaunin munu ná til allrar tegundir tónlist, en hafa það að markmiði að verðlauna það sem er nýtt og spennandi í íslenskri tónlist.


Menntamálaráðherra Sierra Leone heimsótti Ísland

Menntamálaráðherra Síerra Leóne, Dr. Minkailu Bah, heimsótti Ísland fyrir skemmstu til að veita viðtöku styrk frá Aurora velgerðasjóði. Nýtti ráðherrann tækifærið og hitti menntamálaráðherra Þorgerði Katrínu Gunnarsdóttur ásamt því að heimsækja ýmsar stofnanir og fyrirtæki á meðan á dvöl hans stóð.

Tilgangur heimsóknar ráðherrans var, eins og áður sagði, að veita viðtöku styrk frá Aurora velgerðasjóði, en sjóðurinn veitti nýlega u.þ.b. 140 milljónum króna (andvirði tveggja milljóna Bandaríkjadala) til menntaverkefnis í Síerra Leóne. Áður höfðu hjónin Ingibjörg Kristjánsdóttir og Ólafur Ólafsson veitt 36 milljónum króna (500 þúsund Bandaríkjadölum) til uppbyggingar á skólaaðstöðu, þjálfunar kennara og kaupa á námsgögnum fyrir strjálbýl svæði landsins.

Ráðherrann hóf heimsókn sína á kvöldverði í ráðherrabústaðnum í boði Þorgerðar Katrínar Gunnarsdóttur menntamálaráðherra. Með ráðherranum í för var Mrs. Edna M Jones frá ráðuneyti menntamála, vísinda og tækni í Síerra Leóne.

Daginn eftir heimsótti ráðherrann menntamálaráðuneytið og hitti þar Þorgerði Katrínu, Guðmund Árnason ráðuneytisstjóra og Steingrím Sigurgeirsson aðstoðarmann ráðherra. Þar var farið yfir uppbyggingu menntakerfisins á Íslandi, skólagjöld, lánamál o.fl.

Háskólinn í Reykjavík

Svafa Grönfeldt rektor Háskólans í Reykjavík tók á móti ráðherranum ásamt Ingu Dóru Sigfúsdóttur, forseta Kennslufræði- og lýðheilsudeildar. Svafa skýrði frá skipulagi og áherslum HR og einnig framtíðaraðstöðu skólans sem verður í Öskjuhlíðinni.  Einnig sagði hún frá verkefni á vegum skólans sem unnið verður í samstarfi við UNICEF í Gíneu Bissau, þar sem kennarar úr Kennslufræði- og lýðheilsudeild HR fara til Gíneu Bissau til að mennta verðandi grunnskólakennara.  Að lokum var litið við í fyrirlestri hjá Geir Gunnlaugssyni lækni, en hann bjó í fimm ár í Gíneu Bissau og var læknisfræðilegur ráðunautur hjá heilbrigðisyfirvöldum.

Háskóli Íslands

Kristín Ingólfsdóttir rektor Háskóla Íslands og Jón Atli Benediktsson Ph.D. þróunarstjóri og aðstoðarmaður rektors tóku á móti ráðherranum.  Sagði Kristín frá samstarfi við Háskóla Nígeríu, nemendaskiptum og styrkjum, en nokkrir nemendur frá Nígeríu hafa stundað nám við HÍ í tengslum við það.

UNICEF

Dr. Bah heimsótti einnig UNICEF á Íslandi og hélt tölu á opnum málfundi UNICEF Ísland fimmtudaginn 24. janúar sl.

 

Ávarp Dr. Minkailu Bah, ráðherra menntamála Síerra Leóne í Reykjavík, 23. janúar 2008

Ráðherra/r, aðstandendur Aurora velgerðasjóðs, Ingibjörg Kristjánsdóttir og Ólafur Ólafsson, fulltrúar UNICEF frá Síerra Leóne og aðrir gestir.

Ég færi ykkur kveðju frá Forseta Síerra Leóne, herra Ernest Bai Koroma, frá ríkisstjórninni og þjóðinni allri.  Það gladdi mig mikið þegar ég fékk þetta góða boð frá ykkur, ekki einungis vegna þess rausnarlega framlags sem við veitið okkur hér í dag, heldur einnig vegna þeirrar velvildar sem við njótum frá fólki og landi svo langt í burtu.  Velvild ykkar mun ætíð tengja Ísland og Síerra Leóne sterkum böndum.

Ég er ekki viss hversu mikið viðstaddir vita um Síerra Leóne og stöðu menntunar í landinu.  Ég ætla ekki að þreyta ykkur með langri ræðu en langar að nefna nokkur atriði sem ég vona að geti vakið áhuga ykkar.

Síerra Leóne ber enn það nafn sem portúgalskur landkönnuður gaf því er hann á að hafa “fundið landið” ? eins og það hafi verið týnt.  Höfuðborgin Freetown varð að breskri nýlendu og geymslustaður fyrir frelsaða þræla.  Seinna varð hún vettvangur enskunáms fyrir enskumælandi lönd Afríku og varð þekkt sem Aþena Afríku.  Svo má vel hafa verið en vestræn menntun náði ekki inn til alls landsins.

Sjálfstæði náðist á sjöunda áratugnum en meirihluti þjóðarinnar hafði lítinn sem engan aðgang að menntun.

Tíu ára löng borgarastyrjöld, sem hófst 1990 og endaði með friðarsáttmála árið 2001, gerði illt verra ? Síerra Leóne var í molum. Framtíðin virtist í uppnámi, þjóðin var tvístruð og að niðurlotum komin, hagkerfið nánast að engu orðið og menntastofnanir eyðilagðar.  En við erum sterk og ákveðin þjóð.

Við höfum risið upp úr örvæntingu með hjálp vina eins og Íslands og UNICEF.  Í dag getum við státað af stórkostlegri fjölgun í skólum, byggingu skóla á stöðum þar sem áður voru engir, vaxandi fjölda ungmenna með grunnmenntun og auknum hagvexti. Munur á aðgangi að menntun eftir kyni eða landfræðilegri staðsetningu hefur einnig minnkað mikið.

Ég vildi að ég gæti sagt að nú gengi allt vel í Síerra Leóne, en það væri ekki rétt.  Ný úttekt á menntakerfi landsins sýnir að enn vantar mikið upp á. Stærsti þátturinn er e.t.v. sá, að ríkisstjórn Síerra Leóne getur ekki, ein og sér, séð þegnum sínum fyrir menntun með því að nota eingöngu eigin úrræði.  Þetta þýðir einfaldlega, að án stuðnings vina og samstarfsaðila hefðum við ekki tök á að veita grunnskólabörnum nauðsynlega menntun eða þjálfa og greiða kennurum fyrir sína þjónustu. Við gætum heldur ekki lengur reynt að útrýma aðstöðumun vegna kynferðis eða landfræðilegrar staðsetningar.

Við erum handviss um að tekjur munu halda áfram að vaxa, að verg landsframleiðsla muni enn hækka og að fátækt muni minnka, en töluverður tími mun líða þangað til þörf okkar fyrir utanaðkomandi aðstoð verður að engu. Þangað til munum við þurfa á fjárframlögum að halda, eins og veitt eru hér í dag.

Mikilvægt er að framlög séu gagnsæ, án annarra skuldbindinga, og komi í gegnum trausta aðila, þar sem vitað er að framlögin fari að öllu leyti til uppbyggingar á menntakerfinu.

Allir þeir sem ljúka grunnmenntun, verða að fá viðurkenningu, sem er einhvers virði.  Menntastig þjóðarinnar ákvarðast af gæðum grunnmenntunar í landinu.  Þetta hefur mikil áhrif á hæfni einstaklingsins, efnahag landsins og forystu.  Það dugar ekki lengur að börn gangi í gegnum skólakerfi, heldur verðum við að tryggja þeim menntun sem kennir þeim að lesa og reikna og hvetur þau til að taka þátt í atvinnulífinu eða leita sér frekari menntunar.

Margar hindranir á veginum eru landfræðilegar.  Þegar börn, sérstaklega stúlkur, geta ekki verið örugg á leið í skólann eða í skólanum, þá verður að bregðast við.

Velgerðasjóðurinn sem gefur framlagið hér í dag hefur áður gefið andvirði 500 þúsund Bandaríkjadala í gegnum UNICEF árið 2006 og á eftir því fylgdi framlag upp á 420 þúsund Bandaríkjadali frá íslensku ríkisstjórninni í janúar 2007.  Þetta er því það þriðja og stærsta framlag sem við höfum fengið frá Íslandi á síðastliðnum tveimur árum.

Við erum þakklát Ingibjörgu Kristjánsdóttur og Ólafi Ólafssyni fyrir þessa miklu og innilegu velvild.

Þið getið verið viss um að börnin og fólkið í Síerra Leóne mun verða áskynja um þessa velvild í okkar garð og þið munuð ætíð verða velkomin til Síerra Leóne.

Virðulegur gestir, ég hef talað lengur en ég ætlaði.  Ég vona að ég hafi vakið áhuga ykkar á að vita meira um Síerra Leóne.

Tryggjum að vináttubönd Íslands og Síerra Leóne styrkist enn frekar.

Það er mér mikill heiður að vera hér í dag og taka á móti framlagi úr Aurora velgerðasjóði að upphæð tveimur milljónum Bandaríkjadala til menntaverkefnis UNICEF í Síerra Leóne.

Ég þakka ykkur öllum

 


Horft yfir sjóndeildarhringinn úr Þjóðminjasafninu

„Megi velgerðasjóðurinn Aurora gera sem flestum kleift að sjá yfir sjóndeildarhringinn!“ sagði Ingibjörg Kristjánsdóttir, stjórnarformaður Aurora, meðal annars þegar hún setti samkomu í Þjóðminjasafninu á miðvikudaginn var, 23. janúar, í tilefni af því að tilkynnt var um fyrstu styrktarverkefni sjóðsins.

Athöfnin hófst reyndar með tónleikum hinnar stórgóðu sveitar Hjaltalín, sem kom svo meira við sögu síðar í dagskránni, og formlegri dagskrá lauk svo með hrífandi fiðluleik Unu Sveinbjörnsdóttur.

Ingibjörg rifjaði upp aðdraganda sjóðsstofnunarinnar í ávarpi sínu og lauk máli sínu á eftirfarandi orðum:

„Rétt eins og fjögur börn gyðjunnar Áróru stóðu fyrir höfuðáttunum norður, suður, austur og vestur, styrkjum við hér í dag fjögur verkefni, tvö menningartengd verkefni hérlendis, eitt fyrir norðan og eitt fyrir sunnan, og tvö þróunarverkefni í Afríku; eitt í austri og annað í vestri. Vert er að benda á að frekari upplýsingar um sjóðinn og verkefnin má nálgast á heimasíðunni www.aurorafund.is. Áður en ég hleypi stjórnarmönnum að vil ég þakka öllum þeim sem hafa lagt hönd á plóginn með okkur hjónuum til að gera þetta verkefni, sem er okkur mjög hugleikið, að veruleika. Megi velgerðasjóðurinn Aurora gera sem flestum kleift að sjá yfir sjóndeildarhringinn.“

Tugir gesta voru viðstaddir athöfnina, sem tókst sérlega vel og sannarlega var stemningin eins og efni stóðu til! Þorgerður Katrín Gunnarsdóttir menntamálaráðherra heiðraði samkomuna með nærveru sinni og það gerði líka kollegi hennar úr ríkisstjórn Síerra Leóne, dr. Minkailu Bah. Sá síðarnefndi tók við bréfi úr hendi Ingibjargar stjórnarformanns upp á þiggja ára samstarf Aurora við menntamálayfirvöld í heimalandi sínu og færði sjóðsstjórn innilegar þakkir ríkisstjórnar sinnar og landsmanna allra.

Sigurður Guðmundsson, landlæknir og stjórnarmaður í Aurora, kynnti Malaví-styrktarverkefnið fyrir gestum og var þar á heimavelli í ákveðnum skilningi því hann var við störf á vegum Þróunarsamvinnustofnunar Íslands í Malaví á árinu 2007, ásamt eiginkonu sinni, Sigríði Snæbjörnsdóttur. Enginn fulltrúi frá Malaví var á vettvangi til að taka við styrknum úr hendi Sigurðar en í það skarð hljóp ung íslensk stúlka, Hekla Sól Kristjánsdóttir, og skilaði með miklum sóma hlutverki sínu sem skjótskipaður sendiherra Malaví á Íslandi.

Þórunn Sigurðardóttir, listrænn stjórnandi Listahátíðar í Reykjavík og stjórnarmaður í Aurora, kynnti þá ákvörðun sjóðsstjórnar að stofna sjóðinn Kraum til stuðnings ungu tónlistarfólki. Eldar Ástþórsson, nýráðinn framkvæmdastjóri Kraums, veitti styrknum viðtöku og sagði að sjóðurinn yrði íslensku tónlistarlífi tvímælalaust mikilsverður bakhjarl. Hljómsveitin Hjaltalín þakkaði á sinn hátt ? og jafnframt fyrir hönd tónlistarmanna af yngri kynslóðinni ? með vel völdum tónum úr hinum enda salarins í Þjóðminjasafninu.

Ólafur Ólafsson, annar stofnenda Aurora og stjórnarmaður í sjóðnum, afhenti styrk vegna Fuglasafns Sigurgeirs í Mývatnssveit. Hann sagðist einkum hafa hrifist af þeim frumkvöðlakrafti sem lýsti sér í þeirri djörfu ákvörðun fjölskyldunnar að Ytri-Neslöndum að ráðast í að byggja yfir fuglasafnið sem Sigurgeir Stefánsson skildi eftir sig þegar hann fórst í hörmulegu slysi á Mývatni í vetrarbyrjun 1999. Ólafur bar lof á aðstandendur safnsins fyrir þrautseigju, hugrekki og framsýni en um leið fyrir ráðdeildarsemi og gætni í hverju skrefi verkefnisins. Pétur Bjarni Gíslason, mágur Sigurgeirs heitins, var mættur til að taka við styrknum úr hendi Ólafs. Hann vonast til að fjármunirnir geri aðstandendum safnsins mögulegt að opna það 1. júlí í sumar.

Við upphaf samkomunnar vék Ingibjörg Kristjánsdóttir, stjórnarformaður Aurora, meðal annars að nafni sjóðsins Aurora og sagði meðal annars:

Afríkubúi nokkur stóð eitt sinn frammi fyrir því verkefni að snara á þjóðtungu sína texta þar sem fyrir kom hugtakið von. Honum fannst þýðingin einkar strembin því að orðið von fyrirfannst hreinlega ekki í tungumáli hans. Svo leið og beið og ekkert gekk en allt í einu ljómaði andlit mannsins af ánægju og hann hrópaði upp yfir sig: „Að vona er auðvitað að sjá yfir sjóndeildarhringinn!“

Það var engin tilviljun að við völdum nafnið AURORA á velgerðasjóðinn sem veitt verður úr í fyrsta sinn hér í dag. Merking nafnsins er tvíþætt:

1. Aurora er persónugerving dögunar og hin rómverska gyðja sólarupprásar. Þannig skírskotar Aurora til andlegra verðmæta ljóss og birtu, til þeirrar dagrenningar sem gerir okkur kleift að sjá yfir sjóndeildarhringinn, þangað sem vonin býr.

2.    Aurora er skylt orðinu aurum á latínu sem merkir gull og þá jafnframt skylt íslensku orðunum eyrir og aurar. Þannig skírskotar Aurora til veraldlegra verðmæta, til þess fjármagns er getur komið góðu til leiðar ef rétt hugarfar býr að baki og rétt er á málum haldið. Í þessu felst einmitt hið tvíeina eðli velgerðasjóðsins:Að kveikja með fólki nýja von og efla getu þess til góðra verka.

Ingibjörg fjallaði líka um það í ávarpi sínu hvernig það kom til að hún og bóndi hennar, Ólafur, fóru að beina sjónum sínum að Afríku og þróunarhjálp þar í álfunni og að stuðningi við menningarverkefni hér heima:

„Hugmyndin að virku stuðningsafli við þróunarhjálp kviknaði í tengslum við ferðir og verkefni okkar Ólafs í Afríku, þessari stórkostlegu vöggu alls mannkyns. Það er erfitt annað en að bindast sterkum tilfinningalegum tengslum við þessa álfu ægifagurrar víðáttu, síkvikrar náttúru og stórkostlegra íbúa

Þegar ég hugsa um Síerra Leóne, finn ég alltaf fyrir kraftinum sem býr með þessari þjóð þrátt fyrir allan mótbyr. Ég sé fyrir mér iðandi mannfjöldann í Freetown, óhamda þjóðlega litaauðgi í borg sem aldrei sefur. Þrátt fyrir erfitt atvinnuástand og margvíslegt andstreymi, eiga íbúar Síerra Leóne auðvelt með að gleyma amstri dagsins í söng og dansi. Brosið og hláturinn er aldrei langt undan og þá er auðvelt að hrífast með. Við hjónin höfum oft talað um að í þessum ferðum okkar verði sálartetrið svo sveiflukennt. Það sveiflist frá vondeyfð og jafnvel gremju yfir ástandinu, og þá sérstaklega þeirri algjörlega tilgangslausu eyðileggingu sem átti sér stað í borgarastyrjöldinni, yfir í ákefð og hrifningu yfir öllum þeim möguleikum sem blasa við þessari frábæru heimsálfu EF undirstöðuatriðin eru í lagi, þ.e. heilsugæsla, menntun, hreint vatn og samgöngur. Að lokum tekur svo við gleði yfir öllu því jákvæða sem verið er að gera. Og þá kemur einmitt stóra spurningin: „Hvað er hægt að gera?“

Hugmyndin að stuðningi við menningarstarfsemi á Íslandi kviknaði þegar við hjónin ákváðum að gerast fjárhagslegir bakhjarlar Kjartans Ragnarssonar og Sigríðar M. Guðmundsdóttur við stofnun stórvirkis þeirra, Landnámssetursins í Borgarnesi. Það hefur verið gaman að upplifa hvernig þetta frábæra framtak þeirra hefur sáð fræjum nýrra hugmynda og áræðis út í samfélagið og sýnt hve skammt getur verið á milli góðrar hugmyndar og veruleika.“


Aurora velgerðasjóður ráðstafar 210 milljónum króna til fjögurra styrktarverkefna hérlendis og í Afríku

Stjórn Aurora velgerðasjóðs kynnti í dag þá ákvörðun sína að ráðstafa alls 210 milljónum króna til fyrstu styrktarverkefna sjóðsins. Hjónin Ingibjörg Kristjánsdóttir landslags-arkitekt og Ólafur Ólafsson, stjórnarformaður Samskipa og Alfesca, stofnuðu velgerðasjóðinn fyrir réttu ári á fimmtugsafmæli Ólafs, 23. janúar 2007, og lögðu honum til einn milljarð króna í stofnframlag. Sjóðnum var síðar gefið nafnið Aurora (segulljós), honum voru settar samþykktir og starfsreglur og sjóðsstjórn skipuð.

Gert er ráð fyrir að verja arði og vaxtatekjum sjóðsins til ýmissa verkefna í þróunar-löndum og til að göfga mannlíf á Íslandi með því að styrkja verkefni á sviði menningar, mennta og lista í samræmi við samþykktir sjóðsins og ákvörðun sjóðsstjórnar hverju sinni.

Stjórn velgerðasjóðsins tilkynnir nú um fyrstu styrkina úr sjóðnum, samtals 100 milljónir króna, til fjögurra verkefna árið 2008. Tvö þessara verkefna eru til þriggja ára og í raun ráðstafar stjórn velgerðasjóðsins því alls 210 milljónum króna:

Verkefnin sem hlutu styrki til þriggja ára:

Menntamálaráðherra Síerra Leóne, dr. Minkailu Bah, kom til Íslands í tilefni af ákvörðun Aurora velgerðasjóðs um að styðja uppbyggingu menntakerfis landsins. Hann hitti m.a. Þorgerði Katrínu Gunnarsdóttur menntamálaráðherra að máli og notaði tækifærið til að heimsækja bæði Háskóla Íslands og Háskólann í Reykjavík.
Fuglasafn Sigurgeirs er kennt við Sigurgeir Stefánsson á Ytri-Neslöndum við Mývatn, áhugamann um fuglalíf og náttúru sem lést af slysförum árið 1999. Hann safnaði uppstoppuðum fuglum og eggjum og átti orðið um 320 uppstoppaða fugla og egg undan um 100 tegundum varpfugla á Íslandi. Aðstandendur Sigurgeirs ákváðu að ráðast í að byggja hús yfir safnið og hýsa þar líka Sleipni, bát Jóns Sigtryggs-sonar á Syðri-Neslöndum, eitt fyrsta samgöngutæki Mývetninga. Nýja sýningarhúsið var orðið fokhelt á árinu 2006. Þar vantar ýmsan búnað til sýningahalds og Aurora velgerðasjóður ætlar að hlaupa undir bagga. Í umsögn stjórnar Aurora velgerðasjóðs segir meðal annars:
„Fjölskylda Sigurgeirs heitins Stefánssonar á heiður skilinn fyrir að hafa lagt út í að byggja hús yfir fuglasafnið og undirbúa sýningahald þar af fádæma metnaði og þrautseigju. Stjórn Aurora velgerðasjóðs hefur ákveðið að leggja henni lið svo Fuglasafn Sigurgeirs fái sem fyrst þann aðbúnað sem því ber til að auðga mannlíf og menningu í Mývatnssveit og á landinu öllu.“

Heilbrigðisverkefni í Malaví. Aurora velgerða-sjóður greiðir kostnað við viðbyggingu barnadeildar héraðssjúkrahússins í Mangochi og gert er ráð fyrir að nýja húsið verði tekið í gagnið í haust. Barnadeildin er alltof lítil og gert er ráð fyrir að hægt verði að tvöfalda húsrými hennar og bæta 36 sjúkrarúmum við þau 36 rúm sem fyrir eru. Einnig á að koma á laggirnar 10 rúma gjörgæslu- og nýburadeildum, móttökudeild og vaktstöð fyrir hjúkrunarfólk. Jafnframt verður farið í nauðsynlegar framkvæmdir við rotþrær og fráveitulagnir tilheyrandi barnadeildinni/sjúkrahúsinu. Í umsögn stjórnar Aurora velgerðasjóðs segir meðal annars:
„Brýnt er að auka og efla heilbrigðisþjónustu í Malaví, ekki síst við börn. Tíunda hvert lifandi fætt ungabarn deyr og sautján börn af hverjum hundrað deyja áður en þau verða fimm ára. Þarna er því augljóslega verk að vinna og Aurora velgerðasjóður ætlar að leggja sitt af mörkum til að bæta heilbrigðisþjónustu við barnadeild héraðssjúkrahússins í Mangochi í Malaví.“
Menntaverkefni í Síerra Leóne. Markmiðið er að styðja Barnahjálp Sameinuðu þjóðanna UNICEF og stjórnvöld Síerra Leóne í því að tryggja öllum börnum á skólaaldri grunnmenntun fyrir 2015. Aurora velgerðasjóður og UNICEF á Íslandi munu vinna í sameiningu að því marki að 85% barna í Síerra Leóne njóti grunnmenntunar í skóla árið 2010. Sjóðurinn ver jafnvirði 120 milljóna íslenskra króna til að reisa skólahús í Síerra Leóne á árunum 2008-2010. Í hverju húsi verða þrjár til sex skólastofur þar sem gert er ráð fyrir að kenna börnum á aldrinum 6-12 ára. Jafnframt útvegar sjóðurinn húsgögn og nauðsynlegan búnað í skólana og sér húsunum fyrir vatni, hreinlætisaðstöðu og leiktækjum utan dyra. Þá mun sjóðurinn standa straum af kostnaði við að mennta og þjálfa kennara, horfa jafnframt sérstaklega til menntunar og öryggis stúlkna og styðja hópastarf kvenna og mæðra. Í umsögn stjórnar Aurora velgerðasjóðs segir meðal annars:

„Menntun er eitt helsta vopnið gegn fátækt í heiminum og gefur einkum börnum færi á mannsæmandi lífskjörum, eykur sjálfsvirðingu þeirra og hefur víðtæk áhrif til að skapa upplýst samfélag. Barnahjálp Sameinuðu þjóðanna (UNICEF) hefur að mati stjórnar Aurora velgerðasjóðs gert heildstæða aðgerðaáætlun um uppbyggingu grunnmenntunar í Síerra Leóne, einu fátækasta ríki heims. Þar er ráðist að rótum vandans og tekið á flestum þáttum sem standa í vegi þess að börn á grunnskólaaldri, einkum stúlkur, njóti þeirra menntunar sem þau eiga rétt á.“

Kraumur tónlistarsjóður er sjálfstæður sjóður á vegum Aurora velgerðasjóðs. Hann hefur það meginhlutverk að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri. Markmiðið er að styrkja stöðu ungra tónlistarmanna á Íslandi með beinum styrkjum, faglegri aðstoð og samstarfi af ýmsu tagi. Sjóðnum er sömuleiðis ætlað að ná markmiðum sínum með því að miðla þekkingu á sínu sviði, meðal annars með námskeiðahaldi, ráðgjöf og smiðjum (workshops) og með samstarfi við ýmsa þá sem vinna að sömu markmiðum. Í umsögn stjórnar Aurora velgerðasjóðs segir meðal annars:

„Íslenskt tónlistarlíf er sérstakt um margt, einkum vegna áberandi krafts og áræðis sem einkennir tónlistarfólk af yngri kynslóðinni. Sykurmolarnir og Björk ruddu braut í tónlistarútrás sem á sér enga hliðstæðu. Fjöldamargir tónlistarmenn fetuðu í fótspor þeirra með undraverðum árangri og nú er tónlistarlíf á Íslandi orðið einn sterkasti þátturinn í ímynd lands og þjóðar út á við. Óvenjulegt samspil dægurtónlistar og sígildrar tónlistar getur orðið drifkraftur frekari landvinninga. Stuðningur við unga tónlistarmenn, til verkefna og samstarfs af ýmsu tagi, skýtur styrkari stoðum undir þennan mikilvæga vaxtarbrodd í íslensku menningarlífi.“


Velgerðasjóðurinn kynntur til sögunnar

Tilkynnt var um stofnun velgerðasjóðsins, sem síðar hlaut nafnið Aurora, á fréttamannafundi á Hótel Borg í Reykjavík að morgni laugardags 20. janúar 2007. Fundarboðendur birtu eftirfarandi fréttatilkynningu um það sem var á dagskrá hjá þeim:

Hjónin Ingibjörg Kristjánsdóttir landslagsarkitekt og Ólafur Ólafsson, stjórnarformaður Samskipa, hafa stofnað velgerðasjóð og leggja honum til einn milljarð króna í stofnframlag. Tekjum sjóðsins, sem eru arður og vaxtatekjur af stofnfé, verður annars vegar varið til ýmissa verkefna í þróunarlöndum og hins vegar til að göfga mannlíf á Íslandi með því að styrkja verkefni á sviði menningar, mennta og lista í samræmi við samþykktir sjóðsins og ákvörðun sjóðsstjórnar hverju sinni. Ætla má að árlega verði til ráðstöfunar 100-150 milljónir króna.

Fimm manna stjórn ber ábyrgð á stefnumörkun og rekstri sjóðsins. Í henni sitja, auk Ingibjargar og Ólafs, Sigurður Einarsson, stjórnarformaður Kaupþings, Sigurður Guðmundsson landlæknir, sem nú sinnir hjálparstörfum í Malaví á vegum Þróunarsamvinnustofnunar Íslands, og Þórunn Sigurðardóttir, listrænn stjórnandi Listahátíðar í Reykjavík og stjórnarmaður í UNICEF á Íslandi. Stjórnin setur sér nánari starfsreglur en miðað er við að hún geri grein fyrir styrkjum úr sjóðnum snemma á ári hverju, í fyrsta sinn árið 2008.

Menntaverkefni í Síerra Leóne og Landnámssetrið í Borgarnesi

Sjóðsstofnunin nú er í beinu framhaldi af tveimur tilteknum verkefnum sem Ingibjörg og Ólafur taka þátt í hérlendis og erlendis um þessar mundir og hafa varið til alls á annað hundrað milljóna króna. Annars vegar styrkja þau umfangsmikið menntaverkefni á vegum Barnahjálpar Sameinuðu þjóðanna, UNICEF, í Afríkuríkinu Síerra Leóne. Það er fólgið í því að reisa 50 samfélagsskóla í samvinnu við menntamálaráðuneyti landsins og er skólunum jafnframt séð fyrir húsgögnum og öðrum búnaði. Um 100 kennarar verða þjálfaðir til starfa í nýju skólunum og nemendum útveguð nauðsynleg kennslugögn. Hins vegar styrktu þau uppbyggingu Landsnámssetursins í Borgarnesi í minningu foreldra Ólafs, sem bjuggu þar í bæ og störfuðu um árabil, Önnu Ingadóttur og Ólafs Sverrissonar.

Fá verkefni og stór frekar en mörg og smá

Ingibjörg og Ólafur sjá fyrir sér að nýi góðgerðasjóðurinn sinni tiltölulega fáum verkefnum hverju sinni en styrki þau myndarlega og markvisst. Þau vilja fylgjast með og taka þátt í verkefnunum eftir því sem unnt er. Þannig hafa þau fylgst náið með gangi mála í Síerra Leóne og með uppbyggingu og rekstri Landnámssetursins í Borgarnesi. Ingibjörg situr bæði í stjórn UNICEF á Íslandi og í stjórn Landnámssetursins. Ólafur sat um árabil í stjórn Rauða kross Íslands. Viðhorf sín orða þau sjálf á eftirfarandi hátt:

„Samfélagsleg ábyrgð er bæði eðlileg og sjálfsögð og við höfum auk þess einfaldlega áhuga fyrir að beita okkur enn frekar í þróunaraðstoð og til stuðnings ýmsum verkefnum sem bæta og göfga mannlíf á Íslandi. Margt fólk býr við óviðundandi lífsskilyrði í þróunarlöndum en oft þarf lítið til að áorka miklu til batnaðar. Við viljum að sjóðurinn verði virkt og lifandi stuðningsafl í þróunarhjálp og unnið verði í nánu samstarfi við stjórnvöld og íbúana sjálfa á hverjum stað, líkt og við höfum gert í Síerra Leóne. Á Íslandi sjáum við til dæmis fyrir okkur að taka þátt í verkefnum á sviði menningar, lista og menntunar, mannbætandi verkefnum sem koma nærsamfélaginu og jafnvel landsmönnum öllum til góða. Landsnámssetrið í Borgarnesi er gott dæmi. Sigríður Margrét Guðmundsdóttir og Kjartan Ragnarsson eru frumkvöðlarnir sem ýttu úr vör og sannfærðu aðra, þar á meðal okkur, um að vit væri í að setjast með þeim undir árar. Þessu ferðalagi lauk eins og til var stofnað og Landnámssetrið er þegar orðið héraðsstolt Borgarfjarðar og glæsilegur vettvangur menningar og lista sem horft er til úr öðrum landshlutum.“